ءتىرى بولسام، قازاققا قىزمەت ەتپەي قويمايمىن!

ءاليحان بوكەيحان

"جارتى ميلليون ادامنىڭ ءومىرى قىل ۇستىندە تۇر". قازاقستاننىڭ 10 وبلىسىن سۋ باستى

29 ناۋرىز 2024 183

ءقازىر ەلدىڭ 10 وبلىسى قارعىن سۋدىڭ زاردابىن تارتىپ جاتىر،كەيبىر وبلىستارعا ءقاۋىپ ءتوندىرىپ تۇر. كەيبىر ايماقتا توتەنشە جاعداي جاريالانعان.

"ءبىر ءۇيدى سۋ السا دا ۇلكەن قايعى، ال ءقازىر جارتى ميلليون ادامنىڭ ءومىرى قىل ۇستىندە تۇر" دەدى ءماجىلىس دەپۋتاتى سەرگەي پونوماريەۆ 27 ناۋرىزدا ۇكىمەت مۇشەلەرىنە سۋ تاسقىنىنا بايلانىستى جولداعان دەپۋتاتتىق ساۋالىندا. ول ۇكىمەت پەن اكىمدىكتەردى كوكتەمگى تابيعي اپاتقا دايىن ەمەس دەپ سىنادى.

ال اگروساراپشى كيريلل پاۆلوۆ "قازاقستاندا سۋ تاپشى دەگەندى ايعاي سالىپ ايتامىز، ءبىراق كوكتەمدە توپان سۋدان زارداپ شەگەمىز. ياعني سۋدى باسقارۋدى، ساقتاۋدى ۇيرەنە الماي كەلەمىز"، – دەدى تىلشىلەرگە.

قازاقستان ۇكىمەتىنىڭ 28 ناۋرىز تۇسكە دەيىنگى مالىمەتى بويىنشا، ءار ايماقتا 100-دەن استام تاسقىن تىركەلىپ، 297 ءۇي سۋ استىندا قالدى. 18 جولدى سۋ شايىپ، ەكى كوپىر بۇزىلدى. ازىرگە ايماقتاردا كەلتىرىلگەن ماتەريالدىق شىعىننىڭ مولشەرى ايتىلعان جوق.

توتەنشە جاعدايلار مينيسترلىگى اقتوبە، اقمولا، اتىراۋ، قوستاناي، باتىس قازاقستان، شىعىس قازاقستان، ۇلىتاۋ، قاراعاندى، پاۆلودار جانە اباي وبلىستارىنا ءقاۋىپ ءتونىپ تۇرعانىن حابارلادى.

27 ناۋرىزداعى مالىمەتكە سۇيەنسەك، 1431 ادام ەۆاكۋاسيالانعان، ونىڭ 312ء-سى – بالا. كەيبىر اۋماقتا تۇرعىندار ءقاۋىپسىز جەرگە تىكۇشاقپەن جەتكىزىلگەن.

توتەنشە جاعدايلار مينيسترلىگى قوستاناي وبلىسىنىڭ جاڭاقالا، ەكىدىڭ، اقكىسى، قىزىلجۇلدىز اۋىلدارى جانە توعىز قىستاقتىڭ تۇرعىندارى ارقالىق قالاسىنىڭ ەۆاكۋاسيا پۋنكتەرىنە جەتكىزىلدى دەپ مالىمدەدى.

بۇل ماقالا تۋرالى نە ويلايسىز؟