قازاقستان ۇكىمەتى "قازاقتەلەكوم" ۇلتتىق تەلەكوممۋنيكاسيا كومپانياسىنىڭ 28،8 پايىز اكسياسىن مەملەكەت مەنشىگىنە قايتارۋ تۋرالى قاۋلى قابىلدادى. بۇل جونىندە ۇكىمەتتىڭ تەلەگرام-ارناسى حابارلادى. مەملەكەتكە وتەتىن بۇل اكسيالار نازاربايەۆتىڭ جاقىن تۋىسىنا تيەسىلى بولعان.
قازاقستان بايلانىس سالاسىنىڭ ءمونوپوليسى - "قازاقتەلەكوم" اكسيالارىنىڭ 24 پايىزدان استامى قايرات ساتىبالدى قۇرىلتايشىسى سانالاتىن Skyline Investment Company S.A. كومپانياسىنا قاراعان. ەكس-پرەزيدەنت نۇرسۇلتان نازاربايەۆتىڭ باۋىرىنىڭ بالاسى قايرات ساتىبالدى ءقازىر قاماۋدا وتىر.
قاۋلىدا: "Skyline Investment Company S.A. جەكەمەنشىك كومپانياسىنىڭ "قازاقتەلەكوم" اكسيونەرلىك كومپانياسىنىڭ 2 671 481 قاراپايىم اكسياسىن سىيعا تارتۋ كەلىسىم-شارتى نەگىزىندە مەملەكەت مەنشىگىنە قايتارۋ تۋرالى ۇسىنىسى ماقۇلدانسىن. بۇل – اكسيونەرلىك قوعامنىڭ جارعىلىق كاپيتالىنىڭ 24،95 پايىزى" دەلىنگەن.
ۇكىمەتتىڭ حابارلاۋىنشا، Alatau Capital Investment كومپانياسى دا سىيعا تارتۋ جولىمەن "قازاقتەلەكومداعى" 413 412 اكسياسىن مەملەكەت مەنشىگىنە وتكىزۋدى ۇيعارعان.
اكسيالار مەملەكەت مەنشىگىنە قانداي سەبەپپەن قايتارىلىپ جاتقانى تۋرالى ەشتەڭە ايتىلمايدى.
قايرات ساتىبالدى "قىزمەت بابىن اسىرا پايدالاندى" جانە "قازاقتەلەكوم" اق قارجىسىن ءىرى كولەمدە ۇرلادى" دەگەن كۇدىكپەن 13 ناۋرىزدا ۇستالىپ، تۇتقىندالعان. جەمقورلىقپەن كۇرەس قىزمەتى ساتىبالدى "مەملەكەت قاۋىپسىزدىگىنە قاتەر توندىرەتىن باسقا ىستەر بويىنشا تەرگەلىپ جاتقانىن" ايتتى.
2021 جىلعى زەرتتەۋىندە ازاتتىق ليۋكسەمبۋرگتەگى LBR رەەسترى بويىنشا، قايرات ساتىبالدى Skyline Investment Company S.A. كومپانياسىنىڭ جالعىز قۇرىلتايشىسى ەكەنىن انىقتاعان. اشىق دەرەككوزدەگى اقپاراتقا قاراعاندا، ساتىبالدى 2016 جىلى ءوزىنىڭ Alatau Capital Invest كومپانياسى ارقىلى "قازاقتەلەكومنىڭ" 4 پايىزعا جەتپەيتىن اكسياسىن ساتىپ العان.
4 ساۋىردە قازاقستاننىڭ جەمقورلىقپەن كۇرەس اگەنتتىگى ەكس-پرەزيدەنتتىڭ نەمەرە ىنىسىنە قارايتىن باسقا كومپانيالاردا دا اقشا ۇرلاۋ فاكتىلەرى بولعان دەگەن مالىمدەمە جاسادى. بىرنەشە كۇننەن سوڭ "بيزنەستى زاڭسىز تارتىپ الدى" دەگەن كۇدىكپەن قايرات ساتىبالدىنىڭ بۇرىنعى ايەلى گۇلميرا ساتىبالدى دا تۇتقىندالدى.
وتكەن ايدىڭ سوڭىندا جەمقورلىقپەن كۇرەس قىزمەتى گۇلميرا ساتىبالدى شىمكەنتتەگى جولاۋشى تاسىمالى جانە اۆتوكولىك جولدارى باسقارماسىنداعى شەنەۋنىكتەرمەن جانە "اريا – جاڭا استانا" كومپانياسى باسشىلارىمەن بىرلەسىپ، ورىندالماعان قۇرىلىس-مونتاج جۇمىستارى ءۇشىن تولەنگەن 1،5 ميلليون دوللاردى جىمقىردى دەگەندى ايتتى.
قاڭتار وقيعاسىنان سوڭ بۇرىنعى پرەزيدەنتتىڭ وتباسى مۇشەلەرى مەن ونىڭ ماڭايىنداعى ادامدار جوعارى لاۋازىمدارىنان ايىرىلىپ، كەيبىرەۋى تۇتقىندالدى. قامالعاندار اراسىندا نازاربايەۆتاردىڭ قۇداسى، بيزنەسمەن قايرات بورانبايەۆ بار. ونىڭ قىزى اليما نازاربايەۆتىڭ جيەنى ايسۇلتاننىڭ ايەلى بولعان (ايسۇلتان 2020 جىلى تامىزدا لوندونا قايتىس بولعان). بورانبايەۆقا "كۆازيمەملەكەتتىك سەكتوردا اسا ءىرى كولەمدە اقشا ۇرلادى" دەگەن ايىپ تاعىلدى. ءبىر كەزدەرى اكەسىنىڭ ورنىن باسۋى مۇمكىن دەپ سانالعان ەكس-پرەزيدەنتتىڭ ۇلكەن قىزى داريعا نازاربايەۆا دەپۋتات قىزمەتىن توقتاتىپ، ناۋرىز ايىندا ماجىلىستەن كەتتى.
