رەسەيدىڭ قىتايمەن "ءسىبىر كۇشى - 2" گاز قۇبىرىن سالۋ تۋرالى كەلىسىمگە كەلۋ ارەكەتتەرى باعا ساياساتىنداعى كەلىسپەۋشىلىكتەر مەن بەيجىڭ ماسكەۋدەن ساتىپ العىسى كەلەتىن گاز مولشەرىنە بايلانىستى توقتاپ قالدى. بۇل تۋرالى Financial Times گازەتى كەلىسسوزدەردىڭ بارىسىمەن تانىس ءۇش دەرەككوزگە سىلتەمە جاساپ جازدى، دەپ حابارلايدى Alash.kz سايتى Inbusiness.kz سايتىنا سىلتەمە بەرە وتىرىپ.
باسىلىمنىڭ دەرەككوزىنىڭ ايتۋىنشا، جۇڭگو "ءسىبىر كۇشى - 2" ارقىلى جەتكىزىلەتىن گاز ءۇشىن مەملەكەتتىك سۋبسيديالاردىڭ ارقاسىندا بەلگىلەنگەن دەڭگەيدە ساقتالىپ كەلگەن رەسەيدەگى وتىننىڭ ىشكى باعاسىنا جاقىن باعانى تولەگىلەرى كەلەدى. سونىمەن قاتار، بەيجىڭ گاز قۇبىرىنىڭ قۋاتى جەتكىزە الاتىن وتىن كولەمىنىڭ از عانا بولىگىن ساتىپ الۋعا دايىن.
بۇل ماسەلەدەگى كەلىسپەۋشىلىكتەر "گازپروم" جاق باسقارما جانە ديرەكتورلار كەڭەسىنىڭ ءتوراعاسى الەكسەي ميللەردىڭ 2024 جىلدىڭ مامىرىندا رەسەي پرەزيدەنتى ۆلاديمير ءپۋتيننىڭ قىتايعا ساپارىنا بىرگە ەرىپ بارماۋىنا سەبەپ بولعان.
قۇبىر مامىلەسى پۋتين مەن سي ءسزينپيننىڭ كەزدەسۋ بارىسىندا تالقىلاعان ءۇش نەگىزگى تاقىرىپتىڭ ءبىرى بولدى، دەپ حابارلايدى FT دەرەككوزدەرى. قالعان ماسەلەلەر — رەسەي فەدەراسياسىنداعى جۇڭگو بانكتەرىنىڭ بەلسەندىلىگىن ارتتىرۋ تۋرالى وتىنىشتەر مەن بەيجىڭدى ماۋسىم ايىنىڭ ورتاسىندا شۆەيساريادا وتەتىن ۋكراينا بويىنشا بەيبىت كونفەرەنسياعا نەمقۇرايلى قاراۋعا شاقىرۋ.
ميللەردىڭ مۇنداي ماڭىزدى كەلىسسوزدەردە بولماۋى "وتە سيمۆولدىق" بولدى، دەپ اتاپ ءوتتى كولۋمبيا ۋنيۆەرسيتەتىنىڭ جاھاندىق ەنەرگەتيكالىق ساياسات ورتالىعىنىڭ عىلىمي قىزمەتكەرى تاتيانا ميتروۆا.
سونىمەن بىرگە، بەيجىڭنىڭ "ءسىبىر كۇشى - 2" تۋرالى قاتاڭ ۇستانىمى رەسەيدىڭ ۋكرايناعا تولىق باسىپ كىرۋى ءپۋتيندى ەكونوميكالىق قولداۋ تۇرعىسىنان بەيجىڭگە قالاي تاۋەلدى ەتەتىنىن كورسەتەدى، دەپ جازادى گازەت.
