12 ساۋىردە قازاقستاننىڭ شىعىسىنداعى سەمەي قالاسىندا گەودەزيا جانە كارتوگرافيا كوللەدجىنىڭ ونداعان ستۋدەنتى وقۋ كورپۋستارىن جاڭادان قۇرىلىپ جاتقان اباي وبلىسىنىڭ كۇشتىك ورگاندارىنا بوساتىپ بەرۋگە قارسى شىقتى. ستۋدەنتتەر اكسيا كەزىندە "قارسىمىز!" دەپ ايقايلادى.
كوللەدج ديرەكتورى قانىش تولەۋوۆتىڭ سوزىنە قاراعاندا، ماسەلە كوللەدجدىڭ ەكى كورپۋسىن مەملەكەتتىك ورگان بولىمشەلەرىنە بەرۋ ماسەلەسىنەن تۋىنداپ وتىر.
—ءقازىر جاعداي بۇلىڭعىر. ەشكىم ەشقانداي شەشىم شىعارعان جوق، بۇيرىق، قاۋلى قابىلداعان جوق. بۇگىن ءبىلىم باسقارماسى جانە بارلىق كوللەدجبەن جينالىس ءوتتى. ءقازىر وسىنىڭ ءبارىن تالقىلاپ جاتىرمىز – مۇمكىن، عيماراتتاردى جوندەپ، قايتا جابدىقتاۋدى ولار ءتيىمسىز دەپ تابار، – دەدى ول.
بۇل كوللەدج "گەودەزيا جانە كارتوگرافيا" ماماندىعى بويىنشا مامان دايارلايتىن رەسپۋبليكاداعى جالعىز ورتا كاسىپتىك ءبىلىم بەرەتىن وقۋ ورنى. وندا 440 ستۋدەنت وقيدى.
وقۋ ورنى باسشىلىعىنىڭ ايتۋىنشا، كوللەدجگە ۋاقىتشا قۇرىلىس كوللەدجىن پانالاۋدى ۇسىنعان، ءبىراق وقۋ كورپۋستارى ناقتى قاي ۆەدومستۆوعا بەرىلەتىنى ازىرگە بەلگىسىز. كوللەدج باسشىسى "سىعىلىسۋعا دايارمىز، تەك وقۋ ورنى جابىلماسا بولدى" دەيدى.
ال شىعىس قازاقستان وبلىسىنىڭ ءبىلىم باسقارماسى "الاڭداۋعا نەگىز جوق" دەپ مالىمدەدى.
"ءقازىر ءبىلىم باسقارماسى اباي وبلىسىنىڭ قۇرىلۋىنا بايلانىستى سەمەي كوللەدجىنىڭ ماتەريالدىق-تەحنيكالىق بازاسىنا ساراپتاما جۇرگىزىپ جاتىر. سىبىستاردىڭ تاراۋى وسىمەن بايلانىستى شىعار. كوللەدجدى جابۋ نەمەسە ونى باسقا كوللەدجگە قوسۋ جونىندە ماسەلە قاراستىرىلىپ جاتقان جوق. ستۋدەنتتەر سايكەس ماماندىقتارى بويىنشا ديپلوم الادى. سەمەيدەگى بارلىق كوللەدج وبلىس قانا ەمەس، رەسپۋبليكا بويىنشا ماڭىزدى كادرلاردى دايىنداپ جاتىر. ستۋدەنتتەردىڭ اتا-انالارىنا الاڭداۋعا نەگىز جوق" دەدى وبلىستىق ءبىلىم باسقارماسىنىڭ جەتەكشىسى سايرانگۇل ءجۇمادىلوۆا. ونىڭ سوزىنەن Semeyainasy.media سايتى ءۇزىندى كەلتىرەدى.
سەمەيدە وزگە كوللەدجدەر مەن مەكتەپ عيماراتتارى دا جاڭادان قۇرىلىپ جاتقان اباي وبلىسىنىڭ اكىمدىگىنە قارايتىن قۇرىلىمدارعا بەرىلۋى مۇمكىن ەكەنى تۋرالى اقپارات تارادى. تەحنولوگيا كوللەدجى مەن مۋزىكا مەكتەبى وقۋشىلارىنىڭ اتا-انالارى مەن مەكتەپ ۇجىمى وسى اقپاراتقا الاڭدادى.
"اباي وبلىسىن قۇرۋ تۋرالى يدەيانى جۇزەگە اسىرۋ ءۇشىن بالالاردىڭ شىعارماشىلىق دامۋىن قۇربان ەتۋ قاجەت پە؟" دەپ جازدى مۋزىكا مەكتەبىنىڭ قىزمەتكەرلەرى مەن وقۋشىلاردىڭ اتا-انالارى حاتتا.
سەمەيدە 32 كوللەدج بەن 8 جوعارى وقۋ ورنى بار.
16 ناۋرىزدا "حالىققا جولداۋىندا" پرەزيدەنت قاسىم-جومارت توقايەۆ قازاقستاندا تاعى ءۇش وبلىس: شىعىس قازاقستاندا – اباي وبلىسى، قاراعاندى وبلىسىندا – ۇلىتاۋ، الماتى وبلىسىندا جەتىسۋ وبلىسى قۇرىلاتىنىن مالىمدەگەن.
اباي وبلىسىنا 1939-1997 جىلدارى سەمەي وبلىسىنىڭ قۇرامىندا بولعان اۋداندار كىرەدى. 1997 جىلى "شىعىندى ازايتۋ ماقساتىندا" وبلىس تاراتىلىپ، اۋماعى تۇتاس شىعىس قازاقستان وبلىسىنا بەرىلگەن ەدى.
