گرۋزيا ەۋرووداققا قوسىلۋعا ءوتىنىشتى 3 ناۋرىزدا تاپسىرۋدى جوسپارلاپ وتىر. رەسەي باسقىنشىلىعىنا ۇشىراعان ۋكراينا وسى اپتادا ەۋرووداققا قوسىلۋعا ءوتىنىش ءبىلدىرىپ، ەۋروپارلامەنت ۋكرايناعا ۇمىتكەر مەملەكەت دەگەن مارتەبە بەرۋ جونىندەگى رەزوليۋسيانى قولداعان.
باسقارۋشى "گرۋزين ارمانى" پارتياسىنىڭ ءتوراعاسى يراكلي كوباحيدزە 2 ناۋرىز كۇنگى باسپا ءسوز ءماسليحاتى كەزىندە پارتيانىڭ "گرۋزيا ەۋرووداققا قوسىلۋعا ءوتىنىشتى دەرەۋ تاپسىرۋ قاجەت" دەگەن ۇيعارىمعا كەلگەنىن ايتتى.
باستاپقىدا گرۋزيا ءوتىنىشتى 2024 جىلى تاپسىرۋدى جوسپارلاعان، ءبىراق سوڭعى جاعدايعا بايلانىستى ءوتىنىش تاپسىرۋ كەزەڭىن جەدەلدەتۋدى ۇيعارعان.
2 ناۋرىزدا ۋكراينا پرەزيدەنتى ۆلاديمير زەلەنسكيي ەۋروپا كەڭەسىنىڭ جەتەكشىسى شارل ميشەلمەن تەلەفون ارقىلى سويلەسىپ، ۋكرايناداعى احۋال مەن ديپلوماتيالىق ءىس-قيمىلداردى تالقىلاعانىن مالىمدەگەن. كييەۆ "ۋكراينانى ەو-عا مۇشەلىككە قابىلداۋ ماسەلەسىندە جاقسى جاڭالىق كۇتىپ وتىر" دەدى زەلەنسكيي.
ۋكراينا سىرتقى ىستەر ءمينيسترى دميتريي كۋلەبانىڭ ايتۋىنشا، كييەۆ وداققا قوسىلۋ بويىنشا قۇجاتتاردى نەعۇرلىم تەزىرەك اياقتاۋعا كۇش سالعانمەن بارلىعى ەۋرووداقتىڭ ساياسي شەشىمىنە تاۋەلدى.
وداققا قوسىلۋ پروسەسى ادەتتە جىلدارعا سوزىلادى جانە ول ءۇشىن ءبىرقاتار قاتاڭ شارتتاردى ورىنداۋ قاجەت. قۇرامىنا 27 مەملەكەت كىرەتىن وداققا جاڭا مۇشە قابىلداۋ بويىنشا داۋىس بەرۋ قۇپيا وتەدى.
يراكلي كوباحيدزە سارسەنبى كۇنى ەۋرووداقتى گرۋزيانىڭ ءوتىنىشىن جىلدام قاراۋعا شاقىردى.
