ىشكى ىستەر مينيسترلىگى قاڭتار وقيعاسى بويىنشا 107 قىلمىستىق ءىس ايىپتاۋ اكتىسىمەن اياقتالعانىن مالىمدەدى.
ۆەدومستۆو مالىمەتى بويىنشا، نەگىزگى ىستەر "ۇرلىق"، "قارۋ-جاراق ۇرلاۋ، ونى زاڭسىز ساقتاۋ" باپتارى بويىنشا قارالعان.
ءىىم تەرگەۋ دەپارتامەنتىنىڭ باسشىسى سانجار ءادىلوۆ "سوتقا دەيىنگى تەرگەۋدىڭ ساپالى جۇرگىزىلۋىنە جانە ونى تەزدەتىپ اياقتاۋعا اسا ءمان بەرىلىپ جاتىر" دەپ مالىمدەدى. بۇگىنگى كۇنگە دەيىن 86 ايىپتاۋ ءىسى سوتقا بەرىلگەن، سوت 52 ادامعا شەشىم شىعارعان.
ولاردىڭ 39-نىڭ ەركىندىگى شەكتەلگەن، 13 ادام باس بوستاندىعىنان ايىرىلعان، ەكى ادامنىڭ ءىسى "تاراپتاردىڭ كەلىسىمگە كەلۋىنە بايلانىستى" توقتاتىلعان. قاي قالالاردا سوت ءىسى جۇرگەنىن ءىىم وكىلى ناقتى ايتپادى.
ءىىم مالىمەتىنشە، بۇگىنگى كۇنى 2729 قىلمىستىق ءىس بويىنشا 250 ادام قاماۋعا الىنعان، 140-نا بۇلتارتپاۋ شاراسى قولدانىلعان، 62ء-سى ءۇيقاماقتا وتىر، 33ء-سى كەپىلدىك بەرىپ بوساتىلعان، 45-سىنەن ەلدەن كەتپەۋ جونىندە قولحات الىنعان.
نەگىزگى قىلمىستىق ىستەر "ۇرلىق" (1844 ءىس)، "بوتەن ادامنىڭ مۇلكىنە ادەيى زاقىم كەلتىرۋ" (144)، سونىمەن بىرگە "قارۋ-جاراقتى زاڭسىز ساقتاۋ" (343) باپتارى بويىنشا تەرگەلىپ جاتىر.
باس پروكۋراتۋرا مالىمەتىنە قاراعاندا، قاڭتار وقيعاسىنا بايلانىستى سوتقا دەيىنگى 3096 ءىس تىركەلگەن. ارنايى پروكۋرورلار "جاپپاي تارتىپسىزدىك جانە تەرروريزم اكتىسى" بويىنشا 181 ءىستى تەرگەپ جاتىر. 741 كۇدىكتى سوت سانكسياسىمەن قاماۋعا الىنعان. 157 كۇدىكتىنىڭ بۇلتارتپاس شاراسى دەنساۋلىعى جانە وزگە جايتتارعا بايلانىستى قاماۋمەن بايلانىستى ەمەس شارا تۇرىمەن الماستىرىلعان.
قاڭتار كوتەرىلىسىنە بايلانىستى العاشقى سوت شەشىمى شىقتى. الماتى قالاسى المالى اۋداندىق سوتىنىڭ سۋدياسى قايرات يمانقۇلوۆتىڭ شەشىمىمەن الماتى وبلىسى ەڭبەكشىقازاق اۋدانى ەسىك قالاسىنىڭ تۇرعىندارى باقىت وڭتاي مەن وجەت جەڭىسحان 5 جىلعا سوتتاپ، جازالارىن قاۋىپسىزدىگى ورتاشا رەجيمدەگى تۇزەۋ مەكەمەسىندە وتەۋگە كەسكەن. ەكەۋى دە 1999 جىلى تۋعان، 22 جاستا. بۇل تۋرالى ازاتتىققا سوتتالۋشىلاردىڭ تۋىستارى حابارلادى.
باقىت وڭتاي مەن وجەت جەڭىسحانعا مەملەكەت بەكىتكەن ادۆوكات قۇرالاي قالياسقاروۆانىڭ سوزىنشە، ولارعا قىلمىستىق كودەكستىڭ 291 بابى 3 بولىگى بويىنشا ("قارۋدى، وق-دارىلەردi، جارىلعىش زاتتار مەن جارىلىس قۇرىلعىلارىن جىمقىرۋ نە قورقىتىپ الۋ") ايىپ تاعىلعان.
2022 جىلى قاڭتاردىڭ باسىندا گاز باعاسىن 50 تەڭگەدەن اسىرماۋ تۋرالى تالاپپەن ەرەۋىلگە شىققان جاڭاوزەن تۇرعىندارىن قولداۋ ءۇشىن قازاقستاننىڭ كوپتەگەن ايماعىندا باستالعان اكسيالار بىرتىندەپ ساياسي تالاپ قويعان نارازىلىققا ۇلاسقان. رەسمي مالىمەت بويىنشا، 227 ادام وسى وقيعادا قازا بولعان.
