مەملەكەت باسشىسى كۇيشى، كومپوزيتور ءابدىمومىن جەلدىبايەۆتىڭ وتباسى مەن جاقىن تۋىستارىنا كوڭىل ايتۋ جەدەلحاتىن جولدادى
پرەزيدەنت قاسىم-جومارت توقايەۆ داۋلەسكەر كۇيشى، كومپوزيتور، «پاراسات»، «قۇرمەت»، «دوستىق» وردەندەرىنىڭ يەگەرى ءابدىمومىن جەلدىباي ۇلىنىڭ دۇنيەدەن وتۋىنە بايلانىستى ونىڭ وتباسى مەن جاقىن تۋىستارىنا كوڭىل ايتتى، - دەلىنگەن حابارلامادا.
سونىمەن قاتار، توقايەۆ ءوز سوزىندە كۇيشىنىڭ ومىرلىك ونەگەسى مەن ۇلت رۋحانياتىنا قوسقان ۇشان-تەڭىز ۇلەسىنە توقتالعان.
– ءابدىمومىن جەلدىباي ۇلى كيەلى كۇي ونەرىنىڭ كوكجيەگىن كەڭەيتكەن دارىن يەسى، ۇلاعاتتى ۇستاز بولدى. بار سانالى عۇمىرىن ءتول مۇرامىزدى ناسيحاتتاۋعا ارناپ، ەلىمىزدىڭ مادەنيەتى مەن رۋحانياتىن دامىتۋعا ايرىقشا ەڭبەك ءسىڭىردى. «ەركە سىلقىم» سياقتى ومىرشەڭ كۇيلەرىمەن جۇرتشىلىقتىڭ ىقىلاسىنا بولەندى. ونەگەلى ءومىر ءسۇرىپ، سوڭىنا مۋزىكالىق مول مۇرا قالدىرعان ءابدىمومىن جەلدىباي ۇلىنىڭ جارقىن بەينەسى حالقىمىزدىڭ جۇرەگىندە ماڭگى ساقتالادى. مارقۇمنىڭ يمانى سالامات، جانى ءجانناتتا بولسىن، – دەپ جازىلعان جەدەلحاتتا.
بەلگىلى كۇيشى-كومپوزيتور، قازاقستاننىڭ ەڭبەك سىڭىرگەن مادەنيەت قايراتكەرى ءابدىمومىن جەلدىبايەۆ 90 جاسقا قاراعان شاعىندا ومىردەن ءوتتى. قارالى حاباردى جامبىل وبلىسى اكىمىنىڭ باسپا ءسوز حاتشىسى جانعازى احمەت جەتكىزدى.
كۇيشى-كومپوزيتوردىڭ "ەركە سىلقىم"، "كوكشولاق"، "جامبىل بابا جىر تولعايدى"، "تۇران ەلى"، "تولە بي تولعاۋى"، "سۇڭقار سەزىم"، "جەتىسۋ سازى"، "بوزجىگىت"، "اۋليەاتا" جانە تاعى باسقا كۇيلەرى بار.
