2 ناۋرىزدا قازاقستان پرەزيدەنتى قاسىم-جومارت توقايەۆ پەن ۋكراينا باسشىسى ۆلاديمير زەلەنسكيي تەلەفون ارقىلى سويلەستى.
اقوردا سايتىنىڭ جازۋىنشا، تەلەفون اڭگىمە ۋكراينا تارابىنىڭ باستاماسىمەن جۇرگىزىلگەن.
"تاراپتار ۋكراينا توڭىرەگىندەگى احۋال بويىنشا پىكىر الماستى. قاسىم-جومارت توقايەۆ ۋكرايناداعى اسكەري ءىس-قيمىلداردى توقتاتۋ جانە ودان ءارى بولدىرماۋ ءۇشىن كەلىسسوزدەر بارىسىندا ۋاعدالاستىققا قول جەتكىزۋدىڭ ماڭىزدى ەكەنىن ايتتى. مەملەكەتتەر باسشىلارى ەكى ەلدىڭ گۋمانيتارلىق سالاداعى ىنتىماقتاستىعىن ودان ءارى دامىتۋعا كەلىستى" دەپ جازىلعان اقوردا تاراتقان قىسقا حابارلامادا.
ۆلاديمير زەلەنسكيي سوزىنە سۇيەنگەن ۋكراينا اقپارات قۇرالدارىنىڭ جازۋىنشا، ول توقايەۆپەن بىرگە "ايماقتاعى قاۋىپسىزدىك" ماسەلەسىن تالقىلاعان. ەكى باسشى "گۋمانيتارلىق ماسەلەلەر بويىنشا ىنتىماقتاستىق ورناتۋعا كەلىسكەن".
"ءارى قاراي دا بايلانىستا بولامىز" دەگەن زەلەنسكيي.
اقوردا مۇنىڭ الدىندا قاسىم-جومارت توقايەۆتىڭ رەسەي باسشىسى ۆلاديمير پۋتينمەن سويلەسكەنىن حابارلاعان. توقايەۆ پۋتينگە ۋكراينا توڭىرەگىندەگى احۋال بويىنشا "ورتاق كەلىسىمگە قول جەتكىزۋدىڭ اسا ماڭىزدى ەكەنىن" اتاپ وتكەن.
- ۋكراينا شىعىسىنداعى سەپاراتيستىك قۇرىلىمداردىڭ "تاۋەلسىزدىگىن" مويىنداعان رەسەي 24 اقپاندا ۋكرايناعا باسىپ كىرىپ، ەلدى مەكەندەرىن اتقىلاپ، بومبالاي باستاعان. ۆلاديمير پۋتين ونى "دەميليتاريزاسيا جانە دەناسيفيكاسيالاۋعا" باعىتتالعان "ارنايى اسكەري وپەراسيا" دەپ اتاعان. ماسكەۋ ۋكراينانىڭ تەك اسكەري ينفراقۇرىلىمىنا عانا "شابىلۋىلدايتىنىن" ايتقانمەن ءىس جۇزىندە ازاماتتىق نىساندار دا قيرادى، بەيبىت ازاماتتار وپات بولدى.
- كييەۆ پەن باتىس ەلدەرى وقيعانى سوعىس دەپ اتاپ، رەسەي اگرەسسياسىن ايىپتادى. ەۋروپا ەلدەرى، اقش، كانادا، جاپونيا ماسكەۋگە سانكسيا سالدى.
- رەسەي وداقتاسى ءارى ەكونوميكالىق تۇرعىدا سولتۇستىكتەگى كورشىسىنە تاۋەلدى قازاقستان وسى اپتاعا دەيىن ۇنسىزدىك تانىتىپ كەلگەن. 1 ناۋرىزدا باسقارۋشى پارتيانىڭ سەزىندە پرەزيدەنت قاسىم-جومارت توقايەۆ نۇر-سۇلتان "ەۋرازيالىق قاۋىپسىزدىكتىڭ اجىراماس پرينسيپىنەن" اينىمايدى دەپ مالىمدەدى. ول كييەۆ پەن ماسكەۋدى كەلىسسوز ارقىلى ءتىل تابىسۋعا شاقىرىپ، قاجەت بولسا ارااعايىن بولۋعا دا دايىن ەكەنىن جەتكىزدى.
