13 اقپاندا لوندوندا ءبىر توپ بەلسەندى Trafalgar الاڭىندا سول كۇنى الماتىدا وتكەن قارالى ميتينگىگە قولداۋ ءبىلدىرىپ، اكسيا وتكىزدى. بريتانيا استاناسىنداعى اكسيا اۆتورلارى سونداعى قازاق دياسپوراسىنان 30-عا جۋىق ادام قاتىسقانىن ايتتى.
اكسياعا قاتىسۋشىلار 6 قاڭتار كۇنى الاڭعا شىعىپ، وققا ۇشقاندار ۇستاعان "ءبىز بەيبىت حالىقپىز! قاراپايىم حالىقپىز. ءبىز – تەرروريست ەمەسپىز!" دەيتىن ۇرانداردى پلاكاتقا جازىپ شىققان.
Trafalgar الاڭىنا جينالعاندا قاڭتار قىرعىنى كەزىندە قازا بولعان ادامداردىڭ ءاتى-جونى جازىلعان قاعاز ۇستاپ، دۇعا جاساعان.
كەيبىرى كەۋدەسى مەن ارقاسىندا قان ءىزىنىڭ سۋرەتى سالىنعان اق كيىم كيىپ، قولدارىنا "ازاپتاۋدى توقتاتىڭدار!"، "قازاقستانداعى تراگەديانى حالىقارالىق تەرگەۋدى تالاپ ەتەمىز!"، "توقايەۆتان شۇعىل ساياسي رەفورما جاساۋدى تالاپ ەتەمىز!" دەگەن جازۋلارى بار پلاكات ۇستاعان.
وسىعان ۇقساس اكسيالار ۇلىبريتانيا استاناسىندا وتكەن ايدان بەرى جالعاسىپ كەلەدى. 30 قاڭتاردا قازاقستاننىڭ لوندونداعى ەلشىلىگى الدىندا ءبىر توپ بەلسەندى قازاقستان بيلىگىنەن قاڭتار وقيعاسىنا قاتىسقانداردى قۋعىنداماۋدى تالاپ ەتكەن. ول كەزدە اكسياعا قاتىسۋشىلار Trafalgar الاڭىنان ەلشىلىككە دەيىن ترانسپارانت ۇستاپ جۇرگەن. 3 اقپاندا بۇل توپ ۇلىبريتانيا پارلامەنتىنىڭ عيماراتىنا بارعان.
قاڭتار قىرعىنىندا قازا بولعاندار مەن زارداپ شەككەندەرگە ارنالعان اكسيا تاياۋدا بەرليندە دە وتكەن. الەۋمەتتىك جەلىلەردە تاراعان ۆيدەودا ادامدار "ەۋروپا-حاۋس" عيماراتىنىڭ الدىندا "قازاقستاندا تەررور توقتاتىلسىن"، "قازاق حالقى تەرروريست ەمەس"، "جاڭا قازاقستان جاستاردى ازاپتاپ، ولتىرۋمەن باستالىپ جاتىر"، "ازاپتاۋدى توقتاتىڭدار! گۋلاگ قايتا ورالدى" دەگەن ۇراندارى بار پلاكات ۇستاپ تۇرعان.
جينالعاندار قازاقستانداعى قاڭتار قىرعىنىن "ادامزاتقا قارسى قىلمىس" دەپ باعالاپ، حالىقارالىق كوميسسيا زەرتتەۋىن تالاپ ەتكەن.
13 اقپاندا، قاڭتار قىرعىنىنا 40 كۇن تولعاندا الماتىدا قارالى ميتينگ وتكەن ەدى. رەسمي مالىمەت قاڭتارداعى قىرعىندا 227 ادام ءولدى دەپ كورسەتەدى. وعان كۇمانمەن قارايتىن قۇقىق قورعاۋشىلار مەن باق-تار ولگەندەر ءتىزىمىن ءوز بەتىنشە قۇراپ، وقيعانىڭ شىنايى حرونيكاسىن جاساۋعا تىرىسىپ وتىر.
قازاقستاننىڭ كوپتەگەن وڭىرلەرىندە قاڭتار قىرعىنان كەيىن ۇستالعاندارعا پوليسيانىڭ وزبىرلىق جاساعانى، كىناسىن مويىنداتۋ ءۇشىن ۇرىپ-سوققانى، ازاپتاعانى جايلى ءجيى ايتىلدى. وسى وقيعادان كەيىن جۇزدەگەن ادام تەررورعا، جاپپاي تارتىپسىزدىككە قاتىستى، قارۋ-جاراق ۇرلادى دەپ ايىپتالىپ، قاماۋعا الىنعان.
- قازاقستاننىڭ باس پروكۋراتۋراسى ازاپتاۋ، رۇقسات ەتىلمەگەن ادىستەرمەن تەرگەۋ بويىنشا 170 قىلمىستىق ءىس قوزعالعانىن حابارلادى.
- قازاقستان بۇعان دەيىن قۇقىق قورعاۋشىلاردىڭ حالىقارالىق تەرگەۋ جۇرگىزۋ تۋرالى ۇندەۋىن قابىلداماعان. پرەزيدەنت توقايەۆ "وعان قاجەتتىلىك جوق، ءوزىمىز تەرگەي الامىز" دەپ جاۋاپ قاتقان.
