جۋىردا قازاقستانعا ورالىپ، اۋەجايدان بىردەن ۇستالعان ساياسي بەلسەندى ەرمەك نارىمباي الماتى وبلىسى زارەچنىي كەنتىندەگى قاۋىپسىزدىگى ورتاشا رەجيمدەگى تۇرمەگە اۋىستىرىلدى. بۇل جونىندە ادۆوكاتى جانار بالعابايەۆا حابارلادى.
ونىڭ سوزىنە قاراعاندا، بەلسەندى 17 اقپاندا كۇندىز اتالعان اباقتىعا ەتاپپەن جەتكىزىلگەن.
– شەكارانى زاڭسىز كەسىپ ءوتۋ بويىنشا سوتقا دەيىنگى تەرگەۋ امالدارى باستالدى. (قازاقستاندا بوستاندىعى شەكتەلگەن بەلسەندى 2016 جىلى ەلدەن كەتىپ قالعان – رەد.) ول سول كەزدە ءوزىنىڭ شەكارانى قالاي كەسىپ وتكەنىن ايتقان. سودان سوڭ ءىز قوزعالعان. ول ەلدە بولماعاندىقتان ءىس توقتاپ قالعان ەدى. ءقازىر قايتادان جانداندى. ۇقك-دان تەرگەۋشى كەلدى. ءقازىر سول تەرگەۋگە كەتىپ بارا جاتىرمىن. تەرگەۋشى ودان سۇراق-جاۋاپ الادى. سوسىن قوردايعا بارىپ، ول قاي جەردەن كەسىپ وتكەنىن كورسەتەدى، – دەدى ادۆوكات.
2015 جىلعى قازاندا قازاقستان سوتى ازاماتتىق بەلسەندىلەر ەرمەك نارىمباي مەن سەرىكجان مامبەتاليندى مۇرات تەلىبەكوۆتىڭ "ۆەتەر س ۋليسى" كىتابىنىڭ ءۇزىندىسىن الەۋمەتتىك جەلىگە جاريالاعانى ءۇشىن سوتتاعان. "الاۋىزدىق تۋدىردى" دەگەن ايىپ تاعىلعان نارىمباي ءۇش جىلعا، مامبەتالين ەكى جىلعا بوستاندىعىنان ايىرىلعان.
قازاقستاندىق قۇقىق قورعاۋشىلار قاماۋداعى نارىمباي مەن مامبەتاليندى "ساياسي تۇتقىندار" تىزىمىنە ەنگىزگەن. كەيىن ەكەۋى دە ىسىنە "وكىنەتىنى" جايلى حات جاريالادى. نارىمباي تەرگەۋ اباقتىسىندا ءبىر ايدان استام ۋاقىت اشتىق جاريالاپ جاتتى، 2016 جىلعى 22 اقپاندا سوت ونى ءۇي قاماعىنا اۋىستىرعان سوڭ بەلسەندى اشتىعىن توقتاتتى. كەيىن اپەللياسيا سوتى ونىڭ جازاسىن جەڭىلدەتىپ، ەركىندىگىن ءۇش جىلعا شەكتەۋگە الماستىرعان. 2016 جىلعى شىلدەدە ەرمەك نارىمباي قازاقستاننان بيلىكتىڭ رۇقساتىنسىز ۋكرايناعا كەتىپ قالدى.
ەرمەك نارىمباي 2010 جىلعى 1 مامىردا الماتىدا سول كەزدەگى قازاقستان پرەزيدەنتى نۇرسۇلتان نازاربايەۆتىڭ وتستاۆكاعا كەتۋىن تالاپ ەتكەن دەموكراتيالىق كۇشتەر جيىنىندا "نازاربايەۆ، كەت!" دەپ ۇرانداعان. سول كۇنى كەشكە ونى پوليسيا ۇستاپ اكەتىپ، "ءتارتىپ بۇزدى" دەگەن ايىپپەن 15 تاۋلىككە قاماعان. كەيىن قاماۋدا وتىرعان بەلسەندىگە "سوتقا قۇرمەت كورسەتپەدى" جانە "پوليسەيلەرگە قارسىلاسىپ، كۇش كورسەتتى" دەگەن ايىپتار تاعىلدى. الماتىنىڭ بوستاندىق اۋداندىق سوتى وسى ەكى ايىپ بويىنشا 2010 جىلعى 26 ماۋسىمدا ەرمەك نارىمبايدى ءتورت جىلعا بوستاندىعىنان ايىردى. 2012 جىلعى 25 اقپاندا بيلىك راقىمشىلىق جاساپ ونى قاماۋدان بوساتقان.
