قازاقستان ۇلتتىق بانكى 28 ماۋسىمدا 2024 جىلعى ۇلگىدەگى جاڭا ديزاينمەن نومينالى 10000 تەڭگەلىك بانكنوتانى اينالىمعا شىعارادى. بۇل تۋرالى Alash.kz ۇلتتىق پورتالى Kursiv.media سايتىنا سىلتەمە جاساپ حابارلايدى.
«ساق ءستيلى» جاڭا سەرياسى بويىنشا ەكىنشى بانكنوتا دايىندالعان. وندا قازاقى ويۋ-ورنەكتىڭ باستاۋ نەگىزى سانالاتىن جانە كوشپەندىلەردىڭ بىرەگەي مادەنيەتىنەن باستاپ بۇگىنگى ەل مۇراسىن بەينەلەيتىن «ساق ءستيلى» ەلەمەنتتەرى بەينەنەلگەن.
بانكنوتالار جاپپاي قولدانىسقا 2024 جىلعى قىركۇيەكتە بەرىلە باستايدى.
اقشا بەلگىسىنىڭ ديزاينى مەن فورماسى
بانكنوتالاردىڭ ءتۇسى – كۇلگىن-كوك.
بانكنوتانىڭ بەت جاعىندا:
– كوكتە قالىقتاپ ۇشقان قۇسپەن «ءومىر اعاشىنىڭ» بۇتاعى (ەسىك قورعانى، ب. د. د. 5-4 عع.، التىن ادام باس كيىمىنىڭ ءبىر بولىگى، تابيعات پەن نانىم بايلانىسىنىڭ قاسيەتتى ماعىناسى)؛
– دنق ءسپيرالىن جانە ادامنىڭ تابيعاتپەن بايلانىسىن بىلدىرەتىن ويۋ-ورنەكپەن ستيلدەندىرىلگەن شەكسىزدىك سيمۆولى؛
– ارتەفاكت – تاۋ شىڭىنداعى بارىس بەينەلى اشەكەي (ەسىك قورعانى، ب.ز.د. 5-4 عع.، التىن ادامنىڭ باس كيىمىندەگى دەتال، قار بارىسى – باتىلدىقتىڭ، كۇش پەن سۇلۋلىقتىڭ سيمۆولى).
ارتقى جاعىندا ويۋ-ورنەكپەن بەزەندىرىلگەن قالقان مەن قازاقستاندا مەكەن ەتەتىن بارىس بەينەلەنگەن. نەگىزگى سۋرەتتىڭ ارتىندا دوڭگەلەك پىشىندەس قازاقتىڭ ويۋ-ورنەگى ورنالاسقان. بۇل بەينە مىنا يدەيالاردى بىلدىرەدى:
«قالقان» – قۇندىلىقتاردى قورعاۋ؛
ەجەلگى سيمۆول – الەمنىڭ ءتورت قۇبىلاسى؛
ورتاسىنداعى كۇن بەلگىسى – شىعارماشىلىق قۋات پەن ءومىردىڭ سيمۆولى.
سونداي-اق، بانكنوتانىڭ سىرت جاعىندا ارتەفاكت، ياعني اۋزىندا گريفوندارى بار بارىستىڭ باسى بەينەلەنگەن (بەرەل قورعاندارى «پاتشالار القابى»، ب.د. د. 8-7 عع.، شقو، بەزەندىرۋ ەلەمەنتى، ماقساتتىلىق پەن كۇشتىڭ سيمۆولى). بانكنوتانىڭ ورتاسىندا فون رەتىندە قازاق ويۋ-ورنەگىندەگى «شەكسىزدىك» كونتۋرى بار. وندا ىلە الاتاۋى تاۋلارىنىڭ لاندشافتى كورىنىس تاپقان.
