13 قاڭتاردا اقمولا وبلىسى ششۋچينسك قالاسى اكىمدىگى الدىندا قازاقستان پرەزيدەنتى قاسىم-جومارت توقايەۆقا سىيلىق رەتىندە ۇتىك اكەلگەن 41 جاستاعى ۆلاديمير پروكوپيەۆتىڭ ۇستىنەن اكىمشىلىك ءىس قوزعالدى. بۇل تۋرالى بەلسەندى ازاتتىققا حابارلادى.
پروكوپيەۆ ۇتىككە "توقايەۆ جانە كو" دەپ جازعان. اكسيا كەزىندە ءتۇسىرىپ، ءوزىنىڭ Instagram پاراقشاسىنا جاريالاعان ۆيدەودا ول "[ۇتىك] قازاقستان حالقىنىڭ اتىنان. ماحابباتپەن" دەپ، اكىمدىك الدىنا قويادى.
— ماعان قاڭتار وقيعاسى اسەر ەتتى. ۇستالعان، ازاپتالعان كوپ ادامدى كوردىم. ۇستالعاننىڭ كوبى — جازىقسىز ادامدار. ولاردى ماجبۇرلەپ مويىنداتىپ جاتىر. ۇتىكپەن كۇيدىرىپ تە ازاپتاعان. ۇتىك ازاپتاۋ سيمۆولىنا اينالدى. سوندىقتان پرەزيدەنتكە ۇتىك سىيلايىن دەپ شەشتىم. ۇتىككە "توقايەۆ جانە كو" دەپ جازدىم، ياعني بۇل توقايەۆ پەن ونىڭ توبىنا، ۇكىمەت پەن پارلامەنتكە سىيلىعىم، — دەدى پروكوپيەۆ ازاتتىققا بەرگەن سۇحباتىندا.
وعان ەشكىم كەدەرگى كەلتىرمەگەن. ءبىراق اكسياسىن اياقتالعان سوڭ اكىمدىك ماڭىندا ونى ەكى ادام توقتاتقان.
— ەكى قىزمەتكەردىڭ ءبىرى ءوزىن "پوليسەيمىن"، ەكىنشىسى "ۇلتتىق قاۋىپسىزدىك كوميتەتىندە ىستەيمىن" دەپ تانىستىردى. جولىمدى جاۋىپ، كەتۋىمە توسقاۋىل بولدى. تىكەلەي ەفيرگە شىعىپ ەدىم، ماعان تاپ بەردى دە، تەلەفونىمدى تارتىپ الماق بولدى. ەفيردى ءسوندىرىپ، تەلەفوندى تىعىپ قويدىم. مەنى قىزمەتتىك "ۋازيك" كولىگىنە وتىرعىزدى. ىشتە دە ماعان تەلەفونىمدى ۇستاۋعا رۇقسات ەتپەدى. ماعان ۇستالعان ادامداي قاراپ، قۇقىعىمدى بۇزدى، — دەيدى ول.
ولار بەلسەندىنى بۋراباي اۋداندىق پوليسيا بولىمشەسىنە اپارادى. پروكوپيەۆتىڭ سوزىنشە، پوليسيادا بەس جارىم ساعات تەرگەگەن. ۇستىنەن زاڭسىز ميتينگىگە ەكىنشى رەت شىعۋ بابىمەن (اكىمشىلىك قۇقىق بۇزۋشىلىق كودەكسى 488-بابىنىڭ 11-تارماعى) حاتتاما تولتىرادى. بەلسەندىنىڭ سوزىنشە، العاشقى ەسكەرتۋ وعان قاڭتار باسىنداعى نارازىلىققا شىعىپ، ۇستالعان كەزدە بەرىلگەن.
بەلسەندىنىڭ ءىسى بويىنشا، 14 اقپاندا سوت ءوتۋى كەرەك ەدى. ءبىراق ءبىر كۇنگە شەگەرىلدى. ول كىنالى دەپ تانىلسا، 150 مىڭ تەڭگە ايىپپۇل تولەيدى نە 20 كۇنگە قامالۋى مۇمكىن.
سوت وتىرىسى ءالى وتپەگەنىنە قاراماستان، 14 اقپاندا اقمولا وبلىستىق پوليسيا دەپارتامەنتى Instagram-داعى رەسمي پاراقشاسى ارقىلى بەلسەندىنىڭ جازباسىنا "بۇل ازامات (پروكوپيەۆتى ايتادى — رەد.) اكىمشىلىك قۇقىق بۇزۋشىلىق بويىنشا جاۋاپقا تارتىلدى" دەپ پىكىر قالدىرعان.
تەرگەۋ كەزىندە بەلسەندى اكىمشىلىك ارازدىق قوزدىرۋ بابىمەن قوزعالعان قىلمىستىق ىستە قورعالۋ قۇقىعى بار كۋاگەر ەكەنىن دە بىلگەن. پروكوپيەۆتىڭ سوزىنشە، تەرگەۋشى وعان قىلمىستىق ءىس بويىنشا تۇسىنىك الىنۋى كەرەك ازاماتتار تىزىمىندە بارىن كورسەتكەن. اقمولا وبلىستىق پوليسياسى بۇل تۋرالى كوممەنتاريي بەرمەدى.
قازاقستاندا قاڭتار وقيعاسى كەزىندە جانە ودان كەيىن مىڭداعان ادام ۇستالىپ، جۇزدەگەن ادام "تەرروريزم"، "جاپپاي تارتىپسىزدىك"، "قارۋ-جاراقتى ۇرلاۋ" جانە وزگە قىلمىس جاسادى دەگەن كۇدىكپەن قاماۋعا الىندى. ۇستالعانداردىڭ كوبىنىڭ تۋىستارى قاماۋ كەزىندەگى ازاپتاۋلارعا شاعىمداندى: ولاردىڭ سوزىنە قاراعاندا، پوليسيا بولىمشەلەرىندە جاقىندارىنىڭ ۇستىنەن ىستىق سۋ قۇيىپ، ۇتىكپەن جانە ەلەكتروشوكەرمەن كۇيدىرگەن، قاتتى ۇرىپ-سوققان. قىلمىستى مويىنداتۋعا تىرىسقان. بۇعان دەيىن باس پروكۋراتۋرا ۇستالعانداردان ازاپتاۋ جانە زاڭسىز تەرگەۋ ءادىسىن قولدانۋ بويىنشا 300-دەن استام شاعىم تۇسكەنىن، 170ء-ى بويىنشا قىلمىستىق ءىس قوزعالعانىن حابارلاعان. دەگەنمەن مەكەمە ءالى كۇنگە دەيىن قانشا پوليسەيدىڭ ۇستالعانىن ايتپاي وتىر.
29 قاڭتاردا مەملەكەتتىك ارناعا سۇحبات بەرگەن توقايەۆ "[ازاپتاۋ تۋرالى] مالىمدەمەلەردە اسىرا ايتۋ باسىم" دەگەن. مۇنان سوڭ "پوليسيا شەكتەن شىعىپ جاتقان جاعدايلار بولسا، ونىڭ ارەكەتىن اقتامايمىن. بۇعان جول بەرمەيمىز" دەدى.
بيىل قاڭتاردا جاڭاوزەن مەن اقتاۋ قالالارىندا سۇيىتىلعان گاز باعاسىنىڭ قىمباتتاۋىنا بايلانىستى جاپپاي نارازىلىق باستالىپ، ونىڭ سوڭى ەل اۋماعىندا تارتىپسىزدىك پەن زورلىق-زومبىلىققا ۇلاسقان. باسقا ايماقتاردا بولعان قاقتىعىس، اتىس كەسىرىنەن كەمىندە 227 ادام قازا بولدى.
