ءتىرى بولسام، قازاققا قىزمەت ەتپەي قويمايمىن!

ءاليحان بوكەيحان

ەندى زاڭ جوباسىنىڭ بارلىعى تەك قازاق تىلىندە قابىلدانا ما؟

28 مامىر 2024 329

ادىلەت مينيسترلىگى نورماتيۆتىك قۇقىقتىق اكتىلەردىڭ جوبالارىن ورىس تىلىنە اۋدارۋدى قامتاماسىز ەتە وتىرىپ، قازاق تىلىندە ازىرلەۋ تاجىريبەسىن ەنگىزبەكشى، دەپ حابارلايدى Alash.kz Kursiv سايتىنا سىلتەمە جاساپ.

بۇل جايلى 27 مامىر كۇنى مەملەكەتتىك ءتىل ساياساتىن ىسكە اسىرۋ جونىندەگى كوميسسيانىڭ وتىرىسندا ادىلەت ءمينيسترى ازامات ەسقارايەۆ ايتتى.

«مەملەكەتتىك تىلدە زاڭ ازىرلەۋ ماسەلەسى تۋرالى» بايانداما وقىعان مينيستر قازاق ءتىلىن ودان ءارى دامىتۋ ماقساتىندا نورماتيۆتىك قۇقىقتىق اكتىلەردىڭ جوبالارىن ورىس تىلىنە اۋدارۋدى قامتاماسىز ەتە وتىرىپ، ولاردى قازاق تىلىندە ازىرلەۋ مىندەتىن كەزەڭ-كەزەڭىمەن زاڭنامالىق نەگىزدە بەكىتۋ مۇمكىندىكتەرى پىسىقتالىپ جاتقانىن ايتتى.

ول ءتىل ماسەلەسىن دامىتۋ ءۇشىن ەكى باعىتتاعى جۇمىستاردى جۇزەگە اسىرۋ ماڭىزدى دەپ سانايدى.

ءبىرىنشى باعىت – تەرمينولوگيا ماسەلەسىن شەشۋ. زاڭنامالىق اكتىلەردىڭ ماتىنىنە قويىلاتىن تالاپتاردىڭ ءبىرى – تەرميندەردىڭ بىرىزدىلىگى. ەسقارايەۆ رەسپۋبليكالىق تەرمينولوگيالىق كوميسسيا بەكىتكەن تەرميندەر ۇسىنىمدىق سيپاتقا يە ەكەنىن، سوندىقتان، ءىس جۇزىندە، كوميسسيا ماقۇلداعاننان كەيىن دە، زاڭگەرلەر مەن فيلولوگتار اراسىندا ءبىر تەرميندى ءارتۇرلى ەتىپ اۋدارۋ توڭىرەگىندە پىكىرتالاستار ءجيى تۋىندايتىنىن ايتادى. سوندىقتان دا قازاقشا تەرمينولوگيالىق سوزدىكتەرگە رەسمي مارتەبە بەرۋ جانە ولاردى نورماشىعارۋ پروسەسىندە قولدانۋدىڭ مىندەتتىلىگىن ەنگىزۋ قاجەت دەپ سانايدى.

ال ەكىنشى باعىت – ءتيىستى ۇيىمداستىرۋشىلىق شارالاردى قابىلداۋ. وسى ماقساتتا مينيسترلىك زاڭ جوبالارىن مەملەكەتتىك تىلدە ازىرلەۋ بويىنشا مامانداردان زاڭگەرلەردەن جانە عالىمداردان قۇرالعان پۋل ءتىزىمىن قالىپتاستىرىلعان. بولاشاقتا سول مامانداردى زاڭ جوبالارىن ازىرلەۋ پروسەسىنە تارتۋ كوزدەلىپ وتىر.

«قازاق ءتىلى زاڭ جازۋعا، نورماتيۆتىك قۇجاتتاردى تۇزەۋگە «يكەمسىز» دەگەن تۇسىنىكتەن ارىلىپ، مەملەكەتتىك ءتىلدىڭ مول مۇمكىندىگىن كەڭىنەن پايدالانۋ قاجەت. الداعى ۋاقىتتا بۇل ماسەلەدە جاقسى ناتيجەلەرگە قول جەتكىزەتىنىمىزگە سەنىمدىمىن»،- دەدى مينيستر.

بۇل ماقالا تۋرالى نە ويلايسىز؟