قازاقستاننىڭ تاياۋ شىعىس ەلدەرىنە جىبەرىلەتىن ساربازدارى رەزەرۆتە بولادى. كومەندانتتىق ساعاتتا ءجۇرىپ، بۇۇ نىساندارىن قورعايدى. پاترۋل جۇرگىزەدى. مارش جاسايدى، باسقا دا فۋنكسيونالدىق مىندەتتەردى ورىندايدى.
پارلامەنت پالاتالارىنىڭ بىرلەسكەن وتىرىسىندا پرەزيدەنتى قاسىم-جومارت توقايەۆتىڭ بۇۇ ميسسيالارىنا قاتىسۋ ءۇشىن قازاقستان قارۋلى كۇشتەرىنىڭ بىتىمگەرشىلىك كونتينگەنتىن جىبەرۋ تۋرالى ۇسىنىسى ماقۇلداندى.
وتىرىستا قورعانىس ءمينيسترى رۋسلان جاقسىلىقوۆ 2014 جىلدان باستاپ قازاقستاننىڭ 67 وفيسەرى بۇۇ-نىڭ باتىس ساحاراداعى، كوت-د’يۆۋارداعى، ماليدەگى، ورتالىق افريكا رەسپۋبليكاسىنداعى جانە ليۆانداعى ميسسيالارىنا اسكەري بايقاۋشى جانە شتابتىق وفيسەر رەتىندە قاتىسقانىن اتاپ ءوتتى. 2018 جىلدان باستاپ قازاقستان 538 اسكەري قىزمەتشىسى بىتىمگەرشىلىك بولىمشە قۇرامىندا «بۇۇ-نىڭ ليۆانداعى ۋاقىتشا كۇشتەرى» ميسسياسىنا قاتىسقان
ءقازىر دە قازاقستاننىڭ اسكەريلەرى بۇۇ-نىڭ ميسسيالارىندا: باتىس ساحارادا 6 وفيسەر، ورتالىق افريكادا 2 وفيسەر، كونگودا 2 وفيسەر، ليۆاندا 9 اسكەري قىزمەتشى قىزمەت وتكەرىپ جاتىر.
– بىتىمگەرشىلىك ميسسيالارىن قىسقارتۋ اياسىندا بىتىمگەرشىلىك اسكەري كونتينگەنتتى جەتكىزۋشى ەلدەر اراسىندا باسەكەلەستىك ارتۋدا. بۇۇ-نىڭ بىتىمگەرشىلىك قىزمەتى شەڭبەرىندە قازاقستاننىڭ پوزيسياسىن بەكىتۋ ماقساتىندا بۇۇ جارعىسىنىڭ VII تاراۋى اياسىندا قازاقستان قارۋلى كۇشتەرىنىڭ بۇۇ-نىڭ تاياۋ شىعىستاعى، وڭتۇستىك سۋدان رەسپۋبليكاسىنداعى جانە ابەيدەگى بىتىمگەرشىلىك ميسسيالارىنا قاتىسۋ گەوگرافياسىن بىرتىندەپ كەڭەيتۋدى ورىندى دەپ سانايمىن جانە جالعاستىرۋدى ۇسىنامىن. گەوساياسي شيەلەنىستىڭ ءورشۋى جاعدايىندا وڭىرلىك جانە ۇلتتىق قاۋىپسىزدىككە تونەتىن جاڭا سىن-قاتەرلەر پايدا بولۋدا، ولاردىڭ ءبىر بولىگى اسكەري ادىستەرمەن دەن قويۋدى تالاپ ەتۋى مۇمكىن. وسىعان بايلانىستى اسكەردىڭ جاۋىنگەرلىك دايارلىعىن ودان ءارى نىعايتۋ جانە قازىرگى زامانعى قاتەرگە قارسى ءىس-قيمىل جاساۋدا پراكتيكالىق تاجىريبە يگەرۋ ماسەلەسى اسا وزەكتى. بۇۇ-نىڭ ميسسيالارىنا قاتىسۋ قازاقستاننىڭ قارۋلى كۇشتەرىنە اسكەرلەردىڭ جاۋىنگەرلىك ماشىقتارىن جەتىلدىرۋ ءۇشىن پايدالانىلاتىن، بىتىمگەرشىلىك وپەراسيالارعا ءتان قاجەتتى جاۋىنگەرلىك داعدىلارعا قول جەتكىزۋگە مۇمكىندىك بەرەدى، – دەيدى رۋسلان جاقسىلىقوۆ.
