سۋ رەسۋرستارى جانە يرريگاسيا مينيسترلىگى سۋ رەسۋرستارىن باسقارۋ جۇيەسىن دامىتۋ تۇجىرىمداماسىن قايتا قارايتىنى حابارلاندى. قۇجاتقا سۋ تاسقىنىنىڭ الدىن الۋ جانە ونىڭ شىعىندارىن ازايتۋ جونىندەگى كەشەندى ءىس-شارالار قوسىلاتىن بولادى، دەپ حابارلايدى Alash.KZ ۇلتتىق پورتالى.
«قازىرگى ۋاقىتتا اقمولا وبلىسىندا ەكى ءىرى سۋ قويماسى 100% تولى. مۇندا سۋ تاسقىنىنىڭ بەلسەندى كەزەڭى ءوتىپ، سالالارى تۇراقتاندى. ءبىراق، جاباي وزەنىنىڭ رەتتەلمەيتىن اعىنىنىڭ ارتۋىنا بايلانىستى اتباساردا سۋ تاسقىنى جالعاسىپ جاتىر. سولتۇستىك قازاقستان وبلىسىندا 2 ءىرى سۋ قويماسى 100% تولى، سۋ تاسقىنى جالعاسىپ جاتىر. ەكى سۋ قويماسى دا شتاتتىق كەستەگە ساي جۇمىس ىستەپ تۇر، بۇزىلۋ ءقاۋپى جوق. سۋ توراپتارى كوپفاكتورلى تەكسەرۋدەن ءوتتى، تەحنيكالىق جاعدايى قاناعاتتانارلىق»، - دەدى ق ر سۋ رەسۋرستارى جانە يرريگاسيا مينيسترلىگىنىڭ رەسمي وكىلى ءمولدىر ابدۋالييەۆا ورتالىق كوممۋنيكاسيالار قىزمەتىندە.
"قازاقپاراتتىڭ" حابارلاۋىنشا، پەتروپاۆل قالاسى شەگىندەگى ەسىل وزەنىنىڭ دەڭگەيى – 1 243 سم، ءبىر تاۋلىكتە ول 103 سم-گە كوتەرىلدى. ماماندار سۋ وتكىزۋ ءىس-شارالارىن اتقارىپ جاتىر. اقتوبە وبلىسىندا ەكى ءىرى سۋ قويماسىنىڭ ورتاشا سۋ جيناۋ كورسەتكىشى – 97%. وڭىردەگى جاعداي تۇراقتى.
باتىس قازاقستان وبلىسىندا ءتورت ءىرى سۋ قويماسىنىڭ ورتاشا سۋ جيناۋى – 74%. يرەكلى سۋ قويماسىنان جىبەرىلگەن سۋ ءالى قازاقستان شەكاراسىنا جەتكەن جوق. بۇعان قاتىستى بولجام وزگەرمەدى. بۇل سۋ 16-17 ساۋىردە كەلەدى دەپ كۇتىلىپ وتىر.
قوستاناي وبلىسىندا ەكى ءىرى سۋ قويماسىنىڭ ورتاشا سۋ جيناۋ كورسەتكىشى 93%، سۋ تاسقىنىنىڭ بەلسەندى كەزەڭى ءوتتى. قاراتومار سۋ قويماسى ترانزيتتىك رەجيمدە جۇمىسىن جالعاستىرىپ جاتىر.
شىعىس قازاقستان وبلىسىندا ەكى ءىرى سۋ قويماسى بويىنشا ورتاشا سۋ جيناۋ كورسەتكىشى – 80%.
اباي وبلىسىندا ءشۇلبى سۋ قويماسى 89%-عا تولدى. وڭىردە سۋ تاسقىنى جالعاسۋدا. ءشۇلبى سۋ قويماسىنا اعىنداردىڭ ۇلعايۋىنا بايلانىستى سۋ جىبەرۋ جۇمىسى جۇرگىزىلىپ جاتىر. جالپى، ەرتىس كاسكادىنىڭ سۋ قويمالارى شتاتتىق كەستەگە ساي جۇمىس ىستەپ تۇر.
قاراعاندى وبلىسىندا 3 ءىرى سۋ قويماسى 99%-عا تولى، وڭىردە سۋ تاسقىنىنىڭ ءقاۋىپتى كەزەڭى ءوتتى. جاعداي تۇراقتى.