ءتىرى بولسام، قازاققا قىزمەت ەتپەي قويمايمىن!

ءاليحان بوكەيحان

سكليار مەن قاراشوكەيەۆ وتستاۆكاعا كەتسىن!

21 اقپان 2022 97

ماڭعىستاۋلىق ازاماتتار اقتاۋ قالاسىندا ءوتىپ جاتقان شارۋالاردىڭ وڭىرلىك قۇرىلتايىندا ۇكىمەتكە وسىنداي تالاپ قويدى. بۇل تۋرالى Alash.kz ۇلتتىق پورتالى جازدى.


ولار ەلىمىزدىڭ اۋىل شارۋاشىلىعى سالاسىنا جاۋاپتى لاۋازىمدى تۇلعالار – پرەمەر-مينيستردىڭ ءبىرىنشى ورىنباسارى رومان سكليار مەن اۋىل شارۋاشىلىعى ءمينيسترى ەربول قاراشوكەيەۆتىڭ جۇمىسىنا كوڭىلى تولمايتىنىن جەتكىزدى.




– اۋىل شارۋاشىلىعى تەحنيكالارىنا قاتىستى ۋتيل الىمىن الىپ تاستاۋ ماسەلەسى ءالى شەشىلگەن جوق. ءبىز، شارۋالار بۇعان پرەمەر-مينيستردىڭ ءبىرىنشى ورىنباسارى رومان سكليار كىنالى دەپ ەسەپتەيمىز. سوندىقتان ونىڭ وتستاۆكاعا كەتۋىن تالاپ ەتەمىز. اۋىل شارۋاشىلىعى ءمينيسترى ەربول قاراشوكەيەۆ تە قىزمەتىنەن كەتۋى كەرەك. 2021 جىلدىڭ قاراشاسىندا ەلوردادا وتكەن شارۋالار قۇرىلتايىنا كەلگەن جوق. كوپ ۋادە بەردى. ورىنداعان جوق. ول ەڭ الدىمەن شارۋانىڭ جاعدايىن ويلاۋى كەرەك. ءبىز مۇڭىمىزدى كىمگە ايتۋىمىز كەرەك؟! – دەيدى جاڭاوزەندىك شارۋا نۇربولات تەمىربايەۆ.



مال شارۋاشىلىعىمەن اينالىساتىن ادىلەت شىرتانوۆ تا اۋىل شارۋاشىلىعى ءمينيسترى وتستاۆكاعا كەتۋى كەرەك دەپ سانايدى.




– وتكەندە مينيستر ەربول قاراشوكەيەۆ ZOOM پلاتفورماسى ارقىلى ماڭعىستاۋلىق شارۋالارمەن جيىن وتكىزدى. سوندا 1 اقپاننان باستاپ ماڭعىستاۋلىق شارۋالارعا جەڭىلدەتىلگەن باعامەن جەم مەن ءشوپ كەلەدى دەگەن. ءبىراق جاڭاوزەن قالاسىنا 1 اقپاننان بەرى 660 قاپتان باسقا ەشتەڭە كەلگەن جوق. بىزگە ۋادە ەتىلگەن 2 مىڭ توننا كەبەك ەندى قاشان كەلەدى؟ بۇل ءوزى قايدان كەلە جاتىر، قىتايدان با؟! وسى ماسەلەنى رەتتەي الماعان مينيستر ەربول قاراشوكەيەۆتىڭ وتستاۆكاعا كەتۋىن تالاپ ەتەمىز، – دەدى ادىلەت شىرتانوۆ.



ەسكە سالا كەتەيىك، بۇگىن ماڭعىستاۋ وبلىسىنىڭ اقتاۋ قالاسىندا «Shopan ata» ۇلتتىق مال وسىرۋشىلەر قاۋىمداستىعىنىڭ ۇيىمداستىرۋىمەن ماڭعىستاۋلىق شارۋالاردىڭ وڭىرلىك قۇرىلتايى ءوتىپ جاتىر. وعان ماڭعىستاۋ وبلىسىنىڭ اكىمى نۇرلان نوعايەۆ، پارلامەنت ءماجىلىسىنىڭ دەپۋتاتتارى ەدىل جاڭبىرشين مەن سامات مۇسابايەۆ، اۋدان اكىمدەرى، جەرگىلىكتى مەملەكەتتىك ورگانداردىڭ وكىلدەرى كەلگەن.


قۇرىلتايدا اۋىل شارۋاشىلىعىن نەسيەلەندىرۋ، اۋىل شارۋاشىلىعىن سۋبسيديالاۋ، جانار-جاعار ماي باعاسى، اگروتەحنيكا ۋتيل الىمى، ۆەتەريناريا رەفورماسى، كوكتەمگى ەگىس جۇمىستارىنا دايىندىق، جەر الۋ ماسەلەسى جانە اگرارلىق ينفراقۇرىلىمدى دامىتۋ ماسەلەلەرى تالقىلاندى.

بۇل ماقالا تۋرالى نە ويلايسىز؟