سۋ تاسقىنىنا بايلانىستى رەزەرۆ رەتىندە بالالار مەن ولاردىڭ اتا-انالارى ءۇشىن قوسىمشا 7 مىڭ ورىن ازىرلەندى. بۇل تۋرالى وقۋ-اعارتۋ مينيسترلىگىنىڭ رەسمي وكىلى مەرەكە نۇرمۇحانوۆا ءمالىم ەتتى، دەپ حابارلايدى alash.kz سايتى inbusiness.kz كە سىلتەپ.
"سۋ تاسقىنى باستالعان كەزدەن وقۋ-اعارتۋ مينيسترلىگى وقۋ پروسەسىن ساپالى ۇيىمداستىرۋ جانە بالالاردى ورنالاستىرۋ بويىنشا جۇمىستاردى جۇيەلى تۇردە ىسكە اسىرىپ كەلەدى. قازىرگى كەزدە وسىعان دەيىن ەۆاكۋاسيالىق پۋنكتتەردە بولعان 4 مىڭعا جۋىق بالا اتا-انالارىمەن بىرگە ىڭعايلى ورىندارعا ورنالاستىرىلدى. ونىڭ ىشىندە 600-گە جۋىق وقۋشى ساۋىقتىرۋ ورتالىقتارىنا، 2 مىڭعا تارتا بالا كوللەدجدەر مەن جوعارى وقۋ ورىندارىنىڭ جاتاقحانالارىنا، تاعى 600-گە جۋىق بالا رەسپۋبليكالىق ماڭىزداعى يننوۆاسيالىق مەكتەپ-ليسەي جاتاقحانالارىنا جىبەرىلدى. رەزەرۆ رەتىندە بالالار مەن ولاردىڭ اتا-انالارى ءۇشىن قوسىمشا 7 094 ورىن ازىرلەندى"، – دەيدى مەرەكە نۇرمۇحانوۆا.
ول وقۋشىلار قاجەت وقۋ قۇرالدارىمەن، تاماقتاندىرۋمەن جانە كيىممەن قامتاماسىز ەتىلگەنىن ايتتى.
قتج كومپانياسىمەن بىرگە بالالار ساۋىقتىرۋ ورتالىقتارىنا تەگىن تاسىمالداندى.
"اتاپ ايتقاندا، سۋ تاسقىنىنان زارداپ شەككەن وڭىرلەردەگى بالالار ءۇشىن ەمتيحان تاپسىرۋ مەرزىمدەرى قايتا قارالدى. بۇدان بۇرىن اقتوبە جانە اتىراۋ وبلىستارىندا تجب مەن بجب وتكىزىلمەيتىنى حابارلاندى. ءقازىر سولتۇستىك قازاقستان وبلىسىنىڭ زارداپ شەككەن ەلدى مەكەندەرىندە تۇراتىن بالالار ءۇشىن دە تجب مەن بجب-نى الىپ تاستاۋ شەشىمى جاسالدى. اقمولا جانە باتىس قازاقستان وبلىستارىندا شەشىم جاعدايعا قاراي قابىلدانادى"، – دەدى رەسمي وكىل.
ونىڭ سوزىنە قاراعاندا، ءقازىر كەلتىرىلگەن شىعىندى انىقتاۋ جانە سۋ تاسقىنىنان زارداپ شەككەن پەداگوگتەردىڭ ءتىزىمىن قۇرۋ جۇمىستارى ىسكە اسىرىلىپ جاتىر.
جەكەمەنشىك ءبىلىم بەرۋ ۇيىمدارىنىڭ قاۋىمداستىعى زارداپ شەككەندەرگە كومەك قورىن اشتى. ۇسىنىلعان دەرەكتەرگە سايكەس، 12 ملن تەڭگەدەن استام قارجى جينالعان.
