ءتىرى بولسام، قازاققا قىزمەت ەتپەي قويمايمىن!

ءاليحان بوكەيحان

جاستاردى شىڭدايتىن دودا

12 قازان 2022 52
الماتى وبلىسى، تالعار قالاسىندا گرەك-ريم كۇرەسىنەن 20 جاسقا دەيىنگى جاستار اراسىندا تۋرنير ءوتتى. كسرو سپورت شەبەرى، گرەك-ريم كۇرەسىنەن ەل نامىسىن ابرويمەن قورعاپ، ۇلتتىق قۇراما ساپىندا الەمدىك دودالاردجى ولجا سالعان ەسەنجول اليمانوۆتى ەسكە الۋعا ارنالعان تۋرنير  وسىمەن ەكىنشى مارتە  ۇيىمداستىرىلىپ وتىر.



بىلتىر جالاۋىن جەلبىرەتكەن اشىق چەمپيوناتقا ەلىمىزدىڭ ءار وڭىرىنەن  بالۋاندار قاتىسىپ باقتارىن سىناعان بولاتىن. بيىل دودانىڭ اياسى كەڭىپ، كورشى قىرعىز ەلىنەن دە بالعىن بالۋاندار كەلىپ بەلدەسۋگە ءتۇستى. بەيجىڭ وليمپياداسىنىڭ كۇمىس جۇلدەگەرى نۇرباقىت تەڭىزبايەۆ  باسقاراتىن  الماتى وبلىستىق دەنە تاربيەسى جانە سپورت باسقارماسى ءھام  گرەك-ريم، ەركىن جانە ايەلدەر كۇرەسى بويىنشا الماتى وبلىستىق فەدەراسياسىنىڭ  مۇرىندىق بولۋىمەن وتكەن ءداستۇرلى تۋرنيردە چەمپيون اتانعان بالۋاندارعا «سپورت شەبەرلىگىنە ۇمىتكەر» اتاعى بەرىلدى. جەڭىمپازدار مەن جۇلدەگەرلەر ارانيى كۋبوك، مەدالعا قوسا قارجىلاي سىياقىعا دا يە بولدى.

جەتكىنشەك بالۋانداردىڭ  دوداسىن گرەك-ريم كۇرەسىنەن الەم چەمپيوناتىنىڭ جۇلدەگەرلەرى المات كەبىسبايەۆ، دەمەۋ جادرايەۆ، قورلان جاقانشا،  دامير كۇزەمبايەۆ سىندى داڭقتى بالۋاندار ارنايى كەلىپ تاماشالادى. ءتۋرنيردىڭ اشىلۋ سالتاناتىندا سەۋل وليمپياداسىنىڭ كۇمىس جۇلدەگەرى، قازاقستان كۇرەس تۇرلەرى  فەدەراسياسىنىڭ پرەزيدەنتى ايگىلى بالۋان داۋلەت تۇرلىحانوۆ،  «ەر – نامىسى» قوعامدىق بىرلەستىگىنىڭ ءتوراعاسى ەربولات اليادين، «سپورت جۇلدىزدارى» جۋرنالىنىڭ شەف-رەداكتورى جاندوس ايانبەك ءسوز الىپ، جاس بالۋاندارعا  ساتتىلىك تىلەدى. 2003-2005 جىلى تۋعان جاستار اراسىندا وتكەن ەكى كۇندىك  تۋرنيردە بالۋاندار 10 سالماق دارەجەسىندە كۇرەسكە ءتۇستى. قوعامدىق بىرلەستىك ءتوراعاسى وزدەرىنىڭ ۇيىمى اتىنان داۋلەت تۇرلىحانوۆقا «ۇلى دالا باتىرى» وردەنىن تاعىپ ماراپاتتاسا،  جاندوس ايانبەك قىرعىز ەلىنەن كەلگەن باپكەرلەردىڭ كەۋدەسىنە  «درۋجبا نارودوۆ كازاحستانا» وردەنىن بەرىپ  قۇرمەتىن كورسەتتى.



«ءبىز بۇل ءتۋرنيردى كەلەشەكتە ءداستۇرلى تۇردە وتكىزىپ،  ەلىمىزدىڭ سپورتتىق جارىستارىنىڭ كۇنتىزبەلىك جوسپارىنا ەنگىزسەك دەيمىز. اتامىز ءوزىنىڭ تۋىپ-وسكەن ولكەسى اقتوبە وبلىسىنان شىققان تۇڭعىش كسرو سپورت شەبەرى. امال قانشا، 2019 جىلى 79 جاسىندا ومىردەن وزدى. ول كىسىنىڭ قازاق سپورتىنا سىڭىرگەن ەڭبەگى ەلدىڭ ەسىندە ساقتالادى قاشاندا.  بيىلعى تۋرنيرگە قىرعىز ەلىنەن بالۋاندار  كەلسە، كەلەسى جىلى رەسەي، بەلارۋس، وزبەكستان ەلدەرىنەن دە بالۋاندار شاقىرساق دەيمىز. جىل وتكەن سايىن بۇل ءتۋرنيردىڭ اۋقىمى كەڭەيە تۇسەدى» دەيدى دودانىڭ باستى ۇيىمداستىرۋشىسى، كاسىپكەر، تالعار اۋداندىق ءماسليحاتىنىڭ دەپۋتاتى مارات اليمانوۆ.

تالعار تورىندە ەكى كۇنگە سوزىلعان تۋرنير جاس بالۋاندارىمىز ءۇشىن وراسان تاجىريبە الاڭى بولعانى انىق،  ويتكەنى «بولات قايناۋدا شىنىعادى» قاشاندا. كەلەشەكتە ەسەنجول اليمانوۆ تۋرنيرىندە چەمپيون بولعان بالالار وليمپيادا شىڭىندا قول بۇلعاۋى ابدەن مۇمكىن. سوندىقتاندا  مۇنداي تۋرنيرلەردىڭ ءجيى  ۇيىمداستىرىلعانى قۇپتارلىق ءىس.

قۋانىش ەسىمباي،

تالعار قالاسى.          

    

 
بۇل ماقالا تۋرالى نە ويلايسىز؟