قازاقستاندىق الپينيستەر كومانداسى Kazakh Everest Team سپورتتىق-پاتريوتتىق ەكسپەديسياسى اياسىندا ەۆەرەست شىڭىنا شىعۋدى جوسپارلاپ وتىر، دەپ حابارلايدى alash.kz ۇلتتىق وليمپيادالىق كوميتەتكە سىلتەمە جاساپ.
ەكسپەديسيانى الەمگە تانىمال الپينيست ماقسۇت جۇمايەۆ باسقارادى. ول ءوز مانسابىندا سەگىز مىڭ مەترلىك 14 شىڭدى باعىندىرعان. ونىڭ توبى جەتى ادامنان قۇرالعان. ىشىندەگى جالعىز ايەل ادام – انار بۋراشيەۆا.
قازىرگى تاڭدا كوماندا سوڭعى دايىندىق كەزەڭىن وتكەرۋدە. جاقىندا الپينيستەر كليماتقا بەيىمدەلۋ ماقساتىندا گيمالايداعى التى مىڭ مەترلىك شىڭداردىڭ ءبىرىن باعىندىرعان. ەندى ولار بيىكتىگى جونىنەن ءۇشىنشى لاگەرگە كوتەرىلىپ، كەيىن ەۆەرەستكە جول تارتپاق.
«جوبا اياسىندا ءبىز التى مىڭ مەترلىك ايلەند-پيك شىڭىنا شىقتىق. بۇل ەۆەرەستتىڭ ماڭىندا. دەنەمىز جوعارى گيپوكسيا جاعدايىنا ۇيرەنىسىپ، كليماتقا بەيىمدەلۋ ءۇشىن وسى قادامعا باردىق. قازىرگى تاڭدا ەۆەرەستتىڭ بازالىق لاگەرىندەمىز. ءتۇرلى دايىندىق كەزەڭدەرىنەن ءوتىپ جاتىرمىز. اتاپ ايتار بولسام، كۋمبۋ مۇزدىعىندا دايىندالۋدامىز. كليماتقا بەيىمدەلۋدىڭ سوڭعى كەزەڭىنەن ءوتۋ ءۇشىن ءۇشىنشى بيىكتىك لاگەرى قۇرىلعانىن كۇتۋدەمىز. سول جەردە تۇنەپ، كەيىن دەمالۋ ءۇشىن تومەنگە تۇسەمىز. بارلىق قازاقستاندىقتار ءۇشىن وسى شىڭدى باعىندىراتىمىزعا سەنەمىن. اناردىڭ بارلىق قىزعا ۇلگى بولعانىن قالايمىن. وسى ساپارىمىز ارقىلى ەڭبەك جولىندا جۇرگەن بارلىق سپورتشىلار مەن وليمپياداشىلاردى قولداعىمىز كەلەدى، - دەدى ماقسات جۇمايەۆ.
