ءتىرى بولسام، قازاققا قىزمەت ەتپەي قويمايمىن!

ءاليحان بوكەيحان

"سۋ باسقان وڭىرلەردەگى ازىق-تۇلىك باعاسى تۇراقتى باقىلاۋدا" - جۋرناليست دۋمان كەنجەعازى ۇلى

10 ءساۋىر 2024 167
بۇگىن قاسيەتتى رامازان ايىنىڭ سوڭعى ورازاسى. ورازا ءبىز ءۇشىن جەڭىل وتكەنىمەن، ەلىمىز ءۇشىن جەڭىل بولمادى. سەبەبى سامارقاننىڭ كوك تاسى القىنىپ، تابيعاتتىڭ توسىن مىنەزى كۇيبەڭ تىرشىلىك كەشىپ جاتقان ازاماتتاردىڭ سول كۇنگى كۇنىن تاس-تالقان ەتتى. ەرىگەن قار سۋى ەلىمىزدىڭ ون ەلدى-مەكەنىندە توتەنشە جاعداي جاريالاۋعا الىپ كەلدى.
 
بۇل قاسىرەت اربىرىمىزگە اۋىر تيەتىنى ءسوزسىز. بۇل قازاق نە كورمەدى. بەيبىت كۇننىڭ وزىندە وسىنداي تابيعي اپاتتاردى باستان كەشىرىپ جاتىرمىز. جاراتقاننىڭ ىسىنە شارا بار ما؟! ءبىراق قانداي قيىندىق بولسا دا مويىمايتىن ءبىزدىڭ حالىق ءبىر جاعادان باس، ءبىر جەڭنەن قول شىعاراتىنى ايدان انىق.
 
ءقازىردىڭ وزىندە توتەنشە جاعدايلار قىزمەتى مەن كۇشتىك قۇرىلىمداردان بولەك ەلىمىزدىڭ ءار وڭىرىنەن جينالعان ۆولونتەرلەر سۋ تاسقىنا قارسى شارالارعا ات سالىسۋدا. ۇيسىز-كۇيسىز قالعان اعايىنعا جىلۋ جيناپ، ءبىر جاعىنا شىعىسۋدا. ءبىراق ولاي ايتۋعا دا كەلمەيدى، سەبەبى مەملەكەت تاراپىنان جان-جاقتى قولداۋ مەن كومەكتەر بارىنشا كورسەتىلۋدە. ءتىپتى زارداپ شەككەن وتباسىلاردىڭ وزدەرى العاشقى وتەماقىلارىن الا باستادى.
 
مىقتى كاسىپورىندار مەن بانكتەردىڭ وزدەرى ارنايى اشىلعان شوتقا قوماقتى قارجىلارىن اۋدارىپ، ەلدىڭ ءبىرجاعىنا شىعىسۋدا.
وقۋ-اعارتۋ مينيسترلىگىدە ساباق پروسەسىن ۇيىمداستىرۋ، زارداپ شەككەن وتباسىلاردىڭ بالالارىن ساۋىقتىرۋ لاگەرلەرىنە جىبەرۋ بويىنشا ناقتى شارالار قابىلداۋدا.
سۋ باسقان وڭىرلەردە ناننىڭ باعاسى مەن قاراپايىم تۇتىناتىن زاتتىڭ باعاسىن اسپانداتىپ جۇرگەندى دە كوردىك. ءقازىر ونى ساۋدا مينيسترلىگى ءوزىنىڭ قاتاڭ باقىلاۋىنا الدى. ازىق-تۇلىك باعاسىنا تۇراقتى باقىلاۋ جۇرگىزىلۋدە.
 
سونداي-اق، اقپاراتتىق شتاب 24/7 جەدەل تۇردە جۇمىس اتقارۋدا. سوڭعى اقپاراتتار ۋاقتىلى تەز بەرىلۋدە. ەگەردە وسىلاي ۋاقتىلى بەرىلسە عانا ەل اراسىندا قاڭقۋ ءسوز بەن جالعان اقپارات بولمايدى. ايتپەسە وسىنداي جاعدايلاردى ءوز ماقساتىنا پايدالانىپ كەتەتىندەردى دە كوردىك.
 
باستىسى ادام شىعىنى جوق. ەلدىڭ اماندىعى كەرەك. قالعانىنىڭ ءبارىن قايتادان جاساۋعا، قالپىنا كەلتىرۋگە بولادى. بۇل دا ءبىر ەلىمىزگە بەرىلگەن سىناق شىعار. اماندىقتا بولايىق. قاسيەتتى رامازان ايىنىڭ سوڭعى كۇنىندە ەلدىڭ اماندىعىن، جۇرتتىڭ تىنىشتىعىن تىلەدىم. ۇستاعان ورازالارىڭىز بەن نيەتتەرىڭىز قابىل بولسىن!
 
جۋرناليست 

 

 

بۇل ماقالا تۋرالى نە ويلايسىز؟