امەريكالىق باسىلىمداردىڭ دەرەككوزدەرى ماسكەۋ ۋكراينامەن سوعىس باستالعاننان بەرى بەيجىڭنەن اسكەري تەحنيكا مەن باسقا دا كومەك سۇرايدى دەپ مالىمدەيدى.
Financial Times باسىلىمى رەسەيدە سوعىستىڭ ءۇشىنشى اپتاسىنا قاراي قارۋدىڭ كەيبىر تۇرلەرى ءبىتىپ جاتقانىن حابارلايدى. ال CNN امەريكالىق جوعارى لاۋازىمدى شەنەۋنىككە سىلتەمە جاساپ، رەسەي قىتايعا ۋكرايناداعى جاعدايعا اسكەري كومەك، سونىڭ ىشىندە ۇشقىشسىز ۇشۋ اپپاراتىن ۇسىنۋدى سۇرادى دەگەن اقپارات تاراتقان.
قىتايدىڭ اقش-تاعى ەلشىلىگىنىڭ وكىلى ليۋ پەنيۋ ءوز كەزەگىندە Reuters-كە رەسەيدىڭ مۇنداي وتىنىشتەرى تۋرالى ەشتەڭە بىلمەيتىنىن جانە جۇڭگو ءۇشىن باستى مىندەت ۋكرايناداعى شيەلەنىستى جاعدايدىڭ ۋشىعۋىنىڭ الدىن الۋ ەكەنىن ايتتى.
13 ناۋرىزدا اقش پرەزيدەنتىنىڭ ۇلتتىق قاۋىپسىزدىك جونىندەگى كەڭەسشىسى دجەيك سالليۆان جۇڭگو رەسەيگە باتىس سانكسيالارى ەسەبىنەن شىعىنداردى وتەۋگە كومەكتەسۋگە تىرىسسا، بەيجىڭگە كەرى اسەرىن تيگىزەدى دەپ ەسكەرتتى.
"ءبىز قىتايدىڭ رەسەيگە قانداي دارەجەدە ماتەريالدىق جانە ەكونوميكالىق قولداۋ كورسەتەتىنىن مۇقيات قاداعالايمىز. بەيجىڭگە كەز كەلگەن ەلدىڭ رەسەيگە ەكونوميكالىق شىعىندارىن وتەۋگە تىرىسۋىنا جول بەرمەيتىنىمىزدى جەتكىزدىك"، – دەدى سالليۆان CNN-گە بەرگەن سۇحباتىندا.
