Tiri bolsam, qazaqqa qyzmet etpeı qoımaımyn!

Álıhan Bókeıhan

Mirjaqyp Dýlatuly: Halyqqa qyzmet etemin degen kisige báribir: depýtat bol, gazet shyǵar, bala oqyt

22 sáýir 2024 189

Jalpyqazaq sezi ýchredıtelnoe sobranıege Torǵaı oblysynan depýtat belgilengende, spısokte meni ekinshi qylyp kórsetken edi. Men tómengi sebeptermen spısokten shyǵamyn hám talasqa túspeımin.

1) Saıasat jóninde jurttyń bárine ustaz - Eýropa halqy. Biz órnekti Eýropa halqynan alýǵa tıistimiz. Biraq az ýaqyttyń ishinde qansha súıregenmen, jalpy jurt Eýropa bolyp kete almaıdy. Júre-júre túzý jolǵa túspek. Ýchredıtelnoe sobranıege saılanatyn depýtattar da Eýropa rásimimen saılanýǵa tıis edi. Anaý arǵyn, mynaý alshyn delinbese kerek edi. Torǵaı oblysynyń spısoginde aldyńǵy qatardaǵy úsh kisi - úsheýi de arǵyn, úsheýi de bir úıezden bolǵan soń, Eýropa jolynan taıyp shyǵyp, biz músheden qur qaldyq degen qyńqyl shyqty. Sonyń úshin arǵyndy azaıtýǵa hám arǵyn kemise, Torǵaı oblysynyń spısogi bireý bolar degen maqsatpen shyǵamyn.

2) Ahmet hám men ekeýmiz de depýtat bola qalsaq gazet ıesiz qalar, óıtkeni ýchredıtelnoe sobranıe májilisi 2-3 aıdan aspas dep oılasaq ta, uzaqqa sozylmasyna kóz jetpes dep shyǵamyn.

Bir kisi bir iske jaraıtyn bolsa da az emes. Halyqqa qyzmet etemin degen kisige báribir: depýtat bol, gazet shyǵar, bala oqyt. Ózgemizdiń bári saı bolyp, jalǵyz depýtattyqqa qarap turǵan is joq. Halqyń nadan bolsa, myń depýtatyń bolsyn, onan paıda taǵy joq. Depýtattyqty tańsyq kórip, ataǵyna qyzyǵyp ıakı báseke úshin baratyn kisi bolmasqa kerek. Eki qazaq talasyp bir orysqa jem bolsaq, onan tapqan paıdaǵa túbinde ıe tabylmaı júrmesin.

Osyny árkim eskerse eken. Meni ataǵan jalpyqazaq sezine hám basqalarǵa iltıpat úshin táńir jarylqasyn aıtamyn.

Mirjaqyp DÝLATULY

«Qazaq» gazeti, 1917 jyl, №248

Derekkóz: Dýlatuly M., Alty tomdyq shyǵarmalar jınaǵy.2-tom. - Almaty, 2013 j.

Alash.kz ulttyq portaly

Bul maqala týraly ne oılaısyz?