جاڭاوزەندەگى اكىمدىك الدىندا اقپاننىڭ 1-نەن بەرى جۇمىس تالاپ ەتىپ تۇرعان قالا تۇرعىندارى بۇگىن قازاقستان پرەزيدەنتى قاسىم-جومارت توقايەۆقا، "قازمۇنايگاز" ۇلتتىق كومپانياسىنىڭ باسقارما باستىعى اليك ايداربايەۆقا، ماڭعىستاۋ وبلىسى اكىمى نۇرلان نوعايەۆقا تاعى ۆيدەوۇندەۋ جولدادى. بۇل جولى ولار مۇناي-گاز سالاسىنا جۇمىسقا الۋعا جاريالانعان موراتوريي كۇشىن جويۋدى تالاپ ەتتى.
نارازىلار وكىلى مالىمدەمەنى داۋىستاپ وقىپ بەرەدى:
- 2022 جىلدان باستاپ موراتوريي جويىلسىن! "وزەنمۇنايگاز" شتاتى كەڭەيتىلىپ، وعان قىزمەت كورسەتەتىن كومپانيالارعا جۇمىسسىزدار جۇمىسقا الىنسىن! مۇناي-گاز وندىرەتىن جاڭا جۇمىس ورىندارى اشىلسىن. ءبىز، جاڭاوزەن قالاسىنىڭ جۇمىسسىز حالقى، قاسىم-جومارت كەمەل ۇلى توقايەۆتان وسى وڭىرگە كەلىپ ماسەلەمىزدى تەزىرەك شەشىپ بەرۋىن تالاپ ەتەمىز!
وسىدان سوڭ جينالعان جۇرت "تالاپ ەتەمىز!" دەپ قوسىلا ايقالايدى.
دۇيسەنبىدە "وزەنمۇنايگاز" كومپانياسىنا قىزمەت كورسەتەتىن FTC WIN مەكەمەسىنىڭ جۇمىسشىلارى دا جۇمىسىن توقتاتاتىنىن حابارلاعان ۆيدەونى الەۋمەتتىك جەلىدە جاريالادى.
- ارامىزدا از قامتىلعان وتباسىلى ازاماتتار، كوپ بالالى انالار بار. نارىقتاعى باعانىڭ وسۋىنە بايلانىستى وتباسىن اسىراۋ قيىنعا سوعىپ بارادى. ءبىزدىڭ تالاپتارىمىز ورىندالماۋىنا بايلانىستى جۇمىستى توقتاتۋعا ءماجبۇرمىز. ءبىزدى بولاشاعى بار مۋناي-گاز سالاسىنا شتاتقا وتكىزۋدى تالاپ ەتەمىز! - دەيدى ۆيدەودا جينالعان نارازى جۇمىسشىلاردىڭ ءبىرى.
بۇل كۇنى ماڭعىستاۋ وبلىسى بەينەۋ اۋدانىنداعى ۆەتەرينارلىق ستانسيا قىزمەتكەرىمىز دەگەن ءبىر توپ ادام جالاقىنى كوتەرۋدى تالاپ ەتىپ، ايتقانى ورىندالماسا، 1 ناۋرىزدان جۇمىستى توقتاتىنىن مالىمدەدى. ولاردىڭ دا ۇندەۋى الەۋمەتتىك جەلىدە تارادى. ۆەتەرينارلار ۇندەۋىن پرەزيدەنتتەن بولەك، اۋىل شارۋاشىلىعى ءمينيسترى ەربول قاراشۇكەيەۆكە دە ارناعان. ولاردىڭ ايتۋىنشا، ەڭبەك ءوتىلى 15-40 جىل اراسىنداعى جوعارى ساناتتى دارىگەر بولعانىنا قاراماستان، ايلىق جالاقىلارى 50-70 مىڭ تەڭگەدەن (112-162 دوللار) اسپايتىنىن ايتادى.
ولار جالاقىنى 68 پايىزعا كوتەرىپ، زياندىلىق ءۇشىن تولەنۋى ءتيىس 12 پايىز جەنە ۆەتەريناريا سالاسىنا قوسىلعان 23 پايىز ۇستەماقىنى تولەۋدى تالاپ ەتەدى.
نارازى ۆەترينارلاردىڭ ايتۋىنشا، قازاقستاننىڭ اۋىلشارۋاشىلىق ءمينيسترى ەربول قاراشۇكەيەۆ 3-9 اقپاندا ماڭعىستاۋدى ارالاعانىمەن، ۆەتەرينارلىق ستانسيالارعا سوقپاعان.
ازاتتىق ماڭعىستاۋ وبلىستىق اۋىل شارۋاشىلىعى باسقارماسىنا جانە FTC WIN كومپانياسىنا حابارلاسىپ، كوممەنتاريي الا المادى.
جاڭاوزەندە ءقازىر ەڭبەك جاعدايىن جاقسارتىپ، ەڭبەكاقىنى كوتەرۋدى تالاپ ەتىپ تاعى بىرنەشە كومپانيا ەرەۋىلدەپ تۇر. "بۇرعىلاۋ" ج ش س، "تەمىرتاس" ج ش س، "ركسۋ-اقتاۋ" ج ش س جۇمىستى توقتاتىپ، ەرەۋىلدەپ تۇرعاندارىنا اپتاعا جاقىن ۋاقىت بولدى.
جاڭاوزەندەگى جۇمىسسىزدار تالابىن ورىنداۋ ءۇشىن جەرگىلىكتى بيلىك 161 جۇمىس ورنىن ۇسىنىپ، ناۋرىز ايىنان باستاپ تاعى دا 400 جۇمىس ورىنىن اشۋعا ۋادە بەرگەن. بيلىك ۇسىنعان جۇمىس ورىندارىنا كەيبىر قالا تۇرعىندارى ورنالاسقان.
اقپاننان بەرى ماڭعىستاۋدا ەرەۋىل كوبەيدى. ولاردىڭ كەيبىرى نارازىلىقتان سوڭ تالاپتارىنا قول جەتكىزدى.
