وسى جاعدايدان كەيىن اقش مەملەكەتتىك دەپارتامەنتى رەسەيلىك بيلىككە ناۆالنىيدىڭ قاماۋداعى تاعدىرىنا جاۋاپتى ەكەنىن جانە «كىنالىلەردى حالىقارالىق قوعامداستىق جاۋاپقا تارتاتىنىن» رەسمي تۇردە ەسكەرتتى. ارينە، كرەمل مۇنداي ەسكەرتۋدى قۇلاعىنا دا قىستىرمايدى. اbai.kz جازعانداي، پۋتيندىك جۇيەنىڭ بۇل جايتقا قاتىستى ءوز بىلگەنى بار شىعار؟
1 جەلتوقساندا ناۆالنىي تەلەگرام-ارناسى ساياساتكەرگە سىلتەمە جاساپ، ونىڭ ۇستىنەن ۆانداليزم بابى بويىنشا جاڭا قىلمىستىق ءىس قوزعالعانى تۋرالى حابارلان بولاتىن. بۇل تۋراسىندا ناۆالنىي «ولار ماعان قارسى ءار ءۇش اي سايىن جاڭا قىلمىستىق ءىس قوزعايدى. سوتتالعاننان بەرى ءتۇرلى قۇقايدى كورىپ، ءارى ءبىر جىلدان استام جالعىز كامەرادا وتىرعان ادام بۇرىن-سوڭدى مۇنداي باي قوعامدىق-ساياسي ءومىردى باستارىنان ەش وتكىزگەن ەمەس»، - دەپ ءتۇسىندىردى.
Baza Telegram ارناسى الەكسەيدىڭ ماسكەۋگە جاڭا قىلمىستىق ءىس بويىنشا تەرگەۋ ارەكەتتەرىن جۇرگىزۋ ءۇشىن جىبەرىلگەنىن جازىپ، ءبىراق بۇل اقپاراتتىڭ ءوزىنىڭ شىن-وتىرىگىن راستاۋدى قاجەت ەتەتىنىن ەسكەرتتى. وتكەن جىلى ناۆالنىيعا «ەكسترەميزم» ءۇشىن ايىپتاپ، ون توعىز جىل ەرەكشە رەجيمگە جازا كەسكەن بولاتىن. وپپوزيسياشى عانا ەمەس، سونىمەن بىرگە ءپۋتيننىڭ جەكە باس دۇشپانى بولىپ تابىلاتىن جان تۇرمەدە ءشىرىپ ولمەي بوستاتىلمايتىنى بارشا جۇرتقا ايقىن بولدى. ال، وعان ايىپ ۇستىنە ايىپ تاعۋ ونىڭ جەكە باسىن ماسقارالاۋ بولىپ تابىلادى.
بىلىكتىلىگى كۇمان تۋدىراتىن سوت دارىگەرلەرىنىڭ باقىلاۋىنداعى 47 جاستاعى ناۆالنىيدىڭ اباقتىدا ءولۋ مۇمكىندىگى، بارشا جاعدايى جاسالىپ، نەبىر بىلىكتى دارىگەرلەر استى ۇستىنە تۇسەتىن 71 جاستاعى پۋتيندىكىنەن الدەقايدا جوعارى. رەسەي پرەزيدەنتىنىڭ تاريحتا ۇلى بيلەۋشى، كورنەكتى مەملەكەت قايراتكەرى رەتىندە قالۋ يدەياسىنا قۇمارلىعى بارىمىزگە بەلگىلى. ءبىراق ءپۋتيننىڭ ۇلىلىق بەينەسىن ونىڭ ساياسي قارسىلاسىنا دەگەن كوزقاراسى بۇزادى. پريگوجين كوتەرىلىسى ءپۋتيننىڭ شىنىمەن كىمنەن قورقۋ كەرەكتىگىن انىق كورسەتتى: كوشەلەر مەن الاڭداردان الدەقاشان الاستاتىلعان ءتىسى جوق ليبەرالدار ەمەس، رەجيم اسىراعان بەس قارۋى ساي فاناتيكتەر وتە ءقاۋىپتى. شەت ەلگە تاراپ كەتكەن نەمەسە لاگەردە وتىرعان بەيتانىس ادامدار ەمەس، قوجايىننىڭ كوزىنە ىلتيپاتپەن قارايتىندار ونى ولتىرۋگە بەيىم ەكەندىگى دالەلدەۋدى كەرەك ەتپيەتىن فاكتىگە اينالدى.
پۋتين ناۆالنىيدى ءيتتىڭ ەتىنەن دە جەك كورەدى، ويتكەنى ول وزىنە ەشقاشان كۇماندانبادى جانە 1990ء-شى جىلداردىڭ سوڭىندا كەزدەيسوق بيلىككە تارتىلىپ، ودان ءارى قاراي تايىپ تۇرعان ادامنىڭ جەكە باسىنىڭ شىنايى اۋقىمى مەن ادامگەرشىلىك قاسيەتتەرىنە كۇماندانبادى. ناۆالنىي مەن ونىڭ كومانداسىنىڭ تەرگەۋلەرى مەن جۋرناليستىك مالىمدەمەلەرىندە تاجدەگى سۇر ءتۇستىڭ پورترەتى ءدال بەرىلگەندىكتەن، الدىمەن ونى ۋلاۋ، ال ەمدەلگەننەن كەيىن قايتىپ كەلگەندە، تۇرمەدە ءشىرىتۋ تۋرالى بۇيرىق بەرىلدى. ناعىز ۇلىلىققا جومارتتىق قاسيەت ءتان دەيمىز، ءبىراق بۇل پۋتينگە قاتىستى ەمەس.
ناۆالنىيعا قاتىستى ىس-ارەكەتىمەن پۋتين ءوز ادامي سۇقپىتىن ايقىن تانىتتى. ناۆالنىيدىڭ 2021 جىلدىڭ قاڭتارىندا، ياعني ۇلكەن سوعىسقا ءبىر جىل قالعاندا ۋلانىپ، رەسەيگە ورالعانىنا باسقاشا كوزقاراسپەن قاراۋىمىز كەرەك. بالكىم، بۇل ساياساتكەر ءوز وتانىنىڭ بولشاعىنا بالتا شابىلىپ جاتقانىنا بەيجاي قارماعانى ءۇشىن بيلىككە ايكاپىر بولدى. جازاعا ۇشىرايتىنىن بىلسە دە ەلىنە ورالعاندىعى ناۆالنىيدىڭ باتىرلىعى. ناۆالنىي پۋتينمەن ادامي تەكەتىرەسىندە جەڭىسكە جەتە الدى.
كەرىمسال جۇباتقانوۆ،
تاريح عىلىمدارىنىڭ كانديداتى، قازاق-ورىس حالىقارالىق ۋنيۆەرسيتەتىنىڭ دوسەنتى
