روپ ديرەكتورىنىڭ ايەلى: ءىستى تەرگەۋگە بىرەۋ كەدەرگى جاساۋدا

وز-وزىنە قول جۇمسادى دەگەن «روپ وپەراتور» ج ش س باسقارۋشى ديرەكتورى رۋسلاننىڭ ايەلى ءلاززات شامشييەۆا تەرگەۋ بارىسى تۋرالى ايتتى.

«كۇيەۋىمنىڭ وز-وزىنە قول جۇمساعانىنا ەشقايسىمىز سەنبەيمىز! بۇعان باسقا دا كوپتەگەن دالەلدەر بار! ءبىراق وقيعا ورنىندا بولعان قىزمەتكەرلەر ءۇستىرت تەكسەرىس جۇرگىزگەن (ءتىپتى ونىڭ قاي قىزمەتتە بولعانىن دۇرىس كورسەتپەگەن)» دەدى ءلاززات Ulysmedia-عا.

كەلىنشەك جۇبايى رۋسلان شامشييەۆ قايتىس بولعان كۇندى ەسىنە الدى.

«ول كۇنى كەنجە قىزىمىز نەبارى 1 جاس 10 ايعا (سافيا)، ۇلكەن قىزىمىز 13 جاسقا (ءامينا) تولىپ جاتقان. كەنجە قىزىمىزعا تۇساۋ كەسەر وتكىزۋگە دايىندالىپ جاتقانبىز. سول كۇنى تاڭەرتەڭ ونى ادەتتەگىدەي ۇلكەن قىزىممەن جۇمىسقا جانە مەكتەپكە شىعارىپ سالدىم. ول: «بۇگىن «جاسىل دامۋعا» قۇجاتتاردى تاپسىرۋدىڭ سوڭعى كۇنى، مەن بۇگىن ۇيگە ەرتە كەلەمىن» دەدى. كەشكى اسقا نە ءپىسىرۋ كەرەكتىگىن تالقىلادىق. مۇنداي قادامعا باراتىنداي ەشتەڭە بولعان جوق» دەدى ءلاززات.

ونىڭ ايتۋىنشا، ءىستى تەرگەۋدە كوپتەگەن سايكەسسىزدىكتەر بار.

«مەن مۇنىڭ ارتىندا كىم تۇرعانىن بىلمەيمىن، ءبىراق ءبارى سوزىلىپ كەتتى! تەرگەۋ توبى ول قايتىس بولعاننان كەيىن ەكى اي وتكەن سوڭ، 28 ناۋرىزدا قۇرىلدى! بىرەۋ اعام ەكەۋمىزگە ءىستى تەرگەۋگە بىرەۋلەر ارالاسىپ جاتقانىن ايتتى» دەيدى ول.

ەسكە سالساق، 11 قاڭتاردا پرەزيدەنت قاسىم-جومارت توقايەۆ ۇكىمەتكە ۋتيل الىمىمەن اينالىساتىن «روپ وپەراتورىنىڭ» قىزمەتىن جويۋدى تاپسىرعان. ونىڭ ايتۋىنشا، مۇنى باسقا ەلدەردەگىدەي مەملەكەتتىك ۇيىم اتقارۋى كەرەك.

كەيىن ۇكىمەت «روپ وپەراتور» ج ش س قىزمەتىن توقتاتىپ، ونىڭ فۋنكسيالارىن مەملەكەتتىك ۇيىمعا تاپسىرعانىن حابارلادى. سونداي-اق، شەنەۋنىكتەر «قايتا وڭدەۋ تولەمى ەسەبىنەن قۇرىلعان اكتيۆتەر مەملەكەت مەنشىگىنە وتكەنىن» حابارلادى.

26 قاڭتاردا پوليسيا نۇر-سۇلتاندا شامشييەۆتىڭ وز-وزىنە قول جۇمساعانىن حابارلادى. پوليسيا دەپارتامەنتى وز-وزىنە قول جۇمساۋعا يتەرمەلەۋ بابى بويىنشا قىلمىستىق ءىس قوزعادى. سول كۇنى سىبايلاس جەمقورلىققا قارسى ءىس-قيمىل اگەنتتىگى روپ وپەراتورىنىڭ باسشىسى مەدەت قۇمارعالييەۆ پەن ەكولوگيا ۆيسە-مينيسترى احمەتجان ءپىرىمقۇلوۆتىڭ سىبايلاس جەمقورلىققا قاتىسى بار دەگەن ايىپپەن ۇستالعانىن حابارلادى. ۇستالعانداردىڭ ەكەۋى دە قازاقستاننان قاشىپ كەتپەك بولعان كورىنەدى. الايدا قۇمارعالييەۆتىڭ ايەلى ونىڭ ەلدەن كەتۋگە نيەتى جوق ەكەنىن مالىمدەدى. 27 قاڭتاردا سوت ءپىرىمقۇلوۆ پەن قۇمارعالييەۆتى 2 ايعا قاماۋعا الۋدى سانكسيالادى.

11 ناۋرىزدا روپ وپەراتورىنىڭ بۇرىنعى باس ديرەكتورىنىڭ قاماۋعا الىنعانى تۋرالى بەلگىلى بولدى – ول 20 ملرد جىمقىردى دەگەن كۇدىككە ءىلىندى.