"داۋ-دامايسىز" باعدارلاماسىنىڭ جۇرگىزۋشىسى گۇلميرا ءابىقاي ەل ەستىمەگەن سۇمدىقتى ايتىپ، قالىڭ وقىرمانىنا قۇلدىققا تۇسكەن جاننىڭ تاعدىرى جايلى باياندادى، دەپ حابارلايدى Alash.KZ ۇلتتىق پورتالى.
جۋرناليست گۇلميرا ءابىقاي ەلگە قول ۇشىن بەرىپ، الەۋمەتتىك جەلىدە قوعامداعى پروبلەمالار، ادامداردىڭ قيلى تاعدىرىنا قاتىستى بلوگ جۇرگىزەدى. بۇل جولى جۋرناليست ءوز وقىرمانىنان توسىن حابارلاما العانىن ايتتى. حابارلامادا قۇلدىقتا جۇرگەن ايەلدىڭ تاعدىرى باياندالادى:
"فوتوداعى ايەلدىڭ ەسىمى - ايگەرىم. ءوزى: “فازەندادان قۇلدىقتان قاشىپ شىقتىم، 5 جىل ءجۇردىم. جەتىسۋ وبلىسىنانمىن، 87ء-شى جىلعىمىن. اكەم قايرات، ايدانا دەگەن اپكەم بار”،- دەگەن. تاڭعى ساۋىننان سوڭ ساعات 5-تەردە شىققاننان ەرتەڭىنە كەشكى 5-تە الماتى وبلىسىنداعى ساياجايدىڭ شەتكى ۇيىنە كەلىپ توقتاپتى. ايمان ەسىمدى وقىرمانىم بەيتانىس ايەلدىڭ سوزىنە ءارى سەنىپ، ءارى شوشىپ “پوليسيا شاقىرايىن” دەپ ەدى، ول سەلك ەتە ءتۇسىپتى. ول: "سۋ بەرىڭىزشى!"،- دەگەن. ۇيدەن سۋ اكەلىپ شىققانشا، قۇلدىقتاعى ايەل ءىز-تۇزسىز جوعالعان.
ۇيدە جالعىز ءوزىم كىشكەنتاي بالالارمەن وتىرعان سوڭ، كىرگىزىپ تاماق بەرۋگە ءبىر شەتىنەن قورىقتىم دەپ اعىنان جارىلدى وقىرمانىم. ءجونى-سوزى ءتۇزۋ، تەك ابدەن قاجىعان، شالبارى مەن اياق كيىمى ابدەن بالشىق ەكەن.
بالكىم، مەنىڭ پوليسيا شاقىرايىن دەگەنىمدى ەستىپ قايتا اپارىپ تاستاي ما دەپ شوشىعان سياقتى دەپ قورىتتى ءسوزىن ايمان. ايگەرىم امان-ەسەن ۇيىنە جەتتى ما ەكەن دەگەن وي مازالايدى"،-دەپ جازدى.
كەيىننەن جۋرناليست جەتىسۋ جانە الماتى وبلىسى پوليسيا دەپارتامەنتتەرىنە جۇگىنىپ، كومەك سۇرادى. بۇل ماسەلەگە بەي-جاي قاراماۋلارىن ءوتىندى. وقىرماندار جاعى دا قۇليەلەنەۋشىلىكتىڭ ءالى دە جويىلماعانىن، ادامدى باسىبايلى رەتىندە تۇرمىسقا جەگۋدىڭ قيسىنسىزدىعىن ايتىپ، نارازىلىق تانىتىپ جاتىر.
