سانكت-پەتەربۋرگتە كوپىردەن قۇلاپ، وزەنگە باتقان اۆتوبۋس وقيعاسى بويىنشا قىلمىستىق ءىس قوزعالدى. وقيعاعا قاتىسى بار دەپ ءشۇبالانعان ازامات ۇستالدى، دەپ حابارلايدى Alash.KZ ۇلتتىق پورتالى.
جولاۋشىلارى بار اۆتوبۋستىڭ مويكا وزەنىنە قۇلاۋى سالدارىنان جولاۋشىلاردىڭ قازا بولۋ دەرەگى تىركەلدى. بۇعان بايلانىستى سانكت-پەتەربۋرگتىڭ تەرگەۋ ورگاندارى قاۋىپسىزدىك تالاپتارىنا ساي كەلمەيتىن قىزمەت كورسەتۋ فاكتىسى بويىنشا تەرگەۋ جۇرگىزىپ جاتىر:
"كۇدىكتى ەسەبىندە جولاۋشىلاردى تاسىمالداۋدى ۇيىمداستىرعان "تاكسي" جشق اۆتوكولونناسىنىڭ باستىعى ۇستالدى. لاۋازىمدىق نۇسقاۋلىققا سايكەس اتالعان ادامعا ەڭبەك جانە كولىك ءتارتىبىنىڭ، ونىڭ ىشىندە "تاكسي"جشق-دا ەڭبەك قىزمەتىن جۇزەگە اسىراتىن جۇرگىزۋشىلەردىڭ ەڭبەك جانە دەمالىس رەجيمىنىڭ ساقتالۋىن باقىلاۋ مىندەتتەرى جۇكتەلدى. تەرگەۋ مالىمەتتەرى بويىنشا، وزەنگە قۇلاعان اۆتوبۋستىڭ جۇرگىزۋشىسى بىرنەشە كۇن بويى قاجەتتى دەمالىس ۋاقىتىمەن قامتاماسىز ەتىلمەگەن"، - دەپ حابارلادى قۇزىرلى مەكەمە وكىلدەرى.
ەستەرىڭىزدە بولسا، ءبىز قازاقستاننىڭ تۋماسى ەرحان احانوۆتىڭ سانكت-پەتەربۋرگ قالاسىندا كوپىردەن قۇلاپ، سۋعا باتىپ كەتكەن اۆتوبۋس جولاۋشىلارىنا كومەك كورسەتكەنىن جازعانبىز. قازىرگى ۋاقىتتا ۇستالعان ادامعا قاتىستى تەرگەۋ جۇمىستارى ءجۇرىپ جاتىر.
ەسكە سالا كەتەيىك، 10 مامىر كۇنى سانكت-پەتەتربۋرگتە اۆتوبۋس كوپىردەن قۇلاپ،سالدارىنان جەتى ادام كوز جۇمدى. جۇرگىزۋشى رولگە يە بولا الماي، اۆتوبۋس قالا ورتالىعىنداعى وزەنگە قۇلاعان. تەرگەۋ كوميتەتى جۇرگىزۋشى اۆتوبۋستان العاشقىلاردىڭ ءبىرى بولىپ شىققانىن حابارلادى. ول كەيىننەن ۇستالدى.
