ءقازىر جۇرت تاسقىن سۋدىڭ ەكىنشى تولقىنىنا دايىندىق ۇستىندە، رەسەيدەن كەلەتىن توپانعا دايىندالىپ، ابىگەر. وسىنداي قيىن-قىستاۋ شاقتا اتىراۋ وبلىسىنىڭ اكىمدىگى «ۇلى دالا تۇلپارى» اتتى الامان بايگە وتكىزۋدى جوسپارلاپتى. ءتىپتى بايقاۋ جاريالاعان. جاس الاش گازەتى جازعانداي، بايگە ءۇشىن دەنە شىنىقتىرۋ، سپورت جانە تۋريزم باسقارماسى 54،5 ملن تەڭگە بولگەن. جەلىدە اتالعان لوت جاريالانا سالىسىمەن، حابارلاندىرۋ كوپتىڭ نارازىلىعىن تۋدىرىپ ۇلگەردى. لوت تومەندەگى سۋرەتتەگىدەي:
مەملەكەتتىك ساتىپ الۋلار سايتىندا ءبىز اتاعان ات جارىسى تۋرالى حابارلاندىرۋ بەرىلگەن. تاپسىرىس بەرۋشى – مەملەكەتتىك ساتىپ الۋلارعا جاۋاپتى مامان تىلەكقابىل ەسداۋلەتوۆ دەپ كورسەتىلگەن. بايگەگە قابىلداناتىن وتىنىشتەر 9-30 ءساۋىر ارالىعىندا دەپ كورسەتىلگەن. بايقاۋ شارتتارى بويىنشا تاپسىرىستى ورىنداۋشى جارىستاردى جىل سوڭىنا دەيىن وتكىزۋى كەرەك. 7 ساۋىردە اتىراۋ وبلىسىندا سۋ تاسقىنىنا بايلانىستى توتەنشە جاعداي جاريالاندى. ال لوت مەملەكەتتىك ساتىپ الۋ سايتىنا 9 ساۋىردە شىققان.
سايتقا جاريالانعان لوتتىڭ تەحنيكالىق سيپاتتاماسىمەن تانىسىپ شىقتىق. ات جارىسى وتەتىن جەرگە ۇزىندىعى 10 مەتر، بيىكتىگى 3 مەتر، قازاقي ناقىشتارمەن، دەكورلارمەن بەزەندىرىلگەن، ەكى جاعىنان كىرىپ-شىعۋعا ارنالعان باسپالداعى بار ساحنا جانە تۋرنيكەت قويىلادى دەلىنگەن، سونىمەن بىرگە، 8 تورەشى تاعايىندالاتىنى دا جازىلعان. ودان بولەك، شاباندوزدارعا 140 دانا كيىم ساتىپ الىنۋى كەرەك. كيىمنىڭ اق، كوك، قىزىل جانە سارى ءتۇستى، ءارقايسىسى 35 دانادان بولاتىنى قۇجاتتا كورسەتىلگەن.
تەحنيكالىق سيپاتتامادا:
«مال دارىگەرى. كەلەڭسىز جاعدايلاردىڭ الدىن الۋ ءۇشىن جەرگىلىكتى پوليسيا جانە جەدەل جاردەم قىزمەتكەرلەرى، ۆيدەو وپەراتور، فوتو وپەراتور تارتىلىپ، 15 دانا سەرتيفيكات، 15 دانا كۋبوك، 15 مەدال الىنۋى كەرەك. ساتىپ الۋ جەڭىمپازى اۋەدەن تۇسىرەتىن ءبىر درون وپەراتورمەن قامتاماسىز ەتۋى كەرەك» دەلىنگەن.
لوتتا بايگەدەن قالا مەن قالانىڭ شىعا بەرىس جاقتارىنا 3ح6 مەترلىك 6 دانا باننەر ورناتۋ دا قاراستىرىلعان.
شارتتاردىڭ تاعى ءبىرى – بايگە اتىراۋ وبلىسىندا ءتورت كەزەڭگە ءبولىنىپ وتكىزىلۋى ءتيىس. ءبىراق ناقتى ۋاقىتى جازىلماعان. الامان بايگە، توپ بايگە، قۇنان جارىس، تاي جارىس دەپ كورسەتىلىپتى. ءتورتىنشى، شەشۋشى كەزەڭ قالا كۇنىنە وراي ۇيىمداستىرىلۋى شارت. اتىراۋ قالاسى قالا كۇنىن 7 قازاندا تويلايدى. دەمەك، بايقاۋدى جەڭىپ الاتىن ۇيىمداستىرۋشىلار بايگەنى جىل سوڭىنا دەيىن وتكىزۋى قاجەت.
اتىراۋ وبلىسى اكىمدىگى جاس الاشقا بەرگەن جاۋابىندا:
«ساتىپ الۋ ناتيجەسىن جاريالاۋ 30.04.2024 جىلعا جوسپارلانعان بولاتىن. 7 ساۋىردە اتىراۋ وبلىسى اۋماعىندا تابيعي سيپاتتاعى توتەنشە جاعداي رەجيمى جاريالانۋىنا بايلانىستى دەنە شىنىقتىرۋ، سپورت جانە تۋريزم باسقارماسى «ۇلى دالا تۇلپارى» بايگەسىنە ارنالعان كونكۋرستى وتكىزۋدى توقتاتۋ تۋرالى شەشىم قابىلدادى. مەملەكەتتىك ساتىپ الۋ سايتىندا 9 ساۋىردە جاريالانعان كونكۋرس جارامسىز دەپ تانىلدى. اكىمدىكتىڭ بارلىق قۇرىلىمدىق ورگانى توتەنشە جاعداي كەزىندە مۇنداي باستامالارعا جول بەرىلمەيتىندىگى تۋرالى حاباردار ەتىلدى. قازىرگى ۋاقىتتا ەشقانداي جارىس وتكىزۋ جوسپاردا جوق»، – دەگەن.
مۇنداي بايگە اتىراۋداعى ات سپورتىن دامىتۋ ماقساتىندا بىلتىر دا وتكىزىلگەن. ول كەزدە بايقاۋ 40 ملن 500 مىڭ تەڭگەگە جاريالانعان ەدى. كونكۋرستى اتىراۋ وبلىسىنىڭ بايگە فەدەراسياسى قوعامدىق بىرلەستىگى جەڭىپ العان.
توتەنشە جاعدايعا قاراماستان كونكۋرس جاريالاپ، بايگە وتكىزەمىز دەپ الاشاپقىن بولعان وبلىس اكىمدىگى وسىنداي قاربالاس شاقتى پايدالانعىسى كەلگەنگە ۇقسايدى. حالىقتىڭ رەاكسياسى تاسقىن سۋدىڭ تاساسىندا قالىپ قويادى دەپ ويلاسا كەرەك. الدە جۋرناليستەردىڭ نازارىنان تىس قالادى دەپ ويلادى ما ەكەن؟
تاسقىننىڭ بەتى قايتار. شاپكەنوۆتىڭ اتتارى شاپپاي قالسا، ويلارىنداعى ءبىراز جوسپار اياقسىز قالاتىن بولدى اۋ!
