22 اقپاندا نۇر-سۇلتان قالاسىنىڭ مامانداندىرىلعان اۋدانارالىق تەرگەۋ سوتى بۇرىنعى قورعانىس ءمينيسترى مۇرات بەكتانوۆتى ەكى ايعا قامادى. بۇل جونىندە سوتتىڭ سەيسەنبى كۇنگى حابارلاماسىندا ايتىلعان.
بەكتانوۆ 19 اقپاندا ۇستالعان. ول قاڭتار وقيعاسى كەزىندەگى ارەكەتسىزدىگى ءۇشىن 452-باپ بويىنشا ("بيلىكتىڭ ارەكەتسىزدىگى") كۇدىككە ىلىنگەن.
مۇرات بەكتانوۆ 2021 جىلى تامىزدا جامبىلداعى اسكەري قويماداعى جارىلىستان كەيىن قورعانىس ءمينيسترى بولىپ تاعايىندالعان ەدى.
2022 جىلى 19 قاڭتاردا قازاقستان پرەزيدەنتى قاسىم-جومارت توقايەۆ ونى "قاڭتار وقيعالارى كەزىندە كومانديرلىك قابىلەتىن كورسەتە المادى" دەپ كىنالاپ، قىزمەتىنەن بوساتقان.
قازاقستان پرەزيدەنتى "قاڭتار وقيعاسى كەزىندە قارۋلى كۇشتەر وزىنە سەنىمسىز ءارى قابىلەتسىز باسشىلىق سالدارىنان جۇكتەلگەن مىندەتتەردى ءتيىستى دەڭگەيدە اتقارا المادى. مينيستر بەكتانوۆ كومانديرلىك قابىلەتىن كورسەتە المادى. اسكەري جاتتىعۋلار كەزىندە وڭ ناتيجە كورسەتكەن ارميامىز بولا تۇرا، سىن ساعاتتا الەۋەتىن پايدالانا المادىق. سىرتتان كومەك شاقىرۋعا ءماجبۇر بولدىق" دەگەن ەدى.
نارازىلىق كۇندەرى قاسىم-جومارت توقايەۆتىڭ شاقىرۋىمەن قازاقستانعا ۇجىمدىق قاۋىپسىزدىك شارتى ۇيىمىنىڭ اسكەرى كەلگەن. قازاقستان بيلىگى "بۇل كۇش ستراتەگيالىق نىسانداردى كۇزەتەدى" دەپ مالىمدەگەن.
2022 جىلدىڭ باسىندا گاز باعاسىن 50 تەڭگەدەن اسىرماۋ تۋرالى تالاپپەن ەرەۋىلگە شىققان جاڭاوزەن تۇرعىندارىن قولداۋ ءۇشىن قازاقستاننىڭ كوپتەگەن ايماعىندا باستالعان اكسيالار بىرتىندەپ ساياسي تالاپ قويعان نارازىلىققا ۇلاسقان. رەسمي مالىمەت بويىنشا، 227 ادام وسى وقيعادا قازا بولعان.
قاڭتاردىڭ 6-سىنا، نارازىلىق كۇشەيگەن تۇستا قازاقستان ۇلتتىق قاۋىپسىزدىك كوميتەتىنىڭ ءتوراعاسى كارىم ءماسىموۆتى "مەملەكەتكە وپاسىزدىق جاسادى" دەگەن ايىپپەن قاماعان. ءبىر اپتادان سوڭ وعان "بيلىكتى كۇشپەن باسىپ الماق بولدى" دەگەن تاعى ءبىر ايىپ قوسقان. كارىم ماسىموۆتەن كەيىن ونىڭ ءۇش ورىنباسارى دا قامالعان بولاتىن.
2019 جىلى ماۋسىمدا قازاقستان پرەزيدەنتى بولىپ سايلانعان قاسىم-جومارت توقايەۆ كۇش قۇرىلىمداردىڭ باسشىلارىن بۇرىنعى پرەزيدەنت، قاۋىپسىزدىك كەڭەسىنىڭ ءتوراعاسى نۇرسۇلتان نازاربايەۆتىڭ كەلىسىمىمەن تاعايىنداپ كەلگەن.
بيىل قاڭتار كوتەرىلىسى كەزىندە توقايەۆ "قاۋىپسىزدىك كەڭەسىنىڭ ءتوراعاسى" قىزمەتىن وزىنە الاتىنىن مالىمدەگەن. كوپ ۇزاماي نازاربايەۆتىڭ قازىرگى ساياسي جانە كادرلىق شەشىمدەرگە ىقپال ەتە الاتىن وكىلەتتەرىن زاڭنان الىپ تاستاعان.
