ءتىرى بولسام، قازاققا قىزمەت ەتپەي قويمايمىن!

ءاليحان بوكەيحان

"قازاقستانعا ۇلكەن ءقاۋىپ..."

19 قىركۇيەك 2022 57
بەلگىلى ساياساتكەر دوس كوشىم قىرعىزستان مەن تاجىكستان شەكاراسىنداعى قاقتىعىسقا قاتىستى ءوز پىكىرىن ءبىلدىردى. ونىڭ ايتۋىنشا، ەكى ەل اراسىنداعى تەكە-تىرەسكە كەڭەس ۇكىمەتى كەزىندەگى شەكارانى بەلگىلەۋدە كەتكەن قاتە سەبەپ، دەپ حابارلايدى Alash.kz.


قىرعىز-تاجىك شەكاراسىنداعى اتىستان 59 ادام قازا تاۋىپ، 100-دەن استامى جارالاندى. قىرعىزستان بيلىگى 140 مىڭعا جۋىق ادامىن ءقاۋىپسىز جەرگە كوشىردى. بۇل ەكى ەل اراسىندا بولىپ جاتقان العاشقى قاقتىعىس ەمەس.




2021 جىلدىڭ كوكتەمىندە شەكاراداعى شيەلىنىستەن ونداعان ادام كوز جۇمعان بولاتىن. ساياساتكەر دوس كوشىم مۇنىڭ سەبەبىن كەڭەس ۇكىمەتى كەزىندەگى كەتكەن قاتەلەردىڭ سالدارىنان ىزدەيدى. ول بۇل جاعداي قازاقستاندا دا بولۋى مۇمكىن ەكەنىن جاسىرمايدى.




"كەڭەس ۇكىمەتى كەزىندە رەسپۋبليكالار اراسىنداعى شەكارانى بەلگىلەۋدە كوپ قاتە كەتكەن. اركىم ءالى كۇنگە مىناۋ مەنىڭ جەرىم دەپ ءجۇر. بۇل — ءبىرىنشى ماسەلە. ال ەكىنشىسى، مەنىڭ ويىمشا، كەلەشەكتە ورتالىق ازيا، سونىڭ ىشىندە قازاقستانعا ۇلكەن ءقاۋىپ بولاتىن ول سۋ ماسەلەسى. بىزگە دە وسى قىرعىز، وزبەكستان جاقتاعى سۋ رەسۋرستارىنا قاتىستى ۇلكەن ماسەلەلەر بار. ونى ايتىپ تا، ءبىلىپ تە وتىرمىز. وسى ەكى نەگىزگى ماسەلە شەكاراداعى قاقتىعىسقا الىپ كەلىپ وتىر"، — دەدى دوس كوشىم.




ايتا كەتەيىك، ەكى ەلدىڭ باسشىلارى قىركۇيەكتىڭ 16-دا اتىستى توقتاتۋ تۋرالى كەلىسىمگە كەلگەن بولاتىن. ءبىراق سوعان قاراماستان شەكاراداعى جاعداي ءالى ۋشىعىپ تۇر. دۋشانبە قاقتىعىستى قىرعىزستاننىڭ شەكارا اسكەرلەرى تۋدىردى دەسە، بىشكەك تاجىكستان ارانداتۋشىلىق جاسادى دەپ ايىپتادى. ساياساتكەر اتىستى توقتاتۋدىڭ بىرنەشە جولى بار دەيدى.




"ەكى ەلدىڭ باسشىلارى ءوزارا اتىستى توقتاتۋعا كەلىسكەنمەن، جەرگىلىكتى حالىقتىڭ ءوزارا بىر-بىرىنە دەگەن وشپەندىلىگى بار. ويتكەنى ەكى جاقتان كوپ ادام كوز جۇمدى، بۇل قاندى كەككە ۇلاسىپ كەتۋى مۇمكىن. بۇل تەكە-تىرەس تەك ءۇشىنشى مەملەكەت ارلاسقاندا عانا نەمەسە حالىقارالىق ۇيىمدار ورتاعا تۇسكەندە عانا شەشىلەدى. قىرعىزدىڭ سانى از بولعانىمەن، كۇشى كوپ. ۇمىتپاسام تاجىكتەر 9 ميلليوننىڭ ۇستىندە، ال قىرعىزدار التى ميلليونداي عانا. ال قارۋ-جاراعىن سالىستىرساق، قىرعىزدار تاجىكستانعا قاراعاندا اسكەرى كوپ. سوندىقتان يت-جىعىس تۇسەتىن مەملەكەتتەر اراسىنداعى سوعىس ءاردايىم ۇزاققا سوزىلادى"، — دەدى ساياساتكەر.

بۇل ماقالا تۋرالى نە ويلايسىز؟