قىزىلوردا وبلىسى،توڭكەرىس اۋىلىنداعى 9-سىنىپتىڭ وقۋشىسى ەراسىل تورەبايدىڭ بالالاردان تاياق جەگەن سوڭ كوز جۇمعانى ايتىلدى. بالانىڭ اناسى تەلەارناعا سۇحبات بەرىپ، وقيعانى بايانداپ بەرگەن، دەپ حابارلايدى Alash.KZ ۇلتتىق پورتالى.
ەراسىل تورەبايدىڭ اناسى ساۋلە جاقسىلىقوۆا سول كۇنى بولعان وقيعانى بايانداپ بەردى.
«ينفورمبيۋرو» باعدارلاماسىنا سۇحبات بەرگەن ساۋلە جاقسىلىقوۆا بالاسى دەمالىس كۇنى كەشكە دوستارىنا بارامىن دەپ ۇيىنەن شىعىپ كەتكەن. سول كەشتە جوعارى سىنىپتاعى وقۋشىلار وزدەرىنەن كىشى بالالاردى جيناپ الىپ، ابدەن ۇرىپ-سوققان دەيدى.
«بالالاردىڭ ءبارىن قاتارىنان تۇرعىزىپ قويىپ ۇرعان ەكەن. سوندا بالام «ۇرماڭدارشى، مەنىڭ دەنساۋلىعىم جوق، ۇرماڭدارشى» دەگەن. سونى ءبىلىپ تۇرىپ، سونى ەستي وتىرىپ، ۇرعان عوي»، - دەيدى جانارى جاسقا تولعان ساۋلە جاقسىلىقوۆا.
قىزىلوردا وبلىسى پوليسيا دەپارتامەنتىنىڭ باسپا ءسوز قىزمەتى ەراسىل تورەبايدىڭ ولىمىنە قاتىستى ەكى وقۋشىنى قاماۋعا العان.
