ۇكىمەت باسشىسى قىزمەتىنەن كەتكەن ءاليحان سمايىلوۆ قازاقستاندىقتارعا ۇندەۋ جاسادى.
ول كوپشىلىككە ۇندەۋىن الەۋمەتتىك جەلىدەگى پاراقشاسىندا جازدى.
قۇرمەتتى قازاقستاندىقتار!
بۇگىن مەملەكەت باسشىسى قازاقستان رەسپۋبليكاسى ۇكىمەتىنىڭ ورنىنان ءتۇسۋىن قابىلدادى.
ەڭ الدىمەن، پرەزيدەنت قاسىم-جومارت كەمەل ۇلى توقايەۆقا سىندارلى ۋاقىتتا قازاقستان رەسپۋبليكاسىنىڭ ۇكىمەتىن باسقارۋعا سەنىم بىلدىرگەنى ءۇشىن زور العىسىمدى بىلدىرەمىن.
وتكەن ەكى جىل قوعام ءۇشىن شەشۋشى كەزەڭ بولدى. مەملەكەت باسشىسى جاڭا ادىلەتتى قازاقستاندى قۇرۋعا باعىتتالعان اسا ماڭىزدى ساياسي جانە ەكونوميكالىق رەفورمالارعا باستاماشىلىق جاسادى.
ۇكىمەت وسى رەفورمالاردى ىسكە اسىرۋ جانە ەلىمىزدىڭ تۇراقتى الەۋمەتتىك-ەكونوميكالىق دامۋىن قامتاماسىز ەتۋ ءۇشىن قىزمەت ەتتى. ۇكىمەت پەن جەرگىلىكتى اتقارۋشى ورگانداردىڭ بىرلەسكەن جۇمىسىنىڭ ارقاسىندا ءبىرقاتار ناتيجەلەرگە قول جەتكىزىلدى.
وتكەن جىلدىڭ قورىتىندىسى بويىنشا ەكونوميكانىڭ ءوسۋى 5،1%ء-تى قۇرادى. بارلىق نەگىزگى سەكتورلار وڭ دامۋ ديناميكاسىن كورسەتتى. ينفلياسيا ەكى ەسەگە تومەندەتىلدى. ەلىمىزگە تارتىلعان تىكەلەي شەتەلدىك ينۆەستيسيالار كولەمى ەكى جىل قاتارىنان سوڭعى ونجىلدىقتاعى ەڭ جوعارى كورسەتكىشتەردىڭ ءبىرى بولدى. ونىڭ جىلدىق كولەمى 26-28 ملرد دوللاردى قۇرادى.
ۇلتتىق قوردىڭ اكتيۆتەرى بىلتىر 4 ملرد دوللارعا ءوسىپ، 60 ملرد دوللاردان استى. رەيتينگتىك اگەنتتىكتەر ۇلتتىق ەكونوميكانىڭ تاۋەلسىز رەيتينگى مەن ينۆەستيسيالىق سەنىمدىلىگىن راستادى. ۇكىمەتتەگى بارلىق ارىپتەستەرىمە، سونداي-اق دەپۋتاتتىق كورپۋسقا بىرلەسكەن جانە ناتيجەلى جۇمىس ءۇشىن شىن جۇرەكتەن ريزاشىلىعىمدى بىلدىرەمىن.
سونىمەن قاتار ەلىمىزدىڭ دامۋىنا ادال ەڭبەگىمەن ۇلەس قوسىپ جۇرگەن ءاربىر قازاقستاندىققا العىس ايتامىن، – دەپ جازدى ءا.سمايىلوۆ.
ەسكە سالساق، كەشە مەملەكەت باسشىسى ۇكىمەتتى تاراتۋ تۋرالى جارلىققا قول قويدى. ال 7 اقپاندا پرەزيدەنتتىڭ توراعالىعىمەن ۇكىمەتتىڭ كەڭەيتىلگەن وتىرىسى وتەدى.
فوتو: ءاليحان سمايىلوۆتىڭ فەيزبۋكتەگى رەسمي پاراقشاسىنان
