ءتىرى بولسام، قازاققا قىزمەت ەتپەي قويمايمىن!

ءاليحان بوكەيحان

ساۋساقتارى سىنىپ، شاشى جۇلىنعان، دەنەسى كوك: 3 بالاسى بار كەلىنشەك قۇبىردان تابىلدى

04 ءساۋىر 2024 401

تۇلكىباس اۋدانىندا قايعىلى جاعداي ورىن الدى. 29 جاستاعى چەرنىح وتباسىنىڭ كەلىنى اۋىل ىشىندەگى ەسكى قۇبىردان تابىلعان. بۇل تۋرالى تۇركىستان وبلىسىنىڭ پوليسيا دەپارتامەنتىنىڭ باسپا ءسوز قىزمەتى جاريالادى.

“18 ناۋرىز كۇنى تاڭەرتەڭ نەمەرەمنەن كەلىننىڭ ۇيدە جوق ەكەنىن ەستىدىم. جان-جاقتان ىزدەدىك. كەيىن اۋىل تۇرعىندارى قۇبىردان تابىلعانىن جەتكىزدى. دەرەۋ سول جەرگە جەتتىك. قۇداعيىم مەن قۇتقارۋشىلار “كومەكتەرسىڭدەر” دەگەن داۋىستى ەستىگەندەي بولدىق دەيدى. ءبىراق استىنان الىپ شىققاندا جانسىز بولدى. مەنىڭ كەلىنىم وزىنە قول سالعانىنا سەنبەيمىن. ولگىسى كەلسە، ادام ازاپتى ەمەس، وڭاي امالدارىن دا تابا الادى عوي؟! ونىمەن بىرگە اۋىلداعى ءبىر ەر ادام بارىپتى. ول ماس. سۇراسام “ءوزى ولگىسى كەلىپ، ىشىنە ءتۇسىپ كەتتى” دەيدى. ونىڭ ىشىنە ءتۇسىپ كەتە سالۋ وڭاي ەمەس”، –  دەيدى مارقۇمنىڭ ەنەسى سۆەتلانا چەرنىح. 

ساۋساقتارى سىنىپ، شاشىنىڭ جۇلىنعانى جانە دەنەسىنىڭ كوك الا قويداي كوگەرگەنى انىقتالدى.

“ءىستى تەرگەپ-تەكسەرمەي مۇنداي بايلامعا قالاي كەلگەن؟ نە بىزدەن، نە وقيعانى حابارلاعان كۋاگەردەن جاۋاپ العان جوق. ءبىز، ريمانىڭ وزىنە قول سالعانىنا سەنبەيمىز. ادام ءولۋ ءۇشىن سونشا جەر كەزىپ بارا ما؟ ۇيدە ۇرىس-جانجال دا بولعان جوق. ءۇش بالاسى بار. بارىنە تياناقتى قاراپ ءجۇردى. اتا-انالار كوميتەتىنىڭ ءتورايىمى. وسىنداي ادام ءوزىن ءولتىرۋ ءۇشىن ايدالاداعى قۇبىرعا تۇسە مە؟”، – دەيدى سۆەتلانا چەرنىح. 

“ول قۇبىردىڭ بارىن بۇل اۋىلدا ەكىنىڭ ءبىرى بىلمەيدى. ايەلىم ءبىلدى دەگەنگە دە سەنبەيمىن. جازىق دالادا جاتقان قۇبىردا كىمنىڭ قانداي شارۋاسى بولۋى مۇمكىن؟ ال، كۋاگەر مەتالل جيناپ وتكىزەتىن. ول قۇبىردى بىرەر كۇن بۇرىن كەسىپ الىپ كەتكىسى كەلگەن كورىنەدى. ءوزى قۇلادى دەيدى. بىرگە بارسا نەگە قۇتقارماعان؟ بۇل ىستە شيكىلىك كوپ”، – دەيدى مارقۇمنىڭ كۇيەۋى. 

جالاڭاياق، ىشىندەگى كيىمدەر جىرتىق كۇيىندە قۇبىردان شىعارىلعان.

“سول ءتۇنى عانا مەن جۇمىستان كەلگەن سوڭ، ساياحاتتاپ تاشكەنتە بارامىز دەپ كەلىسكەنبىز. سۇراعاننىڭ ءبارىن الىپ بەرەتىنمىن. تارشىلىق كورگەن جوق. تۇسىنبەيمىن. ايەلىم جۇمباق جاعدايدا ءولدى. پوليسيا بولسا “وزىنە قول سالدى” دەيدى. قۇزىرلى ورگان وكىلدەرى ءىستى جىلى جاپپاي، تەرگەۋ جۇرگىزۋ كەرەك!”، – دەيدى ميحايل چەرنىح. 

چەرنىح وتباسى قىلمىستىق ءىستىڭ ماي-شاممەن تەرگەلگەنىن قالايدى. الايدا قۇقىق قورعاۋشىلار قارالى كۇننەن بەرى قيمىلسىز ەكەن. تەك الەۋمەتتىك جەلىدە جازبا جاريالاپ، شاعىم ايتقان سوڭ عانا جاۋاپ الۋعا شاقىرىپتى. 

"قازىرگى ۋاقىتتا پوليسيا "ءوزىن-وزى ولتىرۋگە دەيىن جەتكىزۋ" بابى بويىنشا تەرگەۋ جۇرگىزۋدە. زاڭدى پروسەسسۋالدىق شەشىم قابىلداناتىن بولادى. وقيعانىڭ بارلىق ءمان-جايى انىقتالىپ جاتىر"، – دەيدى تۇركىستان وبلىستىق پوليسيا دەپارتامەنتىنىڭ باسپا ءسوز قىزمەتى.

ريما چەرنىحتىڭ ارتىندا ءۇش بالاسى قالدى. ۇلكەنى توعىزدا بولسا، كىشىسى نەبارى ءتورت جاستا.

بۇل ماقالا تۋرالى نە ويلايسىز؟