«پرەزيدەنتتىڭ اۋىرلاتاتىن ءمان-جاي بولماعاندا جازانى جەڭىلدەتۋ تۋرالى تاپسىرماسىنا سايكەس ءبىراز جۇمىس اتقارىلدى. جالپى سوتتا قاڭتار وقيعاسىنا قاتىستى 9213 اكىمشىلىك ءىس قارالدى. سوت شەشىمىنە سايكەس ءمان-جايدىڭ جەڭىلدىگىن ەسكەرە وتىرىپ 4561 تۇلعاعا ەسكەرتۋ جاسالدى، پروكۋرورلاردىڭ ءوتىنىش-حاتىنىڭ نەگىزىندە 1083 ادام قاماۋدان بوساتىلىپ، 490 ايىپپۇل جازاسى ەسكەرتۋگە اۋىستىرىلدى. قازىرگى ۋاقىتتا 362 ادام اكىمشىلىك قاماۋعا الىنىپ، 1245 تۇلعاعا ايىپپۇل سالىندى»، – دەدى ەلدوس قيلىمجانوۆ.
سونداياق ول قاڭتار وقيعاسىنا قاتىستى وزگە دە دەرەكتەردى ايتتى.
«پروكۋرورلار الماتى قالاسىنىڭ ۋاقىتشا ۇستاۋ يزولياتورىن تەكسەرۋ كەزىندە دەنە جاراقاتى بار 73 ادامدى انىقتادى. ونىڭ ىشىندە ۇشەۋىنە قاتىستى بۇلتارتپاۋ شاراسى وزگەرتىلدى، ولار ءقازىر بوستاندىقتا.
ءبىزدىڭ نۇسقاۋمەن ۇستالعانداردىڭ اراسىندا وق جاراقاتىن العان 29 ادام قالالىق اۋرۋحاناعا جاتقىزىلدى. قاماۋعا الىنىپ، جاراقات العان 41 ادام تىكەلەي يزولياتوردا ەم الۋدا. قاتىگەزدىكپەن قاراۋ، سونداي-اق مەديسينالىق كومەكتى كورسەتپەۋ جاعدايلارىن تاۋەلسىز تەكسەرۋ ماقساتىندا ادام قۇقىقتارى جونىندەگى ۋاكىل جانە باسقا دا ادام قۇقىعىن قورعاۋ ۇيىمدارىنا ۇستاۋ مەكەمەلەرىنە كىرۋگە رۇقسات بەرىلدى»، – دەدى باس پروكۋراتۋرانىڭ ءبىرىنشى قىزمەت باستىعىنىڭ ورىنباسارى ەلدوس قيلىمجانوۆ.
