قازاقستاننىڭ 62 كولونياسىندا 32 مىڭ ادام جازاسىن وتەپ جاتىر. بۇل تۋرالى ىشكى ىستەر مينيسترلىگىنىڭ رەسمي وكىلى شىڭعىس الەكەشيەۆ مالىمدەدى، دەپ حابارلايدى Alash.kz سايتى.
ونىڭ ايتۋىنشا، ءقازىر ەلىمىزدە 78 مەكەمە جۇمىس ىستەيدى: 62 باس بوستاندىعىنان ايىرۋ تۇرىندەگى جازانى وتەۋ ورنى جانە 16 تەرگەۋ يزولياتورى.
«وندا 37 مىڭ ادام بار: ونىڭ 32 مىڭى سوتتالعاندار، ال 5 مىڭى تەرگەۋ كەزىندە قاماۋعا الىنعاندار. سوتتالعانداردىڭ قۇقىقتارى مەن زاڭدى مۇددەلەرىنىڭ بۇزىلۋىنا جول بەرمەۋ جانە مەكەمە قىزمەتكەرلەرىنىڭ اراسىنداعى ءتارتىپتى قامتاماسىز ەتۋ ماقساتىندا پرەزيدەنت بارلىق كولونياعا بەينەباقىلاۋ جۇيەسىن ەنگىزۋدى تاپسىرعان بولاتىن. بۇگىنگى تاڭدا 39 مىڭنان استام بەينەكامەرا ورناتىلعان»، - دەپ جازدى Azattyq Ruhy بريفينگتەگى مالىمدەمەگە سىلتەپ.
بەينەكامەرالاردا اناليتيكا جانە باقىلاۋ فۋنكسيالارى قاراستىرىلعان. سونداي-اق، تىيىم سالىنعان ايماققا كىرگەن نەمەسە وبەكتيۆى جابىلعان كەزدە دابىل جىبەرەتىن مۇمكىندىگى بار. ونداعى بەينە قىلمىستىق-اتقارۋ جۇيەسى كوميتەتىنىڭ احۋالدىق ورتالىعىنا، سونداي-اق، پروكۋراتۋرا ورگاندارىنا شىعارىلعان. بۇل جاعدايدى ناقتى ۋاقىت رەجيمىندە تۇراقتى تۇردە باقىلاۋعا مۇمكىندىك بەرەدى.
الەكەشيەۆتىڭ سوزىنە سەنسەك، بۇل شارالار وڭ ناتيجە بەرىپ وتىر.
«قىزمەتكەرلەردىڭ زاڭسىز ارەكەتتەرىنە قاتىستى شاعىمدار 8 ەسە قىسقاردى. جۇيە ىسكە قوسىلعان ساتتەن باستاپ سوتتالعاندار تاراپىنان جاسالعان 24 مىڭعا جۋىق زاڭ بۇزۋشىلىق انىقتالدى. 43 سۋيسيد جانە 4 قاشۋ ارەكەتىنىڭ الدىن الدى، ياعني جول بەرىلمەدى. تارتىپسىزدىككە ۇلاسۋى مۇمكىن 9 جانجال دەر كەزىندە توقتاتىلدى»، - دەدى ءىىم رەسمي وكىلى.
بۇدان بولەك بەينەكامەرالاردىڭ ارقاسىندا تىيىم سالىنعان زاتتاردى جەتكىزبەك بولعان 151 ادام ۇستالدى. ولار 267 تەلەفون، 33 ليتر سپيرتتىك ىشىمدىك پەن 2 كەلىگە جۋىق ەسىرتكى الىپ كىرمەك بولعان.
ءقازىر اكىمشىلىك جانە قىلمىستىق جاۋاپكەرشىلىككە 58 ادام تارتىلىپ وتىر. 88 ادامعا قاتىستى سوت شەشىمى شىقتى.
