بۇل جايىندا مۇحتار اۋەزوۆ اتىنداعى قازاق ۇلتتىق اكادەميالىق دراما تەاترى مالىمەت تاراتتى.
«قازاق ونەرى مەن مادەنيەتى اۋىر قازاعا ۇشىرادى. 72 جاسقا قاراعان شاعىندا تەاتر جانە كينو اكتەرى، قازاقستاننىڭ ەڭبەك سىڭىرگەن ءارتيسى، «قۇرمەت» جانە «پاراسات» وردەندەرىنىڭ يەگەرى تولەۋبەك مۇحامەدجان ۇلى ارالباي دۇنيە سالدى» دەپ جازدى تەاتردىڭ باسپا ءسوز قىزمەتى Instagram پاراقشاسىندا.
تولەۋبەك ارالباي 1950 جىلى 18 ناۋرىزدا سەمەي قالاسىندا دۇنيەگە كەلگەن. ونەرگە قۇشتار ول بالا كەزىنەن-اق قالاداعى پيونەرلەر سارايىنىڭ دراما ۇيىرمەسىنە قاتىستى. ونىڭ ونەردەگى ەڭ العاشقى ۇستازى اتاقتى رەجيسسەر ي.ۆيشنيەۆسكيي بولدى. 1964-1966 جىلدارى سەمەي وبلىستىق مۋزىكالىق دراما تەاترى جانىنداعى ستۋديانى وقىپ بىتىرگەن سوڭ تەاتردىڭ قازاق توبىنا قابىلدانىپ، العاشقى رولدەرىن ورىندادى.
1970-1973 جىلدارى اسكەري بورىشىن وتەگەن سوڭ قازاق مەملەكەتتىك م.اۋەزوۆ اتىنداعى اكادەميالىق دراما تەاترى جانىنداعى ەكى جىلدىق ستۋدياعا وقۋعا ءتۇسىپ، بەلگىلى ساحناگەر ر.سەيتمەتوۆتىڭ كلاسىنان 1975 جىلى ءبىتىرىپ شىعادى دا، كوركەمدىك كەڭەستىڭ شەشىمىمەن قاراشاڭىراق تەاتردىڭ اكتەرلىك توبىنا قابىلدانادى.
تەاتر سپەكتاكلدەرىنە ستۋديادا وقىپ جۇرگەندە-اق قاتىسقان ونىڭ العاشقى ءرولى و.بوكەيەۆتىڭ «قۇلىنىم مەنىڭ» دراماسىنداعى جىگىت ەدى.
سودان بەرى وتكەن قىرىق ەكى جىل ىشىندە ول ساحنانىڭ ۇلكەن شەبەرىنە اينالدى.
اكتەر ت.ارالبايدىڭ قازاق كينوسىنا دا ەڭبەگى ءسىڭدى. ءار جىلدارى تۇسىرىلگەن «اجداھا جىلى»، «شوقان ءۋاليحانوۆ» (رەج.ا.ءاشىموۆ)،، «ازيات» (رەج.ل.ارانىشيەۆا)، «قىزجىلاعان»، «مۇستافا شوقاي»، (رەج.س.نارىمبەتوۆ)، «رەكەتير»، «ليكۆيداتور» (رەج.ا.ساتايەۆ) كوركەم فيلمدەرىندە، سونداي-اق «توعىسقان تاعدىرلار»، «سارانچا» (رەج.ا.قارپىقوۆ) تەلەسەريالدارىنداعى رولدەرىمەن شەبەر اكتەر رەتىندە جاقسى تانىلدى.
اكتەر، رەجيسسەر شىعارماشىلىعىنىڭ ەلەۋلى ءبىر قىرى – ۇستازدىق. 1993 جىلدان بەرى رەسپۋبليكالىق ج.ەلەبەكوۆ اتىنداعى ەسترادا-سيرك كوللەدجىندە «اكتەرلىك شەبەرلىك» پانىنەن ساباق بەرگەن ت.ارالبايدىڭ شاكىرتتەرى بۇگىندەرى رەسپۋبليكا تەاترلارىندا، وزگە دە ونەر وردالارىندا جەمىستى ەڭبەك ەتتى.
