قوعامدىق رەزونانس تۋدىرعان سالتانات نۇكەنوۆانىڭ ءولىمى - بار قازاقتىڭ قايعىسى. ايىپتالۋشى قۋاندىق بيشىمبايەۆ پەن بايجانوۆ جانە سالتانات نۇكەنوۆانىڭ رۋحاني، تۇلعالىق بولمىسى تۋرالى نۋمەرولوگيا ىلىمىنە ساي، ەزوتەريك اقبوتا ءابىلتاي تالداۋ جاساپ كوردى.Alash.kz پورتالىنىڭ ءتىلشىسى ەزوتەريك اقبوتا حانىممەن تىلدەستى.
-بيشىمبايەۆتىڭ پسيحولوگيالىق كەلبەتى قانداي؟ نۋمەرولوگيا بويىنشا تالداۋ بيشىمبايەۆ تۋرالى نە دەيدى؟
-نەگىزى نۋمەرولوگيا ادامنىڭ پسيحولوگيالىق كەلبەتىنە تولىقتاي جاۋاپ بەرە المايدى. ساندار تۇرعىسىنان بەلگىلى ءبىر دەڭگەيدە عانا سيپاتتاما بەرە الادى. ودان بولەك نۋمەرولوگياعا باعىنبايتىن جاۋاپكەرشىلىك، تاربيە، قۇندىلىق سياقتى دۇنيەلەر بار. سوندىقتان ادام بولمىسىنا تولىقتاي مىنەزدەمە بەرۋ مۇمكىن ەمەس.
ساندارىن قاراساڭ، قۋاندىق بيشىمبايەۆتىڭ دا، سالتانات نۇكەنوۆانىڭ دا پوتەنسيالى، قارىم-قابىلەتى زور. ەكى تالانتتى ادامنىڭ وسىنداي جاعدايعا ۇشىراعانى قيىن.
قۋاندىق بيشىمبايەۆتىڭ تاعدىر سانى 6. نۋمەرولوگياداعى ەڭ جاقسى ساننىڭ ءبىرى. ماحاببات، اسەمدىك پەن گارمونيا سانى. تاعدىر سانى التىلىق ادامداردىڭ ميسسياسى – گارمونياعا كەلۋ، ياعني ءومىرىنىڭ بار سالاسىن گارمونياعا جەتكىزۋ. ويى، ءسوزى، ءىسى، جان-دۇنيەسى ۇيلەسىمدە بولۋى كەرەك، ءۇيى، اينالاسى ادەمى، اسەم بولۋى كەرەك. ءبىراق ءتۇرلى فاكتورلاردىڭ سەبەبىنەن بۇل مىندەتتى ورىنداي الماعانىن كورىپ وتىرمىز.
نۋمەرولوگيالىق ماتريساسىندا ەكىلىكتەرى (222) مەن تورتتىكتەرى (444) كوپ. بۇل كومبيناسيا – الاپات كۇش. ەكىلىكتەر – بيوەنەرگيا، ىشكى قۋات، ەرىك-جىگەر كۇشى. ال تورتتىكتەر – ءتان الەۋەتى، اگرەسسيا. مۇنداي ادامنىڭ تابيعاتتان ءتان الەۋەتى جوعارى كەلەدى. سوندىقتان دۇرىس قۇندىلىقتاردى ۇستانىپ، تورتتىكتەردىڭ پوتەنسيالىن سپورت پەن جۇمىسقا جۇمساپ، پوزيتيۆ باعىتتا شىعارۋى كەرەك.
ولاي ەتپەگەن جاعدايدا ادام جۇدىرىق الا جۇگىرۋگە، تىزە باتىرىپ جىبەرۋگە بەيىم بولادى، ءتان قۇمارلىعىنا، اراق-شاراپ، جالپى ناپسىگە بوي الدىرادى. سەبەبى تورتتىكتەردىڭ كۇشى شىعاتىن جول ىزدەپ تۇرادى، پوزيتيۆ باعىتتا دامىتپاسا، نەگاتيۆ باعىتتا شىعىپ، ادامنىڭ وزىنە قارسى جۇمىس ىستەيدى. سپورت ارقىلى شىقپاعان پوتەنسيال اشۋ، اگرەسسيا ارقىلى شىعادى.
