Atyshýly "Sopylar isi" boıynsha sottalyp, 2018 jyly shartty túrde bosap shyqqan profesor Saıat Ybyraı bul týraly "Qasqa jol" baǵdarlamasynda aıtty.
Suhbat barysynda ol túrmede kórgen qıyndyqtaryn jáne bostandyqqa shyqsa da áli kúnge deıin túrli kedergilerge tap bolyp júrgenin aıtty. Óıtkeni "terrorıst" degen aty qarapaıym qujat rásimdeýde de qıyndyqtar týǵyzady eken.
"Qazatomprom" degen kompanıamen kelisimshart jasasyp jumys istep jatyrmyn. Biraq jumys barysymen qaladan shyǵý degen men úshin úlken másele. İssaparaǵa shyǵý úshin aýdandyq polısıa bólimine baryp túsindiresiń, biraq ruqsat bermeıdi. Óıtkeni meniń terrorıst degen qońyraýym bar. Ózderiniń termıninde "qyzyl ekran" dep atalady. Sebebi men týraly málimetti qaraǵanda, ekrannan terrorıst degen jazý atyp shyǵady. Al olar odan shoshıdy. Ne qujattaryńdy rásimdeı almaısyń, kólik júrgizeıin deseń senimhatty da ala almaısyń. Byltyr memlekettik baǵdarlamamen úı alatyn múmkindik boldy. Biraq oǵan da qol jetkize almadym. Sebebi kez kelgen notarıýs "basymyz ekeý emes" dep maǵan qyzmet kórsetýden bas tartady. Óz atymda úı joq. Osy Almatydaǵy sheshemniń úıinde turyp jatyrmyn. Biraz bedeli bar jigitter kómektesemiz dep ortaǵa túsip kórip edi, olar da túk sheshe almady", — dedi Saıat Ybyraı.
