ءتىرى بولسام، قازاققا قىزمەت ەتپەي قويمايمىن!

ءاليحان بوكەيحان

شەكاراشىلار شاڭعىمەن ءوزارا جارىسقا ءتۇستى

24 قاڭتار 2024 35
قار جاۋىپ قىس باستالسا، قىسقى سپورت تۇرلەرىن دامىتۋ ەسكە تۇسەدى. وسىنى ەسكەرگەن اسكەري قىزمەتشىلەر اپپاق قار دا القىنىپ اياقتارىنا شاڭعى بايلاپ ءوزارا جارىسقا ءتۇستى.

كەڭەس اسكەرلەرىنىڭ اۋعان جەرىنەن شىعارىلعانىنا 35 جىل تولۋىنا وراي ۇيىمداستىرىلعان سپورتتىق شاراعا شەكارا اكادەمياسىنىڭ تۇراقتى جەكە قۇرامى قاتىستى.

سپورتتى جانىنا سەرىك ەتكەن شەكاراشىلار تازا اۋادا تىنىستاپ ءبىر دەمالىپ قالدى. شاڭعى جولىنا شىققان بەلسەندىلەردىڭ ىشىندە كاسىبي شاڭعىشىلار جوق. تەك قاراپايىم اۋەسقويلار. اسكەريلەر جاس ەرەكشەلىكتەرىنە قاراي جەتى توپقا ءبولىندى. ولاردى شەكارا اكادەمياسىنىڭ ءبىرىنشى ورىنباسارى پولكوۆنيك ا.يسمايلوۆ قۇتتىقتادى.

«بارشاڭىزدى بۇگىنگى سپورت مەرەكەسىمەن قۇتتىقتايمىن. بۇگىن كۇن رايى بۇلىنعىر. ازداپ ىزعىرىق اياز بولىپ تۇر. ءقازىر كورسەتىلگەن قاشىقتىقتى شاڭعى جولىمەن سىرعاناي وتىرىپ جارىسقا تۇسەسىزدەر. جالپى ەرەجەنى ماماندار تۇسىندىرەدى. سپورت – دەنساۋلىق كەپىلى. سپورتپەن شۇعىلدانۋدى ادەتكە اينالدىرىڭىزدار»، - دەدى ول.

شەكاراشىلاردىڭ قاتارداعى جاۋىنگەردەن پولكوۆنيككە دەيىن اياقتارىنا شاڭعى بايلاپ جارىس جولىنا شىعۋى جارىس كورىگىن ودان سايىن قىزدىردى. سپورتتى اينىماس سەرىگىنە اينالدىرعان پولكوۆنيك ج.كانايەۆ قىزمەتتەن قولى قالت ەتسە بولدى، قولىنا تاۋلى شاڭعىسىن كوتەرىپ شىمبۇلاققا تارتىپ وتىرۋدى داستۇرگە اينالدىرعان ەكەن. ايتسە، دە تاۋ شاڭعىسىنا باۋىر باسىپ قالعان شەكاراشى جارىسقا تۇسەتىن جۇگىرۋ شاڭعىسىن ۇرشىقشا ءيىرىپ اكەتتى. ۋاقىتىنان بۇرىن جەتىپ ارىپتەسەرىنىڭ الدى بولد ى.

بىرنەشە ساعاتقا سوزىلعان شاڭعى سپورتىنىڭ قورىتىندىسى بويىنشا، ايەلدەر اراسىندا ءبىرىنشى ورىندى مايور د.كالابايەۆا بولسا، ەكىنشى ورىندى سەرجانت ج.سابانچييەۆا، ءۇشىنشى ورىندى پودپولكوۆنيك ا.سەرماگامبەتوۆا الدى.

وسىلايشا، كەزەكشىلىك-كومەندانتتىق بولىمىنە قاراستى جاۋىنگەرلىك دايىندىق بولىمشەسىنىڭ ۇيىمداستىرۋىمەن جۇزەگە اسقان شارادا، ۇيىمداستىرۋشىلار بەلسەندىلىك تانىتقان ۇزدىك بولىمشەلەردى دە باعالاعان ەكەن. وندا ءبىرىنشى ورىندى 2-وقۋ ديۆيزيونى، ەكىنشى ورىندى 1-ارنايى كافەدراسى، ءۇشىنشى ورىندى اسكەري مەديسيانلىق ءبولىمى يەلەنگەن.

جانات جابىربەكوۆ،

ق ر ۇقك شەكارا اكادەمياسىنىڭ باسپا ءسوز حاتشىسى

 

 

 
بۇل ماقالا تۋرالى نە ويلايسىز؟