2024 جىلدىڭ 12 اقپانى مەن 24 ءساۋىرى ارالىعىندا بارلىق وبلىس ورتالىقتارىندا الدىن الا ىرىكتەۋ كەزەڭى وتەدى. ىرىكتەۋ وتكىزىلەتىن كۇن، ۋاقىت جانە ورىن تۋرالى اقپارات اكادەميانىڭ balletacademy_kz الەۋمەتتىك جەلىلەرىندەگى رەسمي اككاۋنتتارىندا ورنالاستىرىلادى.
جولداما العان بالالار ءۇشىن قابىلداۋ ەمتيحاندارى 2024 جىلدىڭ ماۋسىم-شىلدە ايلارىندا وتەدى.
4-سىنىپ وقۋشىلارى حورەوگرافيالىق ونەر بويىنشا بەيىندىك دايارلىعى بار ونەر سالاسىنداعى مامانداندىرىلعان مەكتەپتە ءدارىس الادى. ال 5-سىنىپقا قابىلدانعان بالالار – كاسىپتىك ءبىلىم بەرەتىن مەكتەپ-كوللەدجىندە «بالەت ءارتىسى» بىلىكتىلىگىنىڭ «حورەوگرافيا ونەرى» ماماندىعى بويىنشا وقيدى. وقۋ كەزەڭى - 7 جىل 10 اي.
اكادەميانىڭ ءبىلىم الۋشىلارى سوڭعى ءۇش جىل ىشىندە 54 حالىقارالىق بايقاۋعا قاتىسىپ، 100-دەن اسا ماراپاتقا يە بولدى.
حورەوگرافيا اكادەمياسىنىڭ كوللەدجىندە 2017 جىلدان باستاپ «بالەت ءارتىسى» بىلىكتىلىگىنىڭ «حورەوگرافيا ونەرى» ماماندىعى بويىنشا 100 ادام، «بي ءانسامبلىنىڭ ءارتىسى» بىلىكتىلىگى بويىنشا 74 ادام ءبىلىم الدى.
اكادەميا تۇلەكتەرى وتاندىق تەاتر ارتىستەرىنىڭ قاتارىن تولىقتىردى. ولاردىڭ قاتارىندا «استانا بالەت» جانە «استانا وپەرا» تەاترلارىنىڭ جەتەكشى بالەت ارتىستەرى شۇعىلا ادەپحان، سۇلتانبەك عۇمار، رۋستام چاحالوۆ، سافيا ءادىلحانوۆا، سونداي-اق حالىقارالىق بايقاۋلاردىڭ جەڭىمپازدارى، ۇماي ۇلتتىق سىيلىعىنىڭ «جىل جاڭالىعى» جانە «ۇزدىك بالەت ورىنداۋشىسى» نوميناسيالارىنىڭ يەگەرلەرى بار.
