UQK Shekara akademıasynyń keń saraıdaı sport zalynda ótken halyqaralyq saıys birinshi kúnnen-aq jankúıerlerdiń delebesin qozdyryp áketken. Degenmen, áńgimeni basynan bastaıyq. Qurylǵanyna ústimizdegi jyly týra 30 jyl tolǵan TMD-ǵa múshe elderdiń SHÁQK uıymdastyrǵan doda shekarashylar akademıasynyń áskerı orkestri bastaǵan ónerpazdar ujymy daıyndaǵan shaǵyn konserttik baǵdarlamamen ashyldy. Osylaısha, kúsh synasý úshin shıyrshyq atyp turǵan saıypqyrandar aldymen án tyńdap, rýhanı kúsh alǵan soń birneshe kezeńnen turatyn saıystyń ózine de kezek berilgen.
Sol-aq eken, saıyn dalanyń tósinde erkin kósile shapqan sáıgúlikke aınalyp shyǵa kelgen sportshylardyń arasynda báıgege bergisiz taıtalas bastalǵan. Joq, shý degende, qazaqstandyq qurama komandanyń myqtylyǵy, jeńisti qoldan bermeıtinderi bilinip qalǵan...
Ózi de aıaǵyna deıin solaı boldy. Sondyqtan, toptyń quramyna enip, óz eliniń namysyn qorǵaý úshin aıanyp qalmaǵan ár sportshynyń atyn atap, túsin tústep jatpaıyq. Halyqaralyq deńgeıdegi tóreshiler qazylyq etken saıystyń qalaı ótkenine kóbirek toqtalǵandy jón kórip otyrmyz.
...Aldymen sharshy alańǵa 60 keli salmaqtaǵy sportshylar shaqyryldy. Qazaqstan Respýblıkasy men Tájikstan Respýblıkasynyń qos saıyskerine berilgen ýaqyt – 5 mınýt. Osy ýaqyttyń ishinde biri ekinshisiniń tizesin búgip, jeńiske jetýge tıis. Jetti. Qazaqstandyq óziniń qarsylasyn 12-2 degen eseppen oısyrata jeńip, jankúıerlerdiń «ýralaǵan» daýysy aıǵa jetkendeı boldy...
Ortaǵa ekinshi bolyp shyqqan 75 keli salmaqtaǵy otandasymyzdyń qarsylasy reseılik te jeńilip qana qoıǵan joq. Qoıan-qoltyq urysynyń sheberinen alǵan surapyl soqqydan keıin kópke deıin esin jınaı almaı jatty.
Ortaǵa shyqqan 85 keli salmaqtaǵy saıyskerlerdiń shaıqasy da qazaqstandyq qurama komandasynyń paıdasyna sheshildi. Tipti, tájik shekarashylarynyń namysyn qorǵaý úshin alystan at aryltyp jetken sportshylardyń biri aınaldyrǵan 30 sekýndtyń ishinde nokaýt alyp, kilemniń ústinde sulap jatty... Esep 4-0: jeńis qazaqstandyq sportshynyń qanjyǵasyna baılandy.
Tájik Respýblıkasynyń 90 keli salmaqtaǵy sportshysyn 10-0 eseppen jerlesimiz jeńip ketkeni de jankúıerlerge ólsheýsiz qýanysh syılaǵany anyq.
Reseı Federasıasy men Tájikstan Respýblıkasynyń atynan shyqqan komanda músheleriniń taıtalasy da 1 mınýt 11 sekýntqa sozylyp, jeńis reseılikke buıyrdy.
Sóıtip, qara shańyraq qazaqstandyq saıypqyrandarǵa kúsh bergendeı, bizdiń qurama komanda saıystyń alǵashqy kúnin jeńispen aıaqtady.
... Ekinshi kún de taǵy bir nokaýtpen «este» qalatyn sekildi. Qoıan-qoltyq urysynyń talaby da sol emes pe, dál tıgen soqqy reseılikti qarsylasynyń aldynda tize búktirdi...
Mine, osyndaı soqqylardyń arasynda keıbir sportshylarǵa medısına qyzmetkeriniń kómegine júginýge týra keledi. Laıyqty baǵasyn berý kerek, UQK Shekara akademıasy áskerı-medısınalyq bóliminiń dárigeri medısına qyzmetiniń aǵa leıtenanty Rýslan Narynov jaraqat alýshylarǵa shuǵyl ári sapaly alǵashqy medısınalyq kómek kórsetip úlgerip jatty.
Chempıonat ta aıaqtalyp, komandalardyń jınaǵan upaılaryn esepteıtin mańyzdy sát týdy. Sondyqtan, berilgen úzilisti paıdalanyp, biz búgingi alamannyń bas tóreshisi QR UQK Jaýyngerlik daıyndyq basqarmasynyń bastyǵy u.q. polkovnıgi A.Kenjebaevty sózge tartqan edik.
– Halyqaralyq deńgeıdegi saıysty óte tartysty ótti dep aıta alamyn, - deıdi Arman Qarjaýbaıuly. Qatysýshylardyń barlyǵy derlik «Halyqaralyq sport sheberi» «Sport sheberi», «Sport sheberligine úmitkerler». Sondyqtan, Reseı, Tájikstannan kil myqtylar ǵana kelgenin bilýge bolady. Áıtse de, men Qazaqstan Respýblıkasynyń shekarashylary atynan shyqqan sportshylardyń ónerine tánti bolǵanymdy jasyrmaımyn. Bizdiń qurama komandanyń birde-bir múshesi jeńilis tapqan joq. Kerisinshe, qarsylastaryn oısyrata jeńip otyrdy.
...Aqyry úzilis aıaqtalyp, jeńimpazdardy marapattaýǵa kezek berildi. elimizdiń namysyn qorǵaǵan maıtalmandar: S.Esengeldın, M.Jumaǵulov, A.Sherbaev, B.Bektemisov, Q.Úmbetqulov, R.Mádı, B.Demeı, B.Jubanyshtar TMD SHÁQK Tóraǵasynyń gramotasymen jáne baǵaly syılyqtarymen marapattaldy. Oryn alǵan komanda múshelerine TMD SHÁQK Tóraǵasynyń orynbasary general-leıtenant A.Býerov bastaǵan mártebeli qonaqtar saltanatty jaǵdaıda tabys etti.
Sóıtip, İ-oryndy Qazaqstan Respýblıkasynyń qurama komandasy jeńip aldy. Júldeli ekinshi orynǵa Reseı Federasıasynyń sport komandasy kóterilse, úshinshi oryn – Tájikstan Respýblıkasynyń qurama komandasyna buıyrdy.
Sharshy alańnyń «shańyn» qaqqan jeńimpazdardy jeńisterimen quttyqtaımyz!
Jýrnalıs T.DÁÝLETBAEVA, «OS-CHR».
Sýretterdi túsirgen J.JABYRBEKOV.
SHQA baspasóz hatshysy.
