ءتىرى بولسام، قازاققا قىزمەت ەتپەي قويمايمىن!

ءاليحان بوكەيحان

تۇركىستان وبلىسىندا شەنەۋنىك ءجۋرناليستى ءولتىرتۋ ءۇشىن 5 ملن تەڭگەگە كيللەر جالداعان

22 قاڭتار 2022 177



تۇركىستان وبلىسىنىڭ پوليسەيلەرى ادام ولتىرۋگە وقتالۋ قىلمىسىن اشتى

تۇركىستان وبلىسىندا شەنەۋنىك ءجۋرناليستى ءولتىرتۋ ءۇشىن 5 ملن تەڭگەگە كيللەر جالداعانى انىقتالدى، دەپ حابارلايدى Alash.press باسىلىمى Azattyq Rýhy-نا سىلەمە جاساپ.

وسى جىلدىڭ 3 قاڭتارىندا الەۋمەتتىك جەلىلەر مەن باق-تا سارىاعاش اۋدانىنداعى بەلگىلى ءجۋرناليستىڭ ۇيىنە شابۋىل جاسالىپ، ونىڭ بالاسى جاراقات العانى تۋرالى اقپارات تاراعان بولاتىن.
«سول كۇنى پوليسيا قىزمەتكەرلەرى بۇل جايتتى اۋداندىق پوليسيا بولىمىندە تىركەپ، ق ر قك 24-99-باپتارى «ادام ولتىرۋگە وقتالۋ» بويىنشا سوتقا دەيىنگى تەرگەۋدى باستادى. وبلىستىق پوليسيانىڭ ۇزدىك جەدەل ۋاكىلدەرى مەن تەرگەۋشىلەرى اۋىر قىلمىستى اشۋعا باعىتتالدى»، - دەلىنگەن وبلىستىق پد حابارلاماسىندا.



جاسالعان قىلمىس تۋرالى اقپاراتتى العان سوڭ، بىردەن سارىاعاش اۋدانىنداعى قىلمىس ورنىنا مەنىڭ جەدەل قىزمەت جونىندەگى ورىنباسارىم قۇرمانبەك ساحوۆ باستاعان كريمينالدىق پوليسيانىڭ كاسىبي قىزمەتكەرلەرى مەن تەرگەۋشىلەر توبى جىبەرىلدى.
«ولار كەلگەن بويدا بەلگىسىز بىرەۋلەردىڭ ءجۋرناليستىڭ ۇيىنە اۆتوكولىكپەن بارىپ، تەرەزەدەن وق اتىپ، قاشىپ كەتكەندەرىن انىقتادى. ناتيجەسىندە ءۇي يەسىنىڭ ۇلى جاراقات العان. قىلمىستى اشۋدا ءبىز ءبىرقاتار نۇسقالاردى نەگىزگە الدىق، ونىڭ ءبىرى ءجۋرناليستىڭ كاسىبي قىزمەتىنە بايلانىستى وسى قىلمىستىڭ جاسالۋى مۇمكىن ەكەنى. كەيىننەن ءدال وسى نۇسقامىز راستالدى. بۇل قىلمىستى ءىزىن سۋىتپاي اشۋدا وقيعا ورىن العان ۋاقىتتا كۋالەردىڭ بولماۋى دا وزىندىك قيىندىق تۋعىزدى.

دەسە دە جەدەل-ىزدەستىرۋ ءىس-شارالارىن جۇرگىزۋ بارىسىندا وسى وقيعاعا قاتىسى بار شىمكەنت قالاسىنىڭ ەكى جاس تۇرعىنى تۇرعىلىقتى جەرى بويىنشا ۇستالدى. ولار وق اتىپ، وقيعا ورنىنان قاشىپ كەتكەن. سودان كەيىن پوليسيا قىزمەتكەرلەرى دەلدالدار مەن قىلمىستى تاپسىرىس بەرۋشىلەرگە شىقتى. بۇگىنگى تاڭدا ءبىز وسى قىلمىسقا قاتىسى بار 5 كۇدىكتىنى ۇستادىق. زاتتاي ايعاق رەتىندە ولاردان ۆاز (2107/21110) ماركالى 2 اۆتوكولىك تاركىلەندى. قىلمىستى ورىنداۋشىلار بۇل اۆتوكولىكتەردى قىلمىستى جاساعاندارى ءۇشىن العان اقشاعا ساتىپ العان. سونداي-اق ولاردان 16 كاليبرلى پاتروندار الىندى»، - دەدى تۇركىستان وبلىسى پد باستىعى پوليسيا گەنەرال-مايورى قايرات دالبەكوۆ.



قازىرگى ۋاقىتتا سارىاعاش اۋدانى تۇرعىندارىنىڭ ءبىرى، ياعني شەنەۋنىكتىڭ وسى قىلمىسقا تاپسىرىس بەرگەنى انىقتالدى. ول ءجۋرناليستىڭ ءومىرىن 5 000 000 تەڭگەگە باعالاعان.

ءوز كەزەگىندە ورىنداۋشىلار ىزدەرىن جاسىرۋ ماقساتىندا تاپسىرىستى ورىنداپ، سارىاعاش اۋدانىنان شارداراعا، سودان سوڭ ارىس ارقىلى شىمكەنتكە جەتكەن.
«ءقازىر تەرگەۋ توبى ءتيىستى تەرگەۋ امالدارىن جۇرگىزۋدە. وسى قىلمىستىق ءىس اياسىندا قاجەتتى پروسەسسۋالدىق ارەكەتتەر ىسكە اسىرىلۋدا. سوتقا دەيىنگى تەرگەۋ بارىسىندا قىلمىستىڭ سەبەپتەرى مەن بارلىق ءمان-جايلارى انىقتالاتىن بولادى. سوت ولاردى قاماۋعا الۋعا سانكسيا بەرىپ، كۇدىكتىلەر ۋاقىتشا ۇستاۋ يزولياتورىنا قامالدى»، - دەپ قورىتىندىلادى دەپارتامەنت باستىعى ق.دالبەكوۆ.


بۇل ماقالا تۋرالى نە ويلايسىز؟