ءتىرى بولسام، قازاققا قىزمەت ەتپەي قويمايمىن!

ءاليحان بوكەيحان

بالاڭدى ءولتىرىپ، بەرمەسەم نە ىستەر ەدىڭ: پولكوۆنيك اۋرۋحانادا جاتقان ساربازدىڭ اناسىمەن تىرەستى

30 مامىر 2024 1538

اسكەردەن ولىمشە بوپ كەلگەن ەربايان ەسىمدى ساربازدىڭ اۋرۋحانادا جاتقانىنا بەس اي بولدى. اناسى ادىلدىك ىزدەۋدە،دەپ حابارلايدى Alash.kz Azattyq Ruhy سايتىنا سىلتەمە جاساپ.

كەتەرىندە دەنساۋلىعىندا كىنارات بولماعان، جاس جىگىتتىڭ دارەتحانادا قۇلاعاننان اۋىر جاراقات العانى اتا-انانىڭ كوڭىلىنە كۇدىك ۇيالاتقان. ەرباياننىڭ اناسى گۇلسىم قامييەۆا سول كۇنگى كازارماداعى بەينەباقىلاۋ كامەراسىنىڭ جازباسىن كورگەن.

«4 جەلتوقسان كۇنى تۇنگى ساعات ەكىنىڭ كەزىندە بولعان. ساعات 2.04-تە 6-شى روتانىڭ سەرجانتى سوۆەت سايلاۋبەك دارەتحاناعا كىرەدى. ارتىنان 5-روتانىڭ ساربازى دانيال جۇماقۇلوۆ كىرەدى، سوسىن قايتا شىعىپ ساربازدار جاتقان بولمەگە كەلەدى. سول كەزدە ەرباياندى وياتۋعا كەلگەن دەپ ويلايمىن. جۇماقۇلوۆ دارەتحاناعا قايتا كەلەدى. ەربايان ونىڭ ارتىنان ساعات 2.15-تە دارەتحاناعا كىرەدى. ەكى مينۋتتان كەيىن جۇماقۇلوۆ شىعىپ، كەزەكشىگە ەرباياننىڭ قۇلاپ قالعانىن ايتادى. سول جەردە سەرجانتى بار، تاعى سارباز ەرباياندى كوتەرىپ سانيتار بولىمىنە اپارعان. جولشىباي جەرگە قانى تامشىلاعان. ولار نەگە قۇلاعان بالانى قوزعايدى؟ نەگە سول جەرگە دارىگەر شاقىرمايدى؟ جەدەل-جاردەمدى تاڭعى 4-تە ءبىر-اق شاقىرعان.

قايتىپ كەلگەن سوڭ، ساربازدار ورىندارىنا جاتۋعا كەتەدى. ءبىراق سەرجانت كەتپەي ءجۇرىپ الادى، باسىن ۇستاپ قويادى. ءبىر نارسەگە الاڭداعانى بىلىنەدى. كەزەكشىگە جولداعى قاندى سۇرتكىزەدى. دارەتحانانى نۇسقايدى، «كىر» دەيدى. كەزەكشى اجەتحانادان سوۆەت سايلاۋبەكتىڭ بەلدىگىن الىپ شىعادى دا وزىنە بەرەدى. مەن سەرجانتتان سۇرادىم: «بەلىڭدە ءبىر بەلبەۋ تۇر، ەكىنشىسىن نە ىستەۋگە الدىڭ؟» دەدىم، ول «مەنىڭ ەكى بەلبەۋ تاعاتىن ادەتىم بار» دەدى. «ەندەشە ەكىنشى بەلدىگىڭدى نەگە اجەتحاناعا تاستاپ كەتتىڭ؟» دەگەن سۇراعىما جاۋاپ بەرە الماي قالدى»، - دەيدى ەرباياننىڭ اناسى.

ايتۋىنشا، جەدەل-جاردەم كولىگى ەرباياندى №12 قالالىق اۋرۋحاناعا الىپ كەتكەن، تاڭعى ساعات 10-دا ساربازدىڭ وپەراسيا جاسالىپ، 12-دە اياقتالعان. وتا جاسالام دەگەنشە ارادا 6 ساعات ءوتىپ، جىگىتتىڭ جاعدايى اۋىرلاپ كەتكەن.

AMP

كۇن سايىن جاراتقاننان بالاسىنىڭ دەنساۋلىعىن سۇراپ، جانىن شۇبەرەككە ءتۇيىپ وتىرعان اتا-انا ەرباياننىڭ ءوزى قۇلاپ، وتە اۋىر جاعدايعا تۇسكەنىنە سەنبەيدى.

«ادام قۇلاعاندا قولىن، يىعىن جەرگە تىرەپ، قورعانادى عوي؟! دارىگەرلەردىڭ ءوزى ادام جىعىلعاننان مۇنداي جاراقات الۋى مۇمكىن ەمەس ەكەنىن ايتىپ جاتىر. بالانىڭ مۇرنى سىنعان، توبەسىندە تاعى دا جاراقاتى بار، باسىنىڭ وڭ جاعى مەن ارتىنان سوققى العان. باسشىلار وزدەرىن كىنالى سانامايدى، قۇلاپ قالدى دەگەننەن اينىماي وتىر. ساراپتاما جاساعان پوليسيا كاپيتانى اسىلحان انقابايەۆ تا «باسى اينالىپ، قۇلاعان» دەپ جازىپ بەرگەن. ادىلدىك ىزدەپ بارماعان جەرىمىز، جازباعان ارىزىمىز قالمادى. ەشكىم ءۇن قاتقان ەمەس. اسكەري پوليسياعا ارىز جازدىق، ەشقانداي ءىس اشقان جوق، پروكۋراتۋراعا دا باردىق»، - دەيدى اشىنعان انا.

بۇعان دەيىن الماتىداعى اسكەري ءبولىمنىڭ الدىنا جۋرناليستەردى شاقىرىپ، جيىن دا وتكىزگەن. ب ا ق بەتتەرىندە جاريالاعان.

«سول جەردە ق ر ۇلتتىق ۇلانى «وڭتۇستىك» وڭىرلىك قولباسشىسىنىڭ ورىنباسارى، پولكوۆنيك نيازتاي الكەشيەۆ، تاربيە جونىندەگى كوماندير، اسكەري دارىگەر بولدى. دارىگەر ەرباياننىڭ سول كۇنى قىزۋى 36،7 گرادۋس بولىپ، باسى اينلاپى قۇلادى دەپ تۇر. بۇل ادامنىڭ ساۋ كەزىندەگى دەنە تەمپەراتۋرا ەمەس پە؟! ودان ادام قالاي قۇلايدى؟ ال، وپراتورلار كامەراسىن وشىرگەن بويدا، پولكوۆنيك نيازتاي الكەشيەۆ ماعان قاراپ، «بالاڭدى ءولتىرىپ تاستاپ، بەرمەي قويسام، ماعان نە قىلار ەدىڭ؟» دەپ ايتتى»، - دەيدى گۇلسىم قامييەۆا.

مۇحتار ەرباياننىڭ ءۇش باۋىرى بار، ءوزى ءۇيدىڭ تۇڭعىشى. اناسىنىڭ ايتۋىنشا، ەتى ءتىرى، ومىرگە قۇلشىنىسى جوعارى، اقكوڭىل، مەيىرىمدى، ۇنەمى السىزدەرگە كومەكتەسىپ جۇرەتىن اقجارقىن جىگىت. باۋىرمالدىعى سونداي، قولىنداعى اقشاسىن، «ونىڭ ماماسى جوق قوي، پاپاسى جوق قوي» دەپ، تانيتىن بالالارعا جانى اشىپ، بەرىپ جۇرەتىن. جاستايىنان العىر، ءارى سپورتقا جاقىن بولىپ وسكەن. فۋتبول كوماندالارىنىڭ قۇرامىندا بولىپ، ماقتاۋ ەستىپ، ماراپاتتالىپ جۇرەتىن. استانادا جوعارى وقۋ ورنىنا ءوز كۇشىمەن ءتۇسىپ، ەڭبەككە دە ەرتە ارالاسقان.

AMP

گۇلسىم قامييەۆا «جوو-دا ءبىلىم الىپ جۇرگەن ەرباياندى اسكەريلەر وقۋىنا قاراماستان، مەديسينالىق تەسەرۋدەن وتكىزەمىز دەگەن سىلتاۋمەن اسكەرگە الىپ كەتتى» دەيدى.

«جارقىراپ تۇرعان بالامنىڭ قازىرگى كۇيى ادام شوشىرلىق. اۋرۋحانا توسەگىنە تاڭىلىپ، وزدىگىنەن تاماق ىشە المايدى، قوزعالا دا، سويلەي دە المايدى، دارەتكە وزدىگىنەن شىعا المايدى. قابىرعاسىن ساناپ الارلىقتاي، تەرىسى سۇيەگىنە جابىسىپ قانا تۇر. ەم-دومىن جاساپ جاتىرمىز دەيدى، ءبىراق ەش ناتيجە جوق. بۇرىن اۋزى جىبىرلايتىن ەدى، ءقازىر ول دا جوق. بارسام، ماعان قاراماي جاتادى. «نەگە الىپ كەتپەيسىڭ» دەپ رەنجيتىن سياقتى. ەڭ قۇرىعاندا استاناعا جەتكىزىپ بەرسە ەكەن دەيمىن. قاسىمدا بولسا ەكەن دەيمىن. مەنى بالامنىڭ قاسىنا 5 مينۋتقا قانا كىرگىزەدى. ودان ارتىق وتىرعىزبايدى»، - دەيدى كومەيىنە وكسىك تىعىلعان انا.

گۇلسىم قامييەۆانىڭ ايتۋىنشا، دارىگەرلەر ەرباياننىڭ دەنساۋلىعى جول كولىگىمەن استاناعا الىپ كەتۋگە جارامايتىنىن، تەك قانا ساناۆياسيامەن الىپ كەتۋ كەرەك ەكەنىن ايتقان.

AMP

بيىل 28 مامىردا ساربازدىڭ تۋىستارى قايرات ۇمبەتوۆپەن كەزدەسىپ، ساناۆياسيا قىزمەتىنە قول جەتكىزەدى. الايدا، وسى ۋاقىتقا دەيىن ەرباياننىڭ دەنساۋلىعى ۇشاققا مىنگىزۋگە جارامدى دەپ كەلگەن دارىگەرلەردىڭ ءسوزى جالعان بولىپ شىققان. ناۋقاستىڭ ميىندا ىسىك بارى، وكپەسىنىڭ پنيەۆمونيا اۋرۋىنا شالدىققانى انىقتالادى. وسى سەبەپتى، ەرباياننىڭ اعايىندارى ونى استاناعا اۋىستىرۋدان باس تارتقان.

«سول كەزدە دارىگەردىڭ ءوڭى بۇزىلىپ، داۋسى قاتايدى. ءبىزدىڭ الىپ كەتپەيمىز دەگەن سوزىمىزگە شامداندى. وعان كوپ قوڭىراۋلار تۇسە باستادى. ءتىپتى، الىپ كەتپەسەڭدەر، پالاتاعا شىعارىپ تاستايمىز دەپ قورقىتتى»، - دەيدى ساربازدىڭ اعاسى.

" alt="" aria-hidden="true" />AMP

ەرباياننىڭ اعاسى ناۋرىزبايدىڭ ايتۋىنشا، ءقازىر تەرگەۋ ىستەرى دە توقتاپ تۇر. جاۋاپتى ادامداردان كۋاگەر رەتىندە عانا كۋالىك الىنعان. ال وقيعا بولعاننان كەيىن اسكەري بولىمگە جۇرگىزىلگەن تەكسەرۋدىڭ ناتيجەسىندە سايكەسسىزدىك كوپ.

«قىزمەتتىك تەكسەرۋدىڭ قورىتىندىسىندا كوپ اقپارات قاتە جازىلعان. ەرباياننىڭ قۇلاعان جەرى 3-قابات دەپ كورسەتىلگەن، سول جەر فوتوعا ءتۇسىرىپ، وتىرىك سۋرەتتەردى كورسەتىپ ءجۇر. مەن كافەلدەردى سانادىم، ولار سايكەس كەلمەيدى. شىندىعىندا ءىنىمدى 2-قاباتتاعى دارەتحانادان الىپ شىققان. بەينەجازبادا ءبارى كورىنىپ تۇر. ءقازىر دارەتحاناعا دەرەۋ جوندەۋ جۇمىستارىن باستاپ كەتكەن. ال ءبىزدىڭ قولىمىزداعى ۆيدەو، فوتولار ايعاق رەتىندە ىسكە سانالمايدى دەپ وتىر»، - دەدى ناۋرىزباي.

بەيبىت كۇنى اسكەرگە بارىپ، دەنساۋلىعىنان ايىرىلعان ەرباياننىڭ جاقىندارى اسكەريلەردەن باستاپ دارىگەرلەرگە دەيىن كىنالى ادامداردىڭ جازالانعانىن تالاپ ەتىپ وتىر. بۇگىن ولار الماتىدا جۋرناليستەرگە ارناپ تاعى دا جيىن وتكىزەدى.

بۇل ماقالا تۋرالى نە ويلايسىز؟