رەسەي ۋكراينا اۋماعىندا حيميالىق قارۋ قولداناتىن وپەراسيا جوسپارلاۋى مۇمكىن. نەمىستىڭ Welt am Sonntag باسىلىمىنا بەرگەن سۇحباتىندا ناتو باس حاتشىسى يەنس ستولتەنبەرگ وسىلاي دەپ مالىمدەدى.
ستولتەنبەرگتىڭ ايتۋىنشا، كرەمل ءوز شابۋىلىن اقتاۋ ءۇشىن ۋكرايناداعى "بيولوگيالىق قارۋ شىعاراتىن زەرتحانالارعا" كوپتىڭ نازارىن اۋدارتىپ وتىر.
"ەندى وسىنداي جالعان مالىمدەمەلەر جاسالعاننان كەيىن ءبىز وتە ساق بولۋعا ءتيىسپىز، سەبەبى وسى جالعان تۇجىرىمدى پايدالانا وتىرىپ، رەسەيدىڭ ءوزى حيميالىق قارۋ قولداناتىن وپەراسياسىن جوسپارلاپ جاتقان بولۋى مۇمكىن" دەدى ناتو باس حاتشىسى.
ەگەر رەسەي حيميالىق شابۋىل جاساسا، وندا بۇل اسكەري قىلمىس بولادى دەدى ول.
وسىعان دەيىن رەسەي سىرتقى ىستەر مينيسترلىگى ۋكراينا رەسەي شەكاراسىنا جاقىن جەردە ارنايى بيوزەرتحانالاردا بيولوگيالىق قارۋدىڭ كومپونەنتتەرىن دايىندادى دەپ مالىمدەگەن.
ۋكراينا قارۋلى كۇشتەرىنىڭ مالىمەتىنشە، رەسەي ارمياسى سوعىستا 12 مىڭنان استام سولداتىنان ايىرىلعان. اسكەري ساراپشىلار 2-4 مىڭ ارالىعىندا رەسەي سولداتى قازا بولدى دەپ سانايدى. ال رەسەي قورعانىس مينيسترلىگى ودان دا از كورسەتكىشتى ايتادى.
ءبىر كۇن بۇرىن ۋكراينا پرەزيدەنتى ۆلاديمير زەلەنسكيي شەتەل جۋرناليستەرىنە 24 اقپاننان بەرى شامامەن 1300 ۋكراين جاۋىنگەرى قازا بولدى دەپ مالىمدەگەن.
