شەشەنستان باسشىسى رامزان قادىروۆتىڭ كييەۆ ماڭىندا ەكەنى راستالسا، ۋكراينا قارۋلى كۇشتەرى ونى كوزىن جويۋعا بۇيرىق بەرىلەدى.
بۇل تۋرالى 13 ناۋرىزدا ۇلتتىق تەلەمارافوننىڭ ەفيرىندە ۋكراينا پرەزيدەنتى كەڭسەسى باسشىسىنىڭ كەڭەسشىسى الەكسەي ارەستوۆيچ مالىمدەدى.
13 ناۋرىزدا جەلىدە شەشەنستان مەملەكەتتىك ارناسى گروزنىي جاريالاعان ۆيدەو پايدا بولدى: «شەشەنستان رەسپۋبليكاسىنىڭ باسشىسى رامزان قادىروۆ ارنايى اسكەري وپەراسياعا قاتىسقان جاۋىنگەرلەرمەن بىرگە ۋكراينادا».
بەينە سۇحباتتا قول استىنداعى قىزمەتكەر كييەۆتەن 7 شاقىرىم جەردەگى بالالار ءۇيىن باسىپ الۋ وپەراسياسى تۋرالى حابارلايدى. ۆيدەو ناقتى قاي جەردە جانە قاشان بەلگىسىز قاراڭعى جەرتولەدە تۇسىرىلگەن.
– ءقازىر اقپاراتتىڭ دۇرىس-بۇرىس ەمەستىگى تەكسەرىلىپ جاتىر. ءبىراق ونى كەشە گروزنىيدا كورگەنى تۋرالى اقپارات بار. ءبىراق ءبىر كۇندە كييەۆتىڭ جانىنان كەلۋگە بولادى. سوعان قاراماستان ونىڭ سىرتقى ءتۇرى ەشتەڭەنى شەشپەيدى. اقپارات راس بولسا، ءبىز ونى جويامىز.ەگەر اقپاراتتى انىقتاماساق، كەلەسى جولى جويامىز، – دەدى ارەستوۆيچ.
Kadyrov_95 Telegram-ارناسى «ەگەر قادىروۆ شىنىمەن دە كييەۆتىڭ جانىندا بولسا، ۋكراينا قارۋلى كۇشتەرى ونى جويادى – ارەستوۆيچ» دەگەن تاقىرىپتى قايتا جاريالاپ، «نەگە «ەگەر» دەيدى؟ ۆيدەونى كورمەدىڭ بە، الدە ەسىگىڭدى قاعۋىم كەرەك پە؟» دەلىنگەن حابارلامادا.
ءوز كەزەگىندە ارەستوۆيچ بۇل ۇسىنىسقا Facebook جەلىسىندە: «ال، قاعىپ كورسىن» دەپ جازدى.
ەسكە سالساق، رەسەي پرەزيدەنتى ۆلاديمير پۋتين دونباس رەسپۋبليكالارى باسشىلارىنىڭ ۇندەۋىنە جاۋاپ رەتىندە ارنايى اسكەري وپەراسيا جۇرگىزۋ تۋرالى شەشىم قابىلداپ، ۋكرايناعا قارسى سوعىس جاريالادى. الايدا رەسەي باسشىسى ماسكەۋدىڭ جوسپارىندا ۋكراينا اۋماقتارىن باسىپ الۋ جوق ەكەنىن ايتقان بولاتىن.
2 ناۋرىز كۇنى تاڭەرتەڭگى جاعداي بويىنشا رەسەي اسكەرى 5840 ادامنان ايىرىلدى. سونداي-اق 60-تان استام ۇشاق پەن تىكۇشاق، 862 برونەترانسپورتەر، 85 ارتيللەريالىق جۇيە جانە باسقا دا كوپتەگەن تەحنيكا جويىلدى. 28 اقپانداعى جاعداي بويىنشا 352 بەيبىت تۇرعىن، ونىڭ ىشىندە 16 بالا قازا تاۋىپ، 2040 ادام جاراقات الدى.
ۋكراينا پرەزيدەنتى ۆلاديمير زەلەنسكيي رەسەي اسكەرىنىڭ شابۋىلدىڭ العاشقى ساعاتتارىنان باستاپ ازاماتتىق ينفراقۇرىلىمعا سوققى بەرىپ جاتقانىن ايتتى. پرەزيدەنتتىڭ ايتۋىنشا، رەسەي باسقىنشى اسكەرلەرىنىڭ ۋكرايناداعى ارەكەتتەرىندە گەنوسيد بەلگىلەرى بار.
27 اقپاندا ۋكراينا «باسقىنشىلىقتى اقتاۋ ءۇشىن گەنوسيد ۇعىمىن بۇرمالاعانى ءۇشىن رەسەيدى جاۋاپقا تارتۋدى» تالاپ ەتىپ، حالىقارالىق سوتقا رەسەيگە قارسى شاعىم ءتۇسىردى. رەسەيدىڭ ۋكرايناعا باسىپ كىرۋىنە قاتىستى تەرگەۋدى حالىقارالىق قىلمىستىق سوتتىڭ پروكۋرورى كارىم حاننىڭ ءوزى باستادى.
دەرەككوز