بىرلىكتەرى دە جەتكىلىكتى، ياعني وزىنە سەنىمدى، ءار نارسەگە ءوزىنىڭ كوزقاراسى بار. جالپى ەكى، ءتورت، التى – توپىراققا ءتان ساندار. قۋاندىقتىڭ ماتريساسىندا وسى ساندار كوپ، ياعني ادام بولمىسىندا ءزىل بار، اناۋ-مىناۋ دۇنيەگە شايقالىپ كەتپەيدى، ەرىك-جىگەر كۇشى دە، فيزيكالىق كۇشى دە كوپ، ومىرگە يكەمدى، تاۋ قوپارارلىق پوتەنسيالى بار. ءبىراق وسى قابىلەتتىڭ ءبارىن دۇرىس پايدالانا الۋ ءۇشىن اۋەلى قۇندىلىق دۇرىس بولۋى كەرەك. ءبىز ەندى ادامنىڭ قۇندىلىقتارىنا باعا بەرە المايمىز. ونى وزىنەن باسقا ەشكىم بىلمەيدى.
-سالتانات نۇكەنوۆانىڭ نۋمەرولوگيالىق تاڭباسى ونىڭ تاعدىرى تۋرالى نە دەيدى؟
-سالتاناتتىڭ تاعدىر سانى 5. جۇرت نازارىندا ءجۇرۋى كەرەك. كوزگە بىردەن تۇسەدى. قۋاندىقتا ەكى، ءتورت، التى سياقتى توپىراققا ءتان، ەنەرگياسى اۋىر ساندار كوپ بولسا، سالتاناتتا كەرىسىنشە ءتورت پەن التى جوق، ەسەسىنە ۇشتىكتەرى (333) مەن بەستىكتەرى (555) كوپ. بۇل اۋاعا، كوسموسقا ءتان ساندار. وتە سەزىمتال. اسەمدىككە قۇمار.
مورت سىنىپ كەتۋى مۇمكىن. بولمىسى جەڭىل. ونىڭ ۇستىنە بىرلىكتەرى دە كەم، كوپ دۇنيەدە ءوز ويىن وزگەلەردىڭ راستاعانىن كۇتەدى، ۇنەمى قولداۋ قاجەت. ىشتەي وزىنىكى دۇرىس ەكەنىن ءبىلىپ تۇرسا دا، بىربەتكەيلىك جوق، باسقالاردىڭ پىكىرىنە قۇلاق تۇرەدى، ويىنان وڭاي اينىتۋعا دا بولادى. ەكەۋىنىڭ دە جولى اۋىرلاۋ جالپى.
-بايجانوۆ شىن مانىندە كىنالى مە؟ نۋمەرولوگيا ءىلىمى بويىنشا ونىڭ بويىنان قانداي قاسيەتتەردى بايقاي الامىز؟
-ساندارىنا قاراپ، ەشكىمدى كىنالى، كىنالى ەمەس دەپ ايتا المايمىز. جوعارىدا ايتقانىمداي ساندارعا، ەشقانداي ەزوتەريكاعا باعىنبايتىن جاۋاپكەرشىلىك، ادامشىلىق، تاربيە، قۇندىلىق دەگەن دۇنيەلەر بار.
ءبىز بايجانوۆتىڭ دا قۇندىلىقتارىن بىلمەيمىز عوي. سوندىقتان ول كىنالى يا كىناسىز دەپ ايتۋ – قاتە بولادى. ونى اۋەلى ءبىر قۇداي، سوسىن ءوزى بىلەدى، نيەتى قانداي بولعانى وزىنە عانا ءمالىم. قالعانىن زاڭ شەشەدى.
ءبىراق بايجانوۆ قانداي جاعدايدا دا شىنىن ايتۋى كەرەك. سەبەبى تاعدىر سانى 8. ءوزىنىڭ ماتريساسىندا 888 بار. بۇل وتە سيرەك كەزدەسەتىن كومبيناسيا جانە ۆەدالىق نۋمەرولوگيادا كارمالىق كورسەتكىش سانالادى.
تاعدىر سانى سەگىزدىك ادامدار جانە ماتريساسىندا وسىنداي سەگىزدىكتەرى (888) بار ادام، قاشان دا ادالدىق، ادىلدىك جولىمەن ءجۇرۋى كەرەك.
سەبەبى سەگىز – قارىز بەن پارىز، بورىش، ادالدىق پەن ادىلدىك سانى. ادام سول ميسسيانى ورىنداماسا، ياعني ادال ءجۇرىپ، ءادىل بولماسا، مۇرتتاي ۇشادى.
ءتان الەۋەتى تومەن، ەرىك-جىگەر كۇشى كەم. نەگىزى بۇل ادامعا بىرەۋدىڭ تاساسىندا جۇرمەي، ءوزى پۋبليكاعا شىعۋى قاجەت. پۋبليكانىڭ پوتەنسيالى جوعارى. تەك سونى دامىتپاعان بولۋى كەرەك.
سۇحباتتاسقانىڭىزعا العىس!
