وسك مالىمەتىنشە، رەسەي پرەزيدەنتتىگىنە كانديدات جانە قازىرگى مەملەكەت باسشىسى ۆلاديمير پۋتين 2017-2022 جىلدار ارالىعىندا 67،5 ميلليون رۋبلدەن استام تابىس تاپقان.
ءپۋتيننىڭ سايلاۋعا دەيىنگى التى جىلداعى تابىسىنىڭ جالپى سوماسى 67 591 875 ءرۋبلدى قۇرايدى. ءپۋتيننىڭ دەكلاراسياسىنداعى تابىس كوزدەرىنىڭ قاتارىندا جالاقى، بانك سالىمدارى مەن باعالى قاعازداردان تۇسكەن تابىس، اسكەري زەينەتاقى جانە مۇلىكتى ساتۋ بار.
ءپۋتيننىڭ سانكت-پەتەربۋرگتە ءبىر پاتەرى (77 شارشى مەتر) مەن گاراجى (18 شارشى مەتر)، سونداي-اق ءۇش كولىگى بار.
ونىڭ 54 416 604،52 ءرۋبلدى قۇرايتىن 10 بانكتىك شوتى بار ەكەنى اتاپ ءوتىلدى. سونىمەن قاتار، پۋتين دەكلاراسيادا «سانكت-پەتەربۋرگ بانكى» اق 230 اكسياسىن كورسەتتى.
«مۇلىكتىك سيپاتتاعى مىندەتتەمەلەر» باعانىندا سانكت-پەتەربۋرگتەگى پاتەر (153،7 شارشى مەتر، شەكتەۋسىز پايدالانۋ، ماسكەۋ ۇكىمەتىنىڭ بۇيرىعى) جانە كولىك تۇراعى (18 شارشى مەتر، شەكتەۋسىز پايدالانۋ، گاراج كووپەراتيۆىنە مۇشەلىك) كورسەتىلگەن.
سونداي-اق، پرەزيدەنتتىك سايلاۋعا تىركەلگەن پارلامەنتتىك پارتيالاردىڭ ءۇش كانديداتى بەلگىلى بولدى. ولار لدپر باسشىسى لەونيد سلۋسكيي، مەملەكەتتىك دۋما ءتوراعاسىنىڭ ورىنباسارى، «جاڭا حالىق» پارتياسىنىڭ مۇشەسى ۆلاديسلاۆ داۆانكوۆ پەن مەملەكەتتىك دۋمانىڭ دەپۋتاتى (رف كوممۋنيستىك پارتياسىنىڭ فراكسياسى) نيكولاي حاريتونوۆ. ولار دا تابىس دەكلاراسياسىن تاپسىرادى.
ايتا كەتەيىك، رەسەي فەدەراسياسىندا پرەزيدەنت سايلاۋى 2024 جىلدىڭ 15-17 ناۋرىز ارالىعىندا وتەدى.
فوتو: رف/تاسس