ءمينيستردىڭ ايتۋىنشا، قارۋلى كۇشتەردىڭ اسكەري بايقاۋشى جانە شتابتىق وفيسەر رەتىندە جەكەلەگەن اسكەري قىزمەتشىلەردى، سونداي-اق بۇۇ ميسسيالارىندا بارىنشا سۇرانىسقا يە بولىپ وتىرعان جاياۋ اسكەر، مەديسينالىق، بارلاۋ، ينجەنەرلىك مامانداندىرىلعان بولىمشەلەردى بولۋگە دايىن.
– بۇۇ-نىڭ گولان بيىكتىكتەرىندەگى ءبولۋدى بايقاۋ كۇشتەرى» ميسسياسىنا رەزەرۆتەگى روتا رەتىندە 139 اسكەري قىزمەتشىدەن تۇراتىن ءبىرىنشى دەربەس ۇلتتىق بىتىمگەرشىلىك كونتينگەنتتى ءوزىنىڭ اسكەري تەحنيكاسىمەن، قارۋ-جاراعىمەن جانە مۇلكىمەن جىبەرۋدى ەرەكشە اتاپ ءوتۋ قاجەت. ورىستەتۋدى 2024 جىلعى ناۋرىزدان باستاپ جۇرگىزۋ جوسپارلانۋدا. ول ءۇشىن بۇۇ-مەن تاراپتاردىڭ مىندەتتەمەلەرىن، سونداي-اق كونتينگەنتتىڭ ميسسياعا قاتىسۋىن قارجىلىق جانە ماتەريالدىق-تەحنيكالىق جاعىنان قامتاماسىز ەتۋ ماسەلەلەرىن ايقىندايتىن حالىقارالىق شارت جاسالادى (راتيفيكاسيالانۋعا ءتيىس). كونتينگەنتتى جانە مۇلىكتى تاسىمالداۋ قازاقستان تارابىنىڭ ەسەبىنەن جۇزەگە اسىرىلادى. ورىستەتۋ مەرزىمى بەلگىلەنگەن ناقتى بولىمشەلەر مەن وپەراسيالار بۇۇ-نىڭ حاتشىلىعىمەن جۇمىس بارىسىندا ايقىندالاتىن بولادى. ءاربىر جەكە ورىستەتۋ (بىتىمگەرشىلىك وپەراسيا) ءۇشىن ءتيىستى نورماتيۆتىك-قۇقىقتىق بازا (مەموراندۋم) ازىرلەنەدى، – دەيدى ول.
وسى ايتىلعانداردىڭ نەگىزىندە كونستيتۋسياسىنىڭ 53-بابىنىڭ 5 تارماقشاسىنا سايكەس بۇۇ-نىڭ مىنا ميسسيالارىنا:
- 1) «بۇۇ-نىڭ گولان بيىكتىكتەرىندەگى ءبولۋدى بايقاۋ كۇشتەرىنە» (UNDOF، سيريا – يزرايل)؛
- 2) «بۇۇ-نىڭ بىتىمگە كەلۋ شارتتارىنىڭ ورىندالۋىن بايقاۋ جونىندەگى ورگانىنا» (UNTSO، پالەستينا – يزرايل)؛
- 3) «بۇۇ-نىڭ وڭتۇستىك سۋدان رەسپۋبليكاسىنداعى ميسسياسىنا» (UNMISS، وڭتۇستىك سۋدان)؛
- 4) «بۇۇ-نىڭ ابەيدەگى قاۋىپسىزدىكتى قامتاماسىز ەتۋ جونىندەگى ۋاقىتشا كۇشتەرىنە» (UNISFA، سۋدان) قاتىسۋ ءۇشىن قازاقستان رەسپۋبليكاسى قارۋلى كۇشتەرىنىڭ سانى 430 ادامعا دەيىنگى بىتىمگەرشىلىك كونتينگەنتىن (رەزەرۆتەگى روتا، شتاب وفيسەرلەرى، اسكەري بايقاۋشىلار جانە مامانداندىرىلعان بولىمشەلەر) جىبەرۋ جونىندە ۇسىنىس ەنگىزىلگەن.
دەپۋتاتتار وسى ۇسىنىستى قولداپ داۋىس بەردى.
