ءتىرى بولسام، قازاققا قىزمەت ەتپەي قويمايمىن!

ءاليحان بوكەيحان

شىمكەنت اكىمىنىڭ جينالىسىندا شەنەۋنىك ۇستالدى

06 اقپان 2024 63
شىمكەنتتە اكىمنىڭ جينالىسى كەزىندە تۇرعىن ءۇي باسقارماسىنىڭ باسشىسىن ۇستاپ اكەتتى.

قالا اكىمى عابيت سىزدىقبەكوۆ شەنەۋنىكتى ۇستاۋ ءساتى تۇسىرىلگەن ۆيدەونى  Instagram-داعى پاراقشاسىندا جاريالادى.

ۆيدەوروليكتەن اكىم جەمقور شەنەۋنىكتەر دە، ادال شەنەۋنىكتەر دە جۇمىس ىستەيتىنىن ايتقانىن كورۋگە بولادى. سوسىن جينالىس بارىسىندا كابينەتكە سىبايلاس جەمقورلىققا قارسى قىزمەت وكىلدەرى كەلىپ، ازات مومىنوۆقا تەرگەۋ شارالارىن جۇرگىزۋ ءۇشىن كەلىپ تۇرعانىن ايتادى. مومىنوۆ انتيكوررۋپسيالىق قىزمەت وكىلدەرىمەن بىرگە زالدان شىعىپ كەتەدى.
«جەمقورلىقتىڭ سالدارىنان مەملەكەت تاراپىنان باستاۋ العان كوپتەگەن جوبالاردىڭ حالىققا پايداسى ءتيىستى دەڭگەيدە تيمەي كەلگەنىن ءبارىمىز بىلەمىز. وتانىمىزدىڭ قاۋىپسىزدىگى مەن حالىقتىڭ ءال-اۋقاتى سىبايلاس جەمقورلىقپەن كۇرەس جونىندەگى جۇيەلى شارالارعا تىكەلەي بايلانىستى ەكەنىن اتاپ كورسەتكەن مەملەكەتىمىزدىڭ باسشىسى قاسىم-جومارت كەمەل ۇلىنىڭ تاپسىرماسىنا ساي بۇل سالاداعى جۇمىستار بارىنشا كۇشەيتىلىپ، ءوز جەمىسىن بەرىپ جاتىر. ءار مەملەكەتتىك قىزمەتشى ءوز قىزمەتىندە ەڭ الدىمەن حالىقتىڭ يگىلىگىن ويلاپ، سوعان سۇيەنە شەشىم قابىلداۋى كەرەك. سوندىقتان العاشقى كۇننەن باستاپ اكىمدىك جانە اكىمدىككە قاراستى مەكەمە قىزمەتكەرلەرىنە وسى تۋرالى ايتىپ كەلە جاتىرمىن. جىبەرىلگەن كەمشىلىك پەن جاسالعان قاتەنىڭ ەڭ ورەسكەلى، ەش كەشىرىلمەسى - حالىق اماناتىنا قول سۇعۋ. مۇنداي ارەكەتتەرگە كوز جۇمىپ قاراي المايتىنىمدى بەس اي بويى بارشا ارىپتەستەرىمە ۇزدىكسىز ەسكەرتۋمەن كەلەمىن. بۇل ماسەلەنى قۇقىق قورعاۋ ورگاندارىنىڭ وكىلدەرىمەن دە بىرنەشە مارتە تالقىلاعان بولاتىنبىز»، – دەيدى اكىم الەۋمەتتىك جەلىدە جاريالاعان جازباسىندا.

ونىڭ ايتۋىنشا، سىبايلاس جەمقورلىققا قارسى ءىس-قيمىل اگەنتىگىنىڭ تاراپىنان قالالىق باسقارمالاردىڭ بىرىندە باسشى لاۋازىمداعى ازاماتتىڭ ىس-ارەكەتتەرى كۇدىك تۋدىرعانى انىقتالعان.
«وسىعان وراي، اكىمدىكتىڭ بۇگىنگى اپپاراتتىق ءماجىلىسى ۇستىندە اتالعان ازاماتتى تەرگەۋ جۇمىستارى جۇرگىزىلەتىن ۋاقىت ارالىعىنا قاماققا الۋ مۇمكىندىگى بەرىلدى. كوپشىلىكتىڭ كوز الدىندا ورىن العان بۇل جاعداي سول جيىنعا قاتىسقان اكىمدىكتىڭ باسشىلىق قۇرامىمەن قاتار بارشا قىزمەتكەرلەرگە وي سالار دەپ بىلەمىن. ءار نارسەنىڭ سۇراۋى بارىن، ءبىرىنشى كەزەكتە سۇراۋ سالار ادام بار ەكەنىن ارىپتەستەرىمنىڭ ۇمىتپاعانى ءجون. مۇندايدان اراشالاپ، قورعاپ قالار ەشكىم بولمايدى. تەك قانا ەڭبەكتى ادال اتقارىپ، مىندەتىمىزدى ابىرويلى ورىنداپ، ەل العىسىنا بولەنۋىمىز قاجەت»، –  دەيدى عابيت سىزدىقبەكوۆ.

فوتو: ۆيدەوداعى كادردان الىندى
بۇل ماقالا تۋرالى نە ويلايسىز؟