ءماجىلىس سارسەنبى كۇنى "سەمەي يادرولىق ءقاۋىپسىز ايماعى تۋرالى" زاڭ جوباسى مەن قاجەتتى تۇزەتۋلەردى ءبىرىنشى وقىلىمدا ماقۇلدادى. سەمەي پوليگونىندا يادرولىق ءقاۋىپسىز ايماق قۇرۋدى قاراستىراتىن قۇجاتتى دەپۋتاتتارعا ەنەرگەتيكا ءمينيسترى بولات اقشولاقوۆ تانىستىردى.
ەنەرگەتيكا مينيسترلىگىنىڭ مالىمەتىنشە، زاڭ جوباسىنىڭ نەگىزگى ماقساتى – پوليگون اۋماعىندا "رادياسياعا ۇشىراعان جانە تازا جەرلەردى ءبولۋ، لاستانعان اۋماقتا رادياسيا قاۋىپسىزدىگىن قامتاماسىز ەتۋ، اۋماقتى قالپىنا كەلتىرۋ، پوليگون جەرىن پايدالانۋ ماسەلەسىندە مەملەكەت باقىلاۋىن كۇشەيتۋ".
ارنايى ايماق مەملەكەتتىك ەكولوگيالىق ساراپتاما لاستانعان دەپ تانىعان اۋماقتان قۇرىلادى.
زاڭ جوباسى راديواكتيۆتى زاتتاردىڭ تاراۋىن شەكتەپ، سەمەي يادرولىق ءقاۋىپسىز ايماعىن "راديواكتيۆتى قالدىقتاردى پوليگون اۋماعىندا جيناۋ، ورنالاستىرۋ جانە ۋتيليزاسيالاۋ" ارقىلى قالپىنا كەلتىرۋدى قاراستىرادى. بۇعان قوسا، اۋماقتىڭ راديواكتيۆتى لاستانۋ دەڭگەيىن باقىلاپ، يادرولىق سىناقتىڭ اسەرىن جويۋدى كوزدەيدى.
سەمەي يادرولىق ءقاۋىپسىز ايماعىن قۇرۋعا ۇكىمەت 2027 جىلعا دەيىنگى رەسپۋبليكالىق بيۋدجەتتەن 3،5 ملرد تەڭگە قارجى ءبولۋدى قاراستىرىپ وتىر. زاڭ جوباسى ايماقتىڭ ەكولوگيالىق جاعدايىن جاقسارتۋعا دا باعىتتالعان دەيدى قۇجات اۆتورلارى.
سەمەي پوليگونى 1991 جىلى جابىلعان. وعان دەيىن 40 جىل بويى سوۆەت بيلىگى كەمىندە 468 سىناق جۇرگىزىپ، يادرولىق قارۋ سىناعان. پوليگونعا جاقىن ەلدى مەكەن تۇرعىندارى ءالى كۇنگە دەيىن رادياسيانىڭ زاردابىن تارتىپ وتىر. ساۋلە بالالارىنا دا اسەر ەتكەن.
