2015 jyly ál-Farabı atyndaǵy Qazaq ulttyq ýnıversıtetiniń Fılologıa, ádebıettaný jáne álem tilderi fakúltetin bitirip, qazir balalar men jasóspirimderge arnalǵan respýblıkalyq «Aq jelken» jýrnalynyń jaýapty hatshysy qyzmetin atqaryp júr. Balalarǵa arnap jazýdy jaqsy kórgeni shyǵar balalar jýrnalynda qyzmet etip, únemi balalarǵa arnap jazýdan esh jalyqqan emes. Respýblıkalyq «Altyn tobylǵy», «Uly dala» shyǵarmashylyq baıqaýlarynyń júldegeri.
Qazaqstan Jazýshylar odaǵynyń múshesi. 2017 jyly «Úr», 2021 jyly «Hadıa», al ótken jyly «Boıtumar» jyr jınaqtary jaryq kórgen. Negizinen balalarǵa arnap óleńder jazǵanymen arasynda balalarǵa arnap ádebı tanymdyq maqalalar, jumbaqtar da jazyp turady. Máselen búgin balalar nazaryna usynyp otyrǵan elimizdegi qalalar týraly jumbaǵy erekshe. Bir eki sóılemdik jumbaqtar sol qalanyń erekshelikterin ashyp kórsetip, balalardyń elimizdegi qalalar týraly túsinigin erekshe baıyta túsedi. Al «P árpi bar sóz» jáne «Uıat-aı» óleńderi óte jınaqy, balalardyń jattaýyna ońaı jáne kishkentaılardyń túsinigine laıyqtalyp jazylǵan. Balalar úshin eń keregi de osy emes pe?! Endeshe Asylan Tilegenniń erekshe shyǵarmashylyǵyn birge oqıyq!
«P» ÁRPİ BAR SÓZ
Tur muǵalim «kúshinde»,
Suraq qoıar kez keldi:
– Aıtyńdarshy, ishinde,
«P» árpi bar sózderdi.
Qasym birden turdy ushyp,
Ekpindiler, bizdi attaı.
Sol jaq kózin bir qysyp,
«Qazan», – dedi miz baqpaı.
– Qaı jerinde «P»-sy bar?
– dep suraýy sol edi.
Jóni joq-aý qysylar,
«Qaqpaǵynda» degeni.
«UIaT-AI»
Urtynda tur qurt mine,
İship otyr sútti de.
Baýyrsaqqa qol sozdy,
Qysylmaıdy tipti de.
Aırannan da bir jurtty,
Qazyny da qylǵytty.
Bir ýysyn kámpıttiń,
Qaltasyna súńgitti.
Oınaı almaı sekirip,
Júre de almaı ne turyp.
Kótere almaı qarynyn,
Jatyr endi kekirip.
