ءتىرى بولسام، قازاققا قىزمەت ەتپەي قويمايمىن!

ءاليحان بوكەيحان

تۇلەكتەردىڭ 80 پايىزعا جۋىعى ۇبت-نى قازاق تىلىندە تاپسىرعان

06 اقپان 2024 52
ق ر عىلىم جانە جوعارى ءبىلىم مينيسترلىگى قاڭتار ايىندا ۇبت باستالعاننان بەرى 96 مىڭعا جۋىق ادام تەست تاپسىرعانىن حابارلادى.

ونىڭ ىشىندە تالاپكەرلەردىڭ 77،4% – ى قازاق تىلىندە، 22،5% - ى ورىس تىلىندە، 57 تالاپكەر اعىلشىن تىلىندە تەستىلەۋدەن وتكەن.

ۇبت باستالعالى شەكتى بالدى 77%-عا جۋىق تالاپكەر جينادى. ورتاشا بال 68 بالدى قۇرادى.

تەستكە قاتىسۋشىلاردىڭ باسىم بولىگى «بيولوگيا-حيميا» كومبيناسيالارىن تاڭداعان، ناقتىسىندا، 18%-ى تاپسىردى. «ماتەماتيكا-فيزيكا» پاندەرىن 17% تاڭداعان. سونداي-اق، توپ-3 قاتارىنا تالاپكەرلەردىڭ 12% تاڭداعان «ماتەماتيكا-ينفورماتيكا» كومبيناسياسى كىردى. ەڭ از تاڭدالعان كومبيناسيا – «حيميا-فيزيكا»، ونى 108 ادام تاپسىرعان.
«ءۇش اپتانىڭ قورىتىندىسى بويىنشا ەڭ جوعارى بالل – 136. جالپى، ەلىمىز بويىنشا 56 تەستكە قاتىسۋشى 130 بالدان جوعارى جينادى. ايتا كەتەيىك، 2024 جىلعى ۇبت اياقتالعاننان كەيىن كۇنتىزبەلىك جىلدىڭ 31 قازانىنا دەيىن تەستىلەۋدىڭ بەينەجازبالارىنا تالداۋ جۇرگىزىلەدى. تىيىم سالىنعان زاتتاردى پايدالانۋ نەمەسە ەرەجەلەردى بۇزۋ فاكتىلەرى انىقتالعان جاعدايدا ءتۇسۋشىنىڭ ۇبت ناتيجەلەرى جويىلادى»، - دەپ اتاپ ءوتتى ق ر عجبم ۇلتتىق تەستىلەۋ ورتالىعىنىڭ ديرەكتورى رۋسلان ەمەلبايەۆ.

ەرەكشە ءبىلىم بەرۋ قاجەتتىلىكتەرى بار وقۋعا تۇسۋشىلەر ءۇشىن قولايلى جاعداي جاساۋدىڭ ارقاسىندا ۇبت-عا ءۇش اپتادا 242 تالاپكەر قاتىسقانىن ايتا كەتكەن ءجون.

بۇگىنگى تاڭدا 118 ەرەجە بۇزۋشىلىق انىقتالعان. ونىڭ ىشىندە 79 تالاپكەر سمارتفون، شپارگالكا جانە باسقا دا تىيىم سالىنعان زاتتاردى الىپ ءوتۋ ارەكەتى سالدارىنان تەست تاپسىرۋ مۇمكىندىگىنەن ايىرىلدى. تەستىلەۋ كەزىندە ەرەجەلەردى بۇزعانى ءۇشىن اۋديتوريادان 39 ادام شىعارىلىپ، ولاردىڭ ناتيجەلەرى جويىلدى. بوگدە تۇلعالار انىقتالعان جوق.

تالاپكەرلەر تەستىلەۋ اياقتالعاننان كەيىن 30 مينۋت ىشىندە اپەللياسياعا بەرە الادى. سەرتيفيكات اپەللياسيا تۋرالى شەشىم قابىلدانعاننان كەيىن تەستىلەنۋشىنىڭ جەكە كابينەتىندە قولجەتىمدى بولادى.

فوتو: pavlodarnews.kz
بۇل ماقالا تۋرالى نە ويلايسىز؟